Ma kajɛŋgɛ ki daga mbe pye ŋgundo ni
6
1 «Ye yɛɛ yingiwɛ jɛn,
yaga kaa ye shɛrɛgɛ konɔ kagala ke piin mbaa ye yɛɛ nari leele pe na.
Na ye kaa ki piin ma,
ye se ka tɔnli ta ye To ŋa wa yɛnŋɛlɛ na wi yeri.
2 «Na maga yaraga ka kan fyɔnwɔ fɔ wa yeri,
maga kaga yari paa yɛgɛ ŋga na kopiire fɛnnɛ pe maa ki piin wa shɛriyinrɛ to naa koŋgolo ke ni,
jaŋgo leele paa ma sɔnni.
Kaselege ko na,
mila ki yuun ye kan,
fɔ pè pe tɔnli wi ta makɔ.
3 Ɛɛn fɔ,
mboro wo na,
na maga yaraga ka kan fyɔnwɔ fɔ wa yeri,
ma wɔnlɔ ŋa wì mara ma na jɛŋgɛ,
maga ka ti wigi jɛn,
4 jaŋgo ma yarikanga ki koro ŋgundo.
Kona,
ma To ŋa wila ŋgundo kala na maa piin li yaan,
wo wi yaa ka tɔnli kan ma yeri.
Zhezu wìla wi fɔrɔgɔfɛnnɛ pe naga Yɛnŋɛlɛ yɛnrɛwɛ pi ni
5 «Na ye kaa Yɛnŋɛlɛ li yɛnri,
yaga kaa ki piin paa kopiire fɛnnɛ pe yɛn.
Ki yɛn ma pe ndanla paa yeregi paa Yɛnŋɛlɛ yɛnri wa shɛriyinrɛ to naa kooro filisara ti na,
leele pe ni fuun pe ta paa pe yaan.
Kaselege ko na,
mila ki yuun ye kan,
pè pe tɔnli wi ta makɔ.
6 Ɛɛn fɔ,
mboro wo na,
na ma kaa jaa mbe Yɛnŋɛlɛ yɛnri,
ye wa ma yumbyɔ yɛgɛ woo wi ni ma kɔrɔ ki tɔn ma yɛɛ na,
mɛɛ ma To wi yɛnri,
wo ŋa wi yɛn wa ki ŋgundo laga ki ni we.
Kona,
ma To ŋa wi yɛn na kala na maa piin wa larasaga li yaan,
wi yaa ka tɔnli kan ma yeri.
7 «Na ye kaa Yɛnŋɛlɛ li yɛnri sanga ŋa ni,
yaga kaa sɛnrɛ nuŋgba ti yuun mbaa sɔngɔri ti na tetete go fu,
paa yɛgɛ ŋga na mbele pee Yɛnŋɛlɛ jɛn pe maa ki piin we.
Pe maa ki jate ndɛɛ paa yɛnri na sɛnlɛgɛrɛ nda yuun,
to ti yaa ti Yɛnŋɛlɛ lii pe yɛnrɛwɛ pi logo.
8 Yaga ka pye paa pe yɛn,
katugu yè jori yaara nda na,
ye To wi mari jɛn,
na ye fari yɛnri wi yeri gbɛn.
9 Anmɛ ye daga mbaa Yɛnŋɛlɛ li yɛnri,
fɔ:
We To ŋa wa yɛnŋɛlɛ na,
ti ma mɛgɛ ki pye kpoyi.
10 Ma wunluwɔ pi pye pi pan!
Ma nandanwa kala lo mbaa piin laga tara na,
paa yɛgɛ ŋga na li yɛn na piin wa yɛnŋɛlɛ na we!
11 Ma we nala yaakara ti kan we yeri!
12 Ma we kapere ti kala yaga we na,
paa yɛgɛ ŋga na mbele paa ti piin we na,
woro fun we maa ti kala yari pe na we.
13 Maga ka we yaga we ye wa fanlawa pi ni.
Ɛɛn fɔ,
ma we shɔ Sɔtanla wi kɛɛ.
[Katugu wunluwɔ naa yawa naa gbɔgɔwɔ pi yɛn ma woo fɔ sanga pyew.
Anmiina.]
14 «Mbele fuun pè kapere pye ye na,
na yaga pe kapere ti kala yaga pe na,
pa ye To ŋa wa yɛnŋɛlɛ na wi yaa ye woro ti kala yaga ye na fun.
15 Ɛɛn fɔ,
mbele fuun pè kapere pye ye na,
na yee pe woro ti kala yaga pe na,
pa ye To ŋa wa yɛnŋɛlɛ na,
wi se ye woro ti kala yaga ye na fun.
Yeŋge lege sɛnrɛ
16 «Na yaga pye yeŋge pilige ŋga ni,
yaga ka ye yɛgɛ ki san paa yɛgɛ ŋga na kopiire fɛnnɛ pe maa ki piin we.
Pe ma pe yɛgɛ cɛnwɛ pi kanŋga,
leele pe ni fuun pe ta pege jɛn pe yɛn yeŋge.
Kaselege ko na,
mila ki yuun naga finligi ye kan,
pe pe tɔnli wi ta makɔ.
17 Ɛɛn fɔ,
mboro wo na,
na maga pye yeŋge pilige ŋga ni,
mɔɔ yɛgɛ ki jogo,
ma latikɔrɔ nuwɔ taan gbɔn ma go ki na,
18 jaŋgo leele paga kaga jɛn ma yɛn yeŋge,
ndɛɛ ma To ŋa wi yɛn wa ki ŋgundo laga ki ni,
wo nuŋgba.
