Zhezu wìla naŋa wa sagala, yinnɛ tipele la pye wi ni
5
1 Kona,
a pè si gbɔn wa lɔgbɔgɔ ki kɛɛ sanŋga ki na,
wa Gerasa tara fɛnnɛ pe tara.
2 A Zhezu wì si tigi ma yiri wa tɔnmɔkɔrɔ ki ni,
le ki yɔngɔlɔ ke ni,
a naŋa wà si yiri fanra laga ka ni,
mɛɛ pan mboo fili.
Yinnɛ tipele làa pye ki naŋa wi ni.
3 Pa wìla pye na cɛɛn wa fanra laga ki ni.
Lere saa ya mboo pɔ,
ali jɔrɔgɔ ni yɛrɛ.
4 Wagati lɛgɛrɛ na,
pe ma tugurɔn le wi tɔɔrɔ ti na,
maa pɔ jɔrɔgɔ ni.
Ɛɛn fɔ,
wi ma tugurɔn ti kaari,
ma jɔrɔgɔ wi kɔn.
Fanŋga sila pye lere ni mbe ya mboo mara.
5 Kìla pye wagati pyew,
sɔnlɔ naa yembinɛ,
wi ma pye wa fanra ti sɔgɔwɔ konaa yanwira ti na,
na jɔrɔgi wa,
naa yɛɛ wɛlɛgi sinndɛɛrɛ ti na.
6 Naa wìla kaa Zhezu wi yan wa lege,
a wì si fe ma saa wi fili,
ma kanŋguuro kan wi jegele,
7 mɛɛ jɔrɔgɔ ŋgbanga ma yo fɔ:
«Yiŋgi ki yɛn mi naa mboro we sɔgɔwɔ,
Zhezu,
mboro ŋa ma yɛn Yɛnŋɛlɛ na yaara ti ni fuun ti go na li Pinambyɔ?
Mila ma yɛnri Yɛnŋɛlɛ li mɛgɛ ki na,
maga kanla le jɔlɔgɔ!»
8 Wìla ko yo ma,
katugu Zhezu wìla ki konɔ kan wi yeri ma yo fɔ:
«Yinnɛ tipele,
wɔ ki naŋa ŋa wi ni!»
9 A Zhezu wì si naŋa wi yewe ma yo fɔ:
«Pe maa ma yinri mɛlɛ?»
A wì sho fɔ:
«Pe maa na yinri:
Janwa,
katugu we yɛn ma lɛgɛ.»
10 A wì si Zhezu wi yɛnri ŋgbanga,
ma yo wiga ka pe purɔ mbe pe wɔ wa ki tara ti ni.
11 Cɛɛlɛ ŋgbelege kà la pye wa yanwiga ki tanla,
na kaa.
12 A yinnɛ tipegele kè si Zhezu wi yɛnri,
ma yo fɔ:
«We torogo we sa ye wa cɛɛlɛ mbele pe ni.»
13 A Zhezu wì si konɔ kan ke yeri.
Kona,
a yinnɛ tipegele kè si wɔ naŋa wi ni,
mɛɛ saa ye cɛɛlɛ pe ni.
A cɛɛlɛ pe ni fuun pè si fe ma tigi wa yanwiga ki tigiwɛn lapege ki na,
ma toori wa lɔgbɔgɔ tɔnmɔ pi ni ma ku.
Cɛɛlɛ mbele pàa ku,
pàa cɛlɛ waga shyɛn (2 000) yɔn ko tin.
14 A cɛɛlɛ kɔnrifɛnnɛ pè si fe ma saa na ŋga kìla pye ki yari wa cagbɔrɔ to naa kɛɛrɛ ti ni.
Ŋga kìla pye,
a leele pe nɛɛ paan naga wele.
15 Naa pàa kaa gbɔn wa Zhezu wi tanla,
a pè si saa naŋa ŋa yinnɛ tipegele lɛgɛrɛ kàa pye wi ni wi yan,
wìla yaripɔrɔ le ma cɛn.
Wi jatere wìla pye ma cɛn wi na fɔ jɛŋgɛ.
A leele pè si fyɛ.
16 Kala na làa yinnɛ tipegele fɔ wo naa cɛɛlɛ pe ta,
leele mbele pàa li yan,
a pe nɛɛ li yɛgɛ yuun na sanmbala pe kaan.
17 Kona,
a pe nɛɛ Zhezu wi yɛnri ma yo wi wɔ wa pe tara.
18 Naa Zhezu wila kaa na yiin wa tɔnmɔkɔrɔ ki ni,
naŋa ŋa yinnɛ tipegele kàa wɔ wi ni,
a wì suu yɛnri ma yo wi yaa koro wi ni.
19 Zhezu wi sila yere ki na,
ɛɛn fɔ,
a wì suu pye fɔ:
«Sɔngɔrɔ maa kee ma woolo pe kɔrɔgɔ.
Ma Fɔ wɔ̀ɔn yinriwɛ ta,
ma ŋga pye mɔɔ kan,
ma saga yɛgɛ yo ma pe kan.»
20 A wì si kari wa Dekapole tara,
mɛɛ saa na ŋga Zhezu wì pye maa kan ki yari.
Mbele fuun pàa ki logo,
pàa pye na kawa.
Zhayiru wi sumborombyɔ wo naa jɛlɛ ŋa wìla jiri Zhezu wi derege ki na pe sɛnrɛ re
21 A Zhezu wì si sɔngɔrɔ naa wa lɔgbɔgɔ ki kɛɛ sanŋga ki na,
wa tɔnmɔkɔrɔ ki ni.
