11
1 Naa Zhezu wìla kaa wi fɔrɔgɔfɛnnɛ kɛ ma yiri shyɛn pe naga ki sɛnrɛ ti ni ma saa kɔ,
a wì si yiri lema,
ma kari mbe saa leele pe nari Yɛnŋɛlɛ sɛnrɛ ti ni,
mbaa ti yari pe kan wa ki tara nuŋgba ti cara ti ni.
Zhan Batisi wo naa wi fɔrɔgɔfɛnnɛ pe sɛnrɛ
2 Ma Zhan Batisi wi ta wa kaso,
a wì si Kirisi wi kapyegele ke sɛnrɛ logo.
Kì kaa pye ma,
a wì suu fɔrɔgɔfɛnnɛ pele tun wa Zhezu wi yeri
3 a pè saa wi yewe ma yo fɔ:
«Shɔfɔ ŋa pòo sɛnrɛ yo ma yo wi yaa pan wowi mboro lee,
nakoma we daga mbaa wa yɛgɛ singi bere?»
4 A Zhezu wì si pe yɔn sogo ma yo fɔ:
«Ŋga yaa yaan konaa ŋga yaa nuru,
ye saga yɛgɛ yo ye Zhan wi kan.
Yoo pye fɔ:
5 ‹Fyɔɔnlɔ paa yaan.
Jejɔgɔlɔ fɛnnɛ paa tanri cɛcɛcɛ.
A Yayɛnwɛ fɛnnɛ pè sagala.
A nuŋgbojiile paa nuru.
A gboolo paa yɛnni na yinrigi wa kunwɔ pi ni.
A Yɛnŋɛlɛ li Sɛntanra ti yɛn na yari fyɔnwɔ fɛnnɛ pe kan.
6 Lere ŋa suu tagawa pi je mbe laga na na,
fɛrɛwɛ yɛn ki fɔ wi woo!› »
7 Naa Zhan wi fɔrɔgɔfɛnnɛ pàa kaa sɔngɔrɔ ma kari,
a Zhezu wì si sɛnrɛ ti lɛ,
nɛɛ para janwa wi ni Zhan wi kanŋgɔlɔ,
na yuun fɔ:
«Yiŋgi yàa kari sa wele wa gbinri wi ni?
Gbagara kanŋgaga ŋga tifɛlɛgɛ maa gbɔɔn naga yɛgɛ ko kayi yàa kari sa wele wi le?
Ayoo.
8 Kì pye ma,
ambɔ yàa si kari sa wele?
Lere wa,
ŋa wùu yɛɛ pɔ paara tiyɔnrɔ ni wi le?
Ayoo.
Katugu mbele pe maa pe yɛɛ poo paara tiyɔnrɔ ti ni,
pe ma pye wa wunlumbolo yinrɛ ti ni.
9 Ɛnhɛn,
yiŋgi yaa si saa wele?
Yɛnŋɛlɛ yɔn sɛnrɛ yofɔ lawi wi le?
Ee,
mì yo ma dɛ.
Mi yɛn naga yuun ye kan,
fɔ wi mɛgɛ kì gbɔgɔ ma wɛ Yɛnŋɛlɛ yɔn sɛnrɛ yofɔ na.
10 Ko Zhan wo sɛnrɛ Yɛnŋɛlɛ làa yo wa li sɛnrɛ sɛwɛ wi ni,
ma yo fɔ:
Wele,
mi yaa na pitunŋɔ|Pitunmbolo wi torogo wa ma yɛgɛ,
wi sɔɔn kologo ki yɛngɛ ma kan.
11 Kaselege ko na,
mila ki yuun ye kan,
sɛnwee piile mbele fuun jɛɛlɛ pè se,
wa kpɛ fa yiri wa pe ni,
ŋa wi yɛn legbɔɔ ma wɛ Zhan Batisi wi na.
Ɛɛn fɔ,
wa Yɛnŋɛlɛ ca wunluwɔ pi ni,
ŋa wi yɛn pe ni fuun jɛɛ,
wo yɛn legbɔɔ ma wɛ Zhan wi na.
12 Maga lɛ wa Zhan Batisi Yɛnŋɛlɛ sɛnrɛ yowo pi na fɔ ma pan ma gbɔn nala,
paa ki ŋgbanga mbe ye wa Yɛnŋɛlɛ ca wunluwɔ pi ni,
mbele pè ŋgban ki na poro,
paa ki lagajaa mboo ta.
13 Yɛnŋɛlɛ li yɔn sɛnrɛ yofɛnnɛ poro naa Moyisi lasiri sɛwɛɛlɛ pè para Yɛnŋɛlɛ li wunluwɔ wogo ki na fɔ ma pan ma gbɔn Zhan wagati wi na.
14 Na ye mbe yɛnlɛ mbe taga na na,
yege jɛn ye yo fɔ Eli ŋa pàa wi panga ki yari,
Zhan wo lawi we.
15 Nuŋgbogolo ka pye ŋa na,
wi ke jan wila nuru.
