Yɛnŋɛlɛ li yɛn na jaa li woolo pe pe kapere ti jɛn peri yaga
2
1 Yoro mbele cɛnlɛ na li woolo pe yɛn fɛrɛmbandaala,
ye ye yɛɛ gbogolo laga nuŋgba, ye jatere pye ye yɛɛ wogo ki na;
2 sanni ŋga kì kɔn ma tɛgɛ ki sa ki yɛɛ yɔn fili,
sanni pe sa ye pɛ pe ye wɔ wa, paa yɛgɛ ŋga na tifɛlɛgɛ ma kaa yan waga pɛ we;
sanni Yawe Yɛnŋɛlɛ li naŋgbanwa gbɔɔ kala li sa to ye na,
sanni Yawe Yɛnŋɛlɛ li naŋgbanwa pilige ki sa gbɔn ye na.
3 Yoro mbele fuun ye yɛn ma ye yɛɛ tirige laga tara ti ni,
yoro mbele ye yɛn na tanri we Fɔ wi kakɔnndɛgɛŋgɛlɛ ke na,
yaa Yawe Yɛnŋɛlɛ li lagajaa.
Yaa kasinŋge piin,
ye ye yɛɛ tirige li yɛgɛ sɔgɔwɔ.
Kana ye yaa larasaga ta, na Yawe Yɛnŋɛlɛ li naŋgbanwa pilige ki ka ka gbɔn we.
Tara nda wa Izirayɛli tara ti yɔnlɔ tosaga kɛɛ yeri, jɔlɔgɔ yaa to ti woolo pe na
4 Gaza ca ki yaa ka koro waga,
Asikalɔn ca ki yaa ka tɔngɔ.
Pe yaa ka Asidɔdi ca woolo pe purɔ yɔnlɔ ŋgbanga na,
pe yaa ka Ekirɔn ca woolo pe purɔ mbe pe yirige pew.
5 Jɔlɔgɔ yɛn ye wogo, yoro mbele ye yɛn ma cɛn wa kɔgɔje yɔn tara ti ni,
yoro Kɛrɛti tara fɛnnɛ cɛnlɛ le!
Kana tara, to nda ti yɛn Filisiti tara fɛnnɛ pe tara,
Yawe Yɛnŋɛlɛ lì kiti kɔnsɛnrɛ yo ma wa ye na, ma yo fɔ:
«Mi yaa ye tɔngɔ,
ali lere kpɛ wo se ka koro wa ye ni»
6 Kɔgɔje yɔn tara ti yaa ka pye naniwɛ,
ti yaa ka pye yaayoro kɔnrifɛnnɛ pe yanrisara,
ti yaa ka pye yaayoro jasaala kansara.
7 Ki kɔgɔje yɔn tara ti yaa ka pye Zhuda tara woolo mbele pe yaa ka koro go na poro woro;
ti yaa ka pye pe yaayoro ti kɔnrisara.
Yembinɛ ka wɔ, pe yaa pan mbe sinlɛ wa Asikalɔn ca yinrɛ ti ni;
katugu Yawe Yɛnŋɛlɛ, pe Yɛnŋɛlɛ li yaa kagbaraga pye pe kan,
mbe pe cɛnlɔmɔ pi kanŋga.
Tara nda ti yɛn wa Izirayɛli tara ti yɔnlɔ yirisaga kɛɛ yeri, jɔlɔgɔ yaa to ti woolo pe na
8 Yawe Yɛnŋɛlɛ lì yo fɔ:
«Mowabu cɛnlɛ woolo pànla woolo pe tɛgɛlɛ sɛnrɛ nda ni, mìri logo;
Amɔ cɛnlɛ woolo pànla woolo pe tifaga sɛnrɛ nda ni, mìri logo fun.
Pànla woolo pe tifaga ma pe tara kɔngɔlɔ ke kanŋga
ma pe woro ti gbɔgɔ.