A janwa gbɔlɔ là si gbogolo wa wi tanla maa maga.
Wìla pye le lɔgbɔgɔ ki yɔn na.
22 A shɛrigo to wà si pan wi kɔrɔgɔ,
pàa pye naa yinri Zhayiru.
Naa wìla kaa Zhezu wi yan,
a wì si kanŋguuro kan le wi nɔgɔ,
23 maa yɛnri jɛŋgɛ,
ma yo fɔ:
«Na sumborombile laa kuun.
Ki kala na,
shokari wa na yeri,
ma sɔɔn kɛyɛn yi taga li na li ta li sagala,
li yinwege ta.»
24 A Zhezu wì si pinlɛ wi ni ma kari.
A janwa gbɔlɔ lì si taga wi na,
naa jiire lagapyew.
25 Wa ki janwa wi ni,
jɛlɛ wà la pye wa.
Kasanwa wogo yama la pye wi na.
Pìla yɛlɛ kɛ ma yiri shyɛn ta wi na.
26 Ki jɛlɛ wìla jɔlɔ jɛŋgɛ wɛrɛ pyefɛnnɛ lɛgɛrɛ yeri.
A wi kɛɛ yaara ti ni fuun tì saa kɔ.
Ɛɛn fɔ,
wi yama pi sila pye na mbɔnrɔgi,
pìla pye na seregi na kee wi.
27 Naa wìla kaa Zhezu wi sɛnrɛ logo,
a wì si pan wa janwa wi ni,
wa Zhezu wi puŋgo na,
mɛɛ jiri wi derege ki na.
28 Katugu wìla pye naga yuun wa wi nawa fɔ:
«Na ŋga jiri wi derege ko na jɛnri okɛ,
pa mi yaa sagala.»
29 Le ki yɔngɔlɔ nuŋgba ke ni,
a wi kasanwa wogo yama pì si kɔ.
A wìgi jɛn wa wi wire ti ni ma yo wì sagala.
30 Le ki yɔngɔlɔ nuŋgba ke ni,
a Zhezu wìgi jɛn wi yɛ ma yo fanŋga kà wɔ wi ni.
A wì si wa ma kanŋga wa janwa wi sɔgɔwɔ,
ma sho fɔ:
«Ambɔ wì jiri na derege ki na?»
31 A wi fɔrɔgɔfɛnnɛ wà suu pye fɔ:
«Na ma janwa wi yan wila ma jiire lagapyew yɛɛn,
a ma nɛɛ yewe ma yo:
Ambɔ wi jiri na na?»
32 A wì si welewele maa yɛɛ maga,
mbe ta mbege pyefɔ wi jɛn.
33 A jɛlɛ wi nɛɛ fyɛ na seri,
katugu ŋga kìla pye wi na,
wìla ki jɛn.
A wì si pan ma kanŋguuro kan le Zhezu wi nɔgɔ,
mɛɛ ŋga kìla pye ki kaselege ki ni fuun ki yo maa kan.
34 A Zhezu wì suu pye fɔ:
«Na sumborombyɔ,
ma tagawa pɔ̀ɔn shɔ.
Ta kee yɛyinŋge na,
ma yama pi kɔ ma na.»
35 Ma Zhezu wi ta wìla pye na para bere,
a pitunmbolo pèle si yiri wa shɛrigo to Zhayiru wi go ma pan,
mɛɛ Zhayiru wi pye fɔ:
«Ma sumborombyɔ wì ku makɔ,
yiŋgi na,
a ma nɛɛ we Nagafɔ wi tege naa bere?»
36 Ɛɛn fɔ,
Zhezu wi sila pye na poro sɛnyoro to wele.
A wì si Zhayiru wi pye fɔ:
«Maga ka fyɛ.
Taga na na ko cɛ.»
37 Zhezu wi sila yɛnlɛ lere wa kpɛ mbe pinlɛ wi ni,
ndɛɛ Pyɛri naa Zhaki naa wi nɔsepyɔ Zhan poro pàa kari wi ni.
38 Naa pàa ka saa gbɔn wa shɛrigo to wi go,
a Zhezu wì si janwa gbɔlɔ la yan wa laa tinni.
Ki leele pàa pye na gbele na jɔrɔgi ŋgbanga.
39 A Zhezu wì si ye wa go,
mɛɛ pe pye fɔ:
«Yiŋgi na,
a ye nɛɛ tinni na gbele yɛɛn?
Pyɔ wii ku,
ɛɛn fɔ,
wila wɔnlɔ wi.»
40 Naa wìla kaa to yo ma,
a leele pe nɛɛ tɛgɛ wi na.
Kona,
a Zhezu wì si pe ni fuun pe yirige wa funwa na,
mɛɛ pyɔ wi to naa wi nɔ naa wi fɔrɔgɔfɛnnɛ taanri mbele pàa kari wi ni pe lɛ ma ye pe ni wa pyɔ wi sinlɛsaga.
41 A wì si pyɔ wi yigi wi kɛɛ ki na,
ma suu pye fɔ:
«Talita kumi.»
Ko kɔrɔ wo yɛn fɔ:
«Sumborombyɔ,
mila ki yuun ma kan,
yɛn ma yiri.»
42 Le ki yɔngɔlɔ nuŋgba ke ni,
a sumborombyɔ wì si yiri na tanri.
Wìla ta yɛlɛ kɛ ma yiri shyɛn.
A kì si pe pari fɔ jɛŋgɛ.
43 A Zhezu wì sigi yo maga ŋgban pe ni ma yo ŋga wìla pye,
paga kaga yo mbe lere kan.
A wì si pe pye ma yo pe pyɔ wi kan wi ka.