16 «Mbe ya mbe nala pilige woolo pe taanla ambɔ ni?
Ye wele!
Pe yɛn paa piile yɛn.
Pe yɛn ma cɛn wa katogo,
nɛɛ jɔrɔgi naga yuun pe nimbiile pe kan fɔ:
17 ‹Wàa wegele win ye kan ye ta ye yɔ,
yee yɔ.
A wè kunwɔ yuuro kɔ,
yee gbele.›
18 Ko ki naga ma yo Zhan Batisi na wìla pan,
wi sila pye na yaakara kpayi kaa,
wi sila si pye na sinmɛ woo.
A pè yo fɔ yinnɛ tipele lì ye wi ni.
19 Lere wi Pinambyɔ wo kaa pan na nii na woo,
a pè sɔngɔrɔ naa ma yo fɔ:
‹Ye wele!
Ŋa wo pan ma koro na nii na woo,
ma pye nizara shɔfɛnnɛ poro naa kapere pyefɛnnɛ pe wɔnlɔ.›
Ɛɛn fɔ,
Yɛnŋɛlɛ li tijinliwɛ pe maa jɛn ma yo pì sin li kapyegele koro fanŋga na.»
Cara nda tìla je mbe logo Zhezu wi yeri
20 Kona,
Zhezu wìla wi kafɔnŋgɔlɔ ke lɛgɛrɛ pye cara nda ni,
a wi nɛɛ para ki cara ti woolo pe na,
katugu pe sila pe kapere ti jɛn mberi yaga.
Wìla pe pye fɔ:
21 «Yoro Korazɛn ca fɛnnɛ wele,
jɔlɔgɔ yɛn ye wogo!
Yoro Betisayida ca fɛnnɛ fun,
jɔlɔgɔ yɛn ye wogo!
Katugu ndɛɛ ki pye kafɔnŋgɔlɔ ŋgele kè pye wa ye yeri,
pa kè ja pye wa Tiri ca naa Sidɔn ca woolo pe yɛgɛ sɔgɔwɔ,
anmɛ kì gbɔn yɛɛn pe kashara lele pe yɛɛ na,
ma pe yɛɛ piligi wa cɔnrɔ ti ni mbege naga fɔ paa jaa mbe pe kapere pyege ki yaga.
22 Ki kala na,
mila ki yuun ye kan,
na kiti kɔnpilige kiga ka gbɔn,
Tiri ca naa Sidɔn ca woolo pe jɔlɔgɔ ki yaa ka mbɔnrɔ ye wogo ki na.
23 Yoro Kapɛrinawu ca woolo fun,
ye nawa po ni pe yaa ka ye yirige mbe gbɔn fɔ wa yɛnŋɛlɛ na wi le?
Ayoo dɛ,
pe yaa ka ye tirige fɔ wa kuulo tara;
katugu ndɛɛ ki pye kafɔnŋgɔlɔ ŋgele kè pye wa ye yeri pa ke pye wa Sodɔmu ca,
anmɛ ki ca ki wa ali ma pan ma gbɔn nala na.
24 Ki kala na,
mila ki yuun ye kan,
na kiti kɔnpilige kiga ka gbɔn,
Sodɔmu ca woolo pe jɔlɔgɔ ki yaa ka mbɔnrɔ ye wogo ki na.»
Yaa paan na kɔrɔgɔ ye wogosaga ta
25 Ki wagati wi ni,
a Zhezu wì sho naa fɔ:
«Na To,
mboro ma yɛn naayeri wo naa tara ti Fɔ.
Mila ma shari,
katugu ŋga mà lara dunruya kajɛnmbɛlɛ poro naa sɛwɛ jɛnfɛnnɛ pe na,
màga pye maga naga piile tunmɔmbɔlɔ poro na.
26 Na To mà ko pye ma,
katugu ko kɔ̀ɔn ndanla.
27 «Na To wì yaraga pyew ki le na kɛɛ.
Lere kpɛ si Pinambyɔ wi jɛn,
ndɛɛ wi To wo nuŋgba.
Lere kpɛ si To wi jɛn,
ndɛɛ Pinambyɔ wo nuŋgba,
konaa leele mbele Pinambyɔ wi yɛn na jaa mboo To wi naga pe na we.
28 «Yaa paan na kɔrɔgɔ,
yoro mbele fuun yè tugo konaa ma te ye tuguro ti ni.
Mi yaa ti laga ye go na,
mbe wogosaga kan ye yeri.
29 Yanla tunŋgo pyetige ki tugo paa falinɛrɛ yɛn.
Ye pye na fɔrɔgɔfɛnnɛ,
katugu nandanwa fɔ wi mi,
mi si yɛn pɔw.
Kiga pye ma,
pa ye yaa wogosaga ta wa ye yinwege ki ni.
30 Katugu na tunŋgo pyetige ki tugulo si ŋgban,
tuguro nda mi yaa si kan ye yeri tii nugu.»