Zhezu wìla fɔrɔgɔfɛnnɛ nafa taanri ma yiri kɛ ma yiri shyɛn tun
10
1 Ko puŋgo na,
a Zhezu wì si lere nafa taanri ma yiri kɛ ma yiri shyɛn wɔ.
Wo jate wila daga mbe toro cagbɔrɔ to naa lara nda fuun na,
a wi nɛɛ pe tunnu shyɛnzhyɛn pe keli pe toro wi na wa ki lara ti ni.
2 A wì si pe pye fɔ:
«Yarilire nda ti yaa kɔn,
ti yɛn ma lɛgɛ.
Ɛɛn fɔ,
tunmbyeele pe woro ma lɛgɛ.
Ki kala na,
ye kɛrɛfɔ wi yɛnri wi tunmbyeele lɛgɛrɛ torogo wa kɛrɛ.
3 Yaa kee!
Mi yɛn na ye tunnu paa simbapiile yɛn wa kombokara ti sɔgɔwɔ.
4 Yaga ka penjara leyaraga lɛ,
yaga ka cana karikasha lɛ,
nakoma mbe sawira lɛ!
Yaga si ka yere konɔ mbe lere shari.
5 Yaga ye go ŋga fuun ni,
yege yo gbɛn fɔ:
‹Yɛyinŋge mbe pye laga ki go ŋga ki ni!›
6 Na kiga yala yɛyinŋgefɔ wa ki go ki ni,
pa Yɛnŋɛlɛ li yaa yɛyinŋge kan ki fɔ wi yeri.
Na wa si woro wa,
pa ye yɛyinŋge ki yaa sɔngɔrɔ ye na.
7 Ye koro wa ki go ki ni.
Paga yaraga ŋga fuun kan ye yeri,
yege ka.
Paga si tɔnmɔ mba fuun kan ye yeri,
yoo wɔ,
katugu tunmbyee wi ma daga wi sara wi ni.
Yaga kaa yanri yinrɛ ti ni mbaa toro.
8 Yaga ye ca ŋga fuun ni,
na paga ye yigi jɛŋgɛ mbe yaakaga ŋga fuun kan ye yeri,
ye ko ka!
9 Yambala mbele ka pye wa ki ca ki ni,
ye pe sagala.
Ye ca woolo pe pye fɔ:
Yɛnŋɛlɛ li wunluwɔ pì yɔngɔ ye ni.›
10 Ɛɛn fɔ,
yaga ye ca ŋga ni,
na pee ye yigi jɛŋgɛ,
ye kari wa pe ca nawa koŋgolo ke ni,
ye pe pye fɔ:
11 ‹Ye wele!
Ye ca tara jate nda tì maramara we tɔɔrɔ ti na,
waa ti pee nari wuun laga ye kala na.
Konaa ki ni fuun,
yege jɛn ye yo fɔ:
Yɛnŋɛlɛ li wunluwɔ pì yɔngɔ ye ni.› »
12 A Zhezu wì si pe pye naa fɔ:
«Mila ki yuun ye kan,
na kiti kɔnpilige kiga ka gbɔn,
Sodɔmu ca woolo pe jɔlɔgɔ ki yaa ka mbɔnrɔ ki ca woolo pe wogo ki na.»
Cara nda woolo pàa je mbe taga Zhezu wi na
13 «Yoro Korazɛn ca fɛnnɛ wele,
jɔlɔgɔ yɛn ye wogo!
Yoro Betisayida ca fɛnnɛ fun,
jɔlɔgɔ yɛn ye wogo!
Katugu ndɛɛ ki pye kafɔnŋgɔlɔ ŋgele kè pye wa ye yeri,
pa kè ja pye wa Tiri ca naa Sidɔn ca woolo pe yɛgɛ sɔgɔwɔ,
anmɛ kì gbɔn yɛɛn,
pe kashara lele pe yɛɛ na,
ma pe yɛɛ piligi wa cɔnrɔ ti ni mbege naga fɔ paa jaa mbe pe kapere pyege ki yaga.
14 Ki kala na,
na kiti kɔnpilige kiga ka gbɔn,
Tiri ca naa Sidɔn ca woolo pe jɔlɔgɔ ki yaa ka mbɔnrɔ ye wogo ki na.
15 Yoro Kapɛrinawu ca woolo fun,
ye nawa po ni pe yaa ka ye yirige mbe gbɔn fɔ wa yɛnŋɛlɛ na wi le?
Ayoo dɛ,
pe yaa ka ye tirige mbe gbɔn fɔ wa kuulo tara
16 Kona,
a Zhezu wì suu fɔrɔgɔfɛnnɛ pe pye naa fɔ:
«Lere ŋa ka ye sɛnrɛ ti logo,
na woro to wì logo.