9 Ki kala na, Yawe Yɛnŋɛlɛ na yawa pi ni fuun fɔ, naa yinwege wolo,
Izirayɛli woolo Yɛnŋɛlɛ le, lì wugu li mɛgɛ ki na fɔ:
Mowabu cɛnlɛ woolo pe yaa ka tɔngɔ paa Sodɔmu ca ki yɛn,
Amɔ cɛnlɛ woolo pe yaa ka tɔngɔ paa Gomɔri ca ki yɛn.
Yan pege ki yaa ka fi wa pe tara ti lagapyew,
kɔ wi yaa ka pe tara ti tɔn muŋga fɔ sanga pyew.
Na woolo mbele pe yaa ka koro go na, pe yaa ka pan mbe pe san mbe pe yaara ti koli;
na cɛnlɛ woolo mbele pe yaa ka koro yinwege na, pe yaa ka pe tara ti shɔ mberi ta.»
10 Ko yaa ka pye Mowabu cɛnlɛ naa Amɔ cɛnlɛ woolo pe na pe yɛɛ gbɔgɔwɔ pi kala na,
katugu Yawe Yɛnŋɛlɛ na yawa pi ni fuun fɔ, pèli woolo pe tɛgɛlɛ,
ma pe yɛɛ gbɔgɔ pe na.
11 Yawe Yɛnŋɛlɛ li yaa ka fyɛrɛ gbɔrɔ wa pe na,
katugu li yaa ka yarisunndo nda fuun ti yɛn laga tara ti ni ti tɔngɔ mberi wɔ wa.
Kona, cɛngɛlɛ ke ni fuun nuŋgba nuŋgba ke yaa ka koro wa ke yɛɛra tara ti ni, mbaa fɔli li yɛgɛ sɔgɔwɔ mbaa li gbogo,
ali cɛngɛlɛ ŋgele ke yɛn ma cɛn wa lɔgɔ furo ti na, wa kɔgɔje wi nandogomɔ.
Tara nda ti yɛn wa Izirayɛli tara ti yɔnlɔparawa kalige kɛɛ naa kamɛŋgɛ kɛɛ yeri jɔlɔgɔ yaa to ti woolo pe na
12 Yoro Etiyopi tara fɛnnɛ, mi yaa ye furugu na tokobi wi ni.
13 Tara nda wa Izirayɛli tara ti yɔnlɔparawa kamɛŋgɛ kɛɛ yeri, Yawe Yɛnŋɛlɛ li yaa yiri ti woolo pe kɔrɔgɔ,
li yaa Asiri tara ti tɔngɔ.
Li yaa Ninive ca ki jɔgɔ mbege yaga waga,
mbege pye laga ŋga tɔnmɔ woro wa paa gbinri yɛn.
14 Yaayoro ŋgbeleye yi yaa ka saa sinlɛlɛ wa ca ki nandogomɔ,
konaa yan kara ti cɛnlɛ pyew ti ni.
Lɔgɔ sumbyɔ wo naa njuguni wi ni, pe yaa ka saa sinlɛlɛ wa yinrɛ ti tiyagala ke gona tɔnyaara ti na.
Pe yaa kaa sannjɛrɛ ti gbeere nuru wa fenɛtiriye pe na.
Jɔgɔwɔ pi yaa lɛ le yinrɛ ti yeyɔnrɔ ti na,
pàa yinrɛ ti kankan sɛdiri tire nda ni, pe yaa kari tilele mberi wɔ wa, mberi wa wa funwa na.
15 Ki ca ŋga ki woolo pàa pye na yɔgɔri,
ko ŋga ki woolo pàa pye naga yaan ndɛɛ pe yɛn ma cɛn yɛyinŋge na pɔw,
a paa pe yɛɛ piin fɔ: «We yɔngɔ woro wa!»
Wele, ko kì tɔngɔ ma jɔgɔ yɛɛn, ma pye yan kara ti larasaga.
Lere o lere ka toro le ki tanla,
wi ma wofele win ma kɛɛ naga ki na, naga tifaga.