13
1 «Ko pilige ko ni, pulugo tɔnmɔ pa yaa ka janri mbe yiri mbe Davidi setirige piile naa Zheruzalɛmu ca woolo pe kapere naa pe fyɔngɔ kapyere ti jogo mberi laga pe na.»
We Fɔ wi yaa ka yarisunndo ti kɔ mberi wɔ wa, mbe Yɛnŋɛlɛ yɔn sɛnrɛ yofɛnnɛ yagboyoolo pe purɔ
2 Yawe Yɛnŋɛlɛ na yawa pi ni fuun fɔ, pa lì yo yɛɛn fɔ: «Ko pilige ko ni, mi yaa ka yarisunndo ti kɔ mberi wɔ laga tara ti ni, lere se ka nawa to ti na naa. Mbele pe maa pe yɛɛ piin Yɛnŋɛlɛ yɔn sɛnrɛ yofɛnnɛ, mi yaa ka pe kɔ mbe pe wɔ laga tara ti ni, mbe mbele yarisunndo gbɔgɔla jatere yɛn pe ni wi kɔ mboo wɔ pe ni. 3 Na lere wa ka ka pan mbaa Yɛnŋɛlɛ yɔn sɛnrɛ yuun bere, wi tosee naa wi nɔsee poro yɛrɛ pe yaa wi pye mbe yo fɔ: ‹Ma daga mbe ku, katugu ma yɛn na yagbogowo sɛnrɛ yuun Yawe Yɛnŋɛlɛ li mɛgɛ ki na.› Mboo ta wi yɛn na Yɛnŋɛlɛ li yɔn sɛnrɛ yuun, wi tosee naa wi nɔsee wi ni, pe yaa wi sun njanraga ni mboo gbo. 4 Ko pilige ko ni, Yɛnŋɛlɛ yɔn sɛnrɛ yofɛnnɛ pe yaa kaa fɛrɛ taa mbaa Yɛnŋɛlɛ li yɔn sɛnrɛ yuun, mbaa pe yariyanra ti sɛnrɛ yuun. Pe se kaa yɔngɔmɛ sire yaripɔrɔ nii naa, mbaa leele pe fanla mbaa pe yɛɛ piin Yɛnŋɛlɛ yɔn sɛnrɛ yofɛnnɛ. 5 Pe ni fuun nuŋgba nuŋgba pe yaa kaa yuun fɔ: ‹Mi woro Yɛnŋɛlɛ yɔn sɛnrɛ yofɔ dɛ, kɛrɛ kɔnfɔ wi mi. Maga lɛ wa na lefɔnrɔ sanga wi ni, na tafɔ wìlan lɔ kɛrɛ tunŋgo ko mɛgɛ ni.› 6 Na lere wa kaa yewe mbe yo fɔ: ‹Yiŋgi sagbantitɛrɛ ti yɛn ma kotogo ki na yɛɛn?› Wi yaa ki fɔ wi yɔn sogo mbe yo fɔ: ‹Pa pànla gbɔn wa na wɛnnɛ pe go.› »
Ŋga ki yaa ka pye simbaala kɔnrifɔ wo naa simbaala pe na
7 Yawe Yɛnŋɛlɛ na yawa pi ni fuun fɔ, pa lì yo yɛɛn fɔ:
«Tokobi, yiri ma to na simbaala kɔnrifɔ wi na,
yiri ma to na pinlɛyɛnlɛ wi na.
Simbaala kɔnrifɔ wi gbɔn maa gbo pa kona simbaala pe yaa gbɔn mbe jaraga.
Pa mi yaa to simbapiile pe na
8 Pa Yawe Yɛnŋɛlɛ lì yo yɛɛn fɔ:
«Wa tara ti ni fuun ti ni, sɛnweele paga kɔn mbe yiri tɛgɛsaga taanri, tɛgɛsaga shyɛn woolo poro yaa ku,
tɛgɛsaga nuŋgba woolo pe yaa koro go na.
9 Mi yaa ki tɛgɛsaga nuŋgba woolo pe pye kpoyi,
paa yɛgɛ ŋga na pe ma kaa warifuwe wi le kasɔn maa pye kpoyi,
mbe pe sɛgɛsɛgɛ mbe wele, paa yɛgɛ ŋga na pe ma kaa tɛ wi le kasɔn mboo sɛgɛsɛgɛ mboo wele.
Pa kona pe yaa na yeri,
pa mi yaa pe yɔn sogo.
Mi yaa ka pe pye mbe yo fɔ: ‹Ye yɛn na woolo!›
Pa poro fun pe yaa yo fɔ: ‹Yawe Yɛnŋɛlɛ lo li yɛn we Yɛnŋɛlɛ le.› »