Kona,
ma To ŋa wila ŋgundo kala na maa piin li yaan,
wo wi yaa ka tɔnli kan ma yeri.
Yarijɛndɛ nda wa yɛnŋɛlɛ na ti sɛnrɛ
19 «Yaga kaa yarijɛndɛ gbogolo ye yɛɛ kan laga dunruya ŋa wi ni.
Yaawere mari jɔgɔ laga,
so ma ye ti ni mberi jɔgɔ.
Yoolo fun pe ma kɔrɔ ki kaw mari yu.
20 Ɛɛn fɔ,
yaa yarijɛndɛ gbogolo ye yɛɛ kan wa yɛnŋɛlɛ na.
Wa ki laga ki na,
yaawere se ya mberi jɔgɔ,
so se ya ye ti ni mberi jɔgɔ.
Yoolo fun pe se ya mbe kɔrɔ ki kaw mberi yu.
21 Katugu ma yarijɛndɛ tiga pye laga ŋga na,
pa ma jatere wi ma pye wa.
Wire ti yanwa kala
22 «Lere wi yɛngɛlɛ koro ke yɛn wi wire ti fitanla we.
Na ma yɛngɛlɛ kaga pye jɛŋgɛlɛ,
ma wire ti lombondo ti ma pye wa yanwa pi ni.
23 Ɛɛn fɔ,
na ma yɛngɛlɛ ke woro jɛŋgɛlɛ,
ma wire ti lombondo ti ma pye wa wɔwɔ pi ni.
Ki kala na,
yanwa mba pi yɛn ma ni,
na piga pye mbe wɔ,
ki wɔwɔ pi yaa pye mbe gbɔgɔ dɛ.
Yɛnŋɛlɛ, nakoma penjara
24 «Lere se ya tunŋgo pye teele shyɛn kan;
katugu wi ma kaa nuŋgba panra,
sanŋa wo maa ndanla.
Nakoma wi ma kaa mara nuŋgba na,
ma laga sanŋa wi na.
Ye se ya tunŋgo pye wagati nuŋgba wi ni Yɛnŋɛlɛ lo naa penjara ti kan.
Ye ye jigi wi taga Yɛnŋɛlɛ li na
25 «Ko kala kì ti mila ki yuun ye kan fɔ:
Yaga kaa ye jatere wi lege ye yɛɛ na yaakara nda ye yaa la kaa to kanŋgɔlɔ,
mbe yo fɔ:
‹Ŋga yiŋgi mi yaa ka mbe yiŋgi wɔ?›
Yaga si kaa ye jatere wi lege ye yɛɛ na ye yaripɔrɔ wogo ki na mbe yo fɔ:
‹Ŋga yiŋgi yaripɔrɔ mi yaa le?›
Yinwege kii wɛ yaakara ti na wi le?
Wire tii wɛ paara ti na wi le?
26 Ye sannjɛrɛ ti wele wa naayeri!
Tila yarilire lugu,
tila yarilire kɔlɔgi.
Tila si yarilire gbogolo mberi le bondoolo.
Ma si yala,
ye To ŋa wa yɛnŋɛlɛ na,
wi maa ti baro.
Yee mbɔnrɔ sannjɛrɛ ti na jɛŋgɛ wi le?
27 Ye ni wiwiin wi mbe ya mbe yinwege ka taga wi yɛɛ kan naa jɛnri,
wi jatere lɛgɛrɛ ti ni?
28 «Yaga kaa ye jatere wi lege ye yɛɛ na ye yaripɔrɔ wogo ki na.
Ye yarifyɛɛnrɛ ti yirilɔmɔ pi wele wa wasele!
Tila tunŋgo pye,
tila si pili.
29 Ma si yala,
mila ki yuun ye kan,
wunlunaŋa Salomɔ wo naa wi yarijɛndɛ lɛgɛrɛ tawa pi ni fuun ni,
wi yaripɔrɔ ka sila yɔn mbe yarifyɛɛnrɛ ka tiyɔnwɔ bɔ.
30 Yan ŋga ki ma fi nala wa wasele,
goto kasɔn ma kaa ki sogo,
na Yɛnŋɛlɛ li ma ko fere ma,
yoro fun ye daga mbege jɛn mbe yo Yɛnŋɛlɛ li yaa ye yaripɔrɔ ti kan ye yeri fun mbe wɛ ki na.
Ye tagawa pì kologo!
31 «Yaga kaa ye jatere wi lege ye yɛɛ na mbaa yuun fɔ:
‹Ŋga yiŋgi we yaa ka?
Nakoma yiŋgi we yaa wɔ?
Mbe yo fɔ we yaa yaripɔrɔ to ta se siri le?›
32 Mbele pee Yɛnŋɛlɛ jɛn,
poro pe maa ko yaara nda to ti ni fuun to lagajaa suyi.
Ɛɛn fɔ,
yoro wo na,
ye To ŋa wa yɛnŋɛlɛ na,
wìgi jɛn ma yo ti kala yɛn ye na.
33 Ki kala na,
ye bala yaa Yɛnŋɛlɛ li wunluwɔ po naa li kasinŋge ko lagajaa gbɛn.
Pa kona li yaa yaara sannda pyew ti kan ye yeri fun.
34 Yaga ka ye jatere wi piri goto kagala ŋgele ke yaa pan koro kala na.
Goto naa wi jatere lɛgɛrɛ kala li.
Jorowo mba pi ma pan pilige nuŋgba ki ni,
pi ma yala ki pilige ki ni.