Lere ŋa ka si je ye na,
muwi wì je na na.
Lere ŋa ka si je mi na,
kona,
wì je Yɛnŋɛlɛ na lìlan tun lo na
Fɔrɔgɔfɛnnɛ nafa taanri ma yiri kɛ ma yiri shyɛn pàa sɔngɔrɔ ma pan
17 Naa fɔrɔgɔfɛnnɛ nafa taanri ma yiri kɛ ma yiri shyɛn pàa kaa yiri wa pe tunŋgo ma sɔngɔrɔ ma pan,
pàa yin nayinmɛ coli.
A pè si Zhezu wi pye fɔ:
«We Fɔ,
ali yinnɛ tipegele jate kàa pye na we sɛnrɛ ti nuru na tanri ti na,
na we kɔɔn mɛgɛ ki yeri we!»
18 A Zhezu wì si pe pye fɔ:
«Mì Sɔtanla wi yan wì yiri wa naayeri ma to laga tara paa yɛnŋɛlɛ yɛngɛlɛmɛ yɛn.
19 Ye wele!
Mì yawa pi kan ye yeri yaa tanri wɔɔrɔ to naa naala pe na;
konaa ye ya ye ye mbɛnfɔ Sɔtanla wi fanŋga ki jan.
Ali yaraga ko ka se ya mbe kapege pye ye na.
20 Ɛɛn fɔ,
naa yinnɛ tipegele kaa ye sɛnrɛ ti nuru,
kii daga yaa yɔgɔri ko kala na.
Ye daga mbaa yɔgɔri,
katugu ye mɛrɛ ti yɛn ma yɔnlɔgɔ wa yɛnŋɛlɛ na
Zhezu wi yɔgɔrimɔ sɛnrɛ
21 Le ki wagati nuŋgba wi ni,
a Yinnɛkpoyi lì si nayinmɛ kan Zhezu wi yeri.
A wì sho fɔ:
«Na To,
mboro ma yɛn naayeri wo naa tara ti Fɔ.
Mila ma shari,
katugu ŋga mà lara dunruya kajɛnmbɛlɛ poro naa sɛwɛ jɛnfɛnnɛ pe na,
màga pye maga naga piile tunmɔmbɔlɔ poro na.
Na To mà ko pye ma,
katugu ko kɔ̀ɔn ndanla.
22 «Na To wì yaraga pyew ki le na kɛɛ.
Lere kpɛ si Pinambyɔ wi jɛn,
ndɛɛ wi To wo nuŋgba.
Lere kpɛ si To wi jɛn,
ndɛɛ Pinambyɔ wo nuŋgba,
konaa leele mbele Pinambyɔ wi yɛn na jaa mboo To wi naga pe na.»
23 Ko puŋgo na,
a Zhezu wì si kanŋga ma yɛgɛ wa wi fɔrɔgɔfɛnnɛ poro yeri cɛ,
mɛɛ pe pye fɔ:
«Fɛrɛwɛ yɛn ye woo,
kagala ŋgele yaa yaan ke kala na.
24 Katugu mila ki yuun ye kan,
Yɛnŋɛlɛ yɔn sɛnrɛ yofɛnnɛ pe lɛgɛrɛ naa wunlumbolo pe lɛgɛrɛ la pye naga jaa mbe ŋga yaa yaan ki yan.
Ɛɛn fɔ,
pe sila ki yan.
Pàa pye naga jaa mbe nda yaa nuru ti logo,
ɛɛn fɔ,
pe sila ti logo.»
Samari tara fɛnnɛ naŋa kajɛŋgɛ pyefɔ
25 Ki wagati wi ni,
a lasiri sɛwɛ jɛnfɔ wà si yiri ma yere mbe Zhezu wi wa mbe wele,
mɛɛ wi pye fɔ:
«We Nagafɔ,
yiŋgi mi daga mbe pye mbe si yinwege mbakɔgɔ ki ta?»
26 A Zhezu wì suu pye fɔ:
«Yiŋgi ki yɛn ma yɔnlɔgɔ wa we lasiri sɛwɛ wi ni?
Na ma kaa ti kara ma maa ti nuru mɛlɛ?»
27 A ki naŋa wì suu pye fɔ:
«Ki yɛn ma yɔnlɔgɔ wa ma yo fɔ:
Ma Fɔ Yɛnŋɛlɛ li daga mbɔɔn ndanla ma kotogo ki ni fuun ni,
naa ma nawa pi ni fuun ni,
naa ma fanŋga ki ni fuun ni,
naa ma jatere wi ni fuun ni.
Konaa ma lewee yɛnlɛ wi daga mbɔɔn ndanla paa yɛgɛ ŋga na mɔɔ yɛɛ ndanla we› ».
28 A Zhezu wì suu pye fɔ:
«Nda mà yo ti yɛn kaselege.
Ta ko piin,
pa ma yaa yinwege mbakɔgɔ ki ta.»
29 Ɛɛn fɔ,
ki lasiri sɛwɛ jɛnfɔ wìla pye na tanga jaa wi yɛɛ kan.
A wì si Zhezu wi pye fɔ:
«Ambɔ wi yɛn na lewee yɛnlɛ wo?»
30 A Zhezu wì si sɛnrɛ ti lɛ maa yɔn sogo,
ma yo fɔ:
«Naŋa wà la yiri wa Zheruzalɛmu ca na kee wa Zheriko ca.
A beŋganri pyefɛnnɛ si saa yiri ma to wi na,
maa gbɔn,
maa kɔɔnlɔ,
maa yaara ti yu,
mɛɛ kari maa toro le wi yɛgɛ wɔ.
31 A kì si yala cɛ saraga wɔfɔ wà la pye na toro wa ki konɔ nuŋgba li ni.
Naa wìla ka saa gbɔn ma naŋa wi yan,
a wì si kɛ kanŋgaga na ma toro.
32 Ki pyelɔmɔ nuŋgba pi na naa,
a Levi setirige pyɔ wà si saa gbɔn wa ki laga ki na,
ma naŋa wi yan,
mɛɛ kɛ kanŋgaga na ma toro.
33 Ɛɛn fɔ,
Samari tara fɛnnɛ naŋa wà la pye na kee cana wa ki konɔ nuŋgba li ni.
Naa wo la ka saa gbɔn maa yan,
a wi yinriwɛ suu ta fɔ jɛŋgɛ.
34 A wì si fulo wa wi tanla maa sagbanra ti fɔ,
mɛɛ wɛrɛ sinmɛ naa duvɛn wo ti na,
mɛɛ ti pɔpɔ sagbanra pɔparisanra ni.
Ko puŋgo na,
a wì suu lɛ wi yɛɛra sofile wi na,
mɛɛ kari wi ni nambanmbala tugugo ka ni,
mɛɛ saa naa gbegele wama.
35 Ki goto,
a ki Samari tara fɛnnɛ naŋa wì si warifuwe pyɔ shyɛn wɔ maa kan nambanmbala tugugofɔ wi yeri,
ma suu pye fɔ:
‹Ki naŋa ŋa yɛɛn,
taa gbegele na kan,
na maga yaraga ka wɔ mbe taga wa naa mbe wɛ,
na sɔngɔrɔsaga mi yaa ki fɔgɔ ki tɔn.› »
36 A Zhezu wì si lasiri sɛwɛ jɛnfɔ wi pye fɔ:
«Mboro wo yɛgɛ na,
ki leele taanri mbele pe ni,
wiwiin wi yɛn naŋa ŋa beŋganri pyefɛnnɛ pàa to wi na wi lewee yɛnlɛ wo?»
37 A lasiri sɛwɛ jɛnfɔ wì sho fɔ:
«Ŋa wìla wi yinriwɛ ta wowi.»
A Zhezu wì suu pye fɔ:
«Kari ma saa piin ma fun.»
Zhezu wìla kari wa Mariti naa Mari pe go
38 Ma Zhezu wo naa wi fɔrɔgɔfɛnnɛ pe ta wa konɔ paa kee wa Zheruzalɛmu,
a pè si saa gbɔn ca ka ni.
A jɛlɛ wà si pe yaara wɔ wa wi go,
pàa pye naa yinri Mariti.
39 Ki jɛlɛ wi nɔsepyɔ sumboro la pye wa pàa pye naa yinri Mari.
A wo si saa cɛn we Fɔ Zhezu wi jegele nɛɛ nuru wi yeri.
40 Ko sanga wo ni,
go tunndo tìla pye ma Mariti wi yanra fɔ maa jatere wi lɛgɛ wi na.
A wì si saa Zhezu wi pye fɔ:
«We Fɔ,
naa na jɔnlɔ sumboro wì tunndo ti ni fuun ti yaga na kan mila ti piin na yɛ,
ki wogo ki woro kala la ma yɛgɛ na wi le?
Ki yo wi kan wi pan wilan saga.»
41 A we Fɔ wì suu pye fɔ:
«Mariti,
Mariti,
maa ma jatere wi lege ma yɛɛ na,
nɔɔ yɛɛ tege yarilɛgɛrɛ kala na.
42 Ɛɛn fɔ,
yaraga nuŋgba ki wa mbe lere kala yɔn.
Tasaga jɛŋgɛ ko Mari wì wele ma wɔ.
Ki se shɔ wi yeri.»