Yɛnŋɛlɛ yɔn sɛnrɛ yofɔ wìla Yɛnŋɛlɛ li yɛnri
3
1 Yɛnŋɛlɛ yɔn sɛnrɛ yofɔ Abakuki wìla yɛnrɛwɛ mba yɛnri ma yuŋgbɔgɔrɔ sɛnrɛ nda yo, tori nda yɛɛn.
2 E, Yawe Yɛnŋɛlɛ, mɔ̀ɔ kala li sɛnrɛ logo.
Ma kapyege ki fyɛrɛ leŋge na ni, Yawe Yɛnŋɛlɛ.
Ma kapyegele ke pye ma ke yɔn fili naa, we nala sɔnlɔ ŋga ki na.
Ki yaga pe ke jɛn we nala sɔnlɔ ŋga ki na.
Ɛɛn fɔ wa ma naŋgbanwa gbɔɔ pi ni we ni, ma nawa to, ma we yinriwɛ ta.
3 Yɛnŋɛlɛ li yaa yiri wa Tema tara mbe pan,
Yɛnŋɛlɛ na kpoyi li yaa yiri wa Paran tara yanwira ti na mbe pan. Wɔnmatigiwɛn laga
Li gbɔgɔwɔ yanwa pì naayeri wi yin.
Pe yɛn nali sɔnni tara ti lagapyew.
4 Li yɛn na paan na yɛngɛlɛ paa yanwa yɛn.
Yanwa pi yɛn na janri na yinrigi wa li kɛɛ.
Pa li fanŋga ki yɛn ma lara wa.
5 Tifɛlɛgɛ yama pi yɛn na tuun tara ti na wa li yɛgɛ,
yambewe pi yɛn na tuun tara ti na wa li puŋgo na.
6 Na li ka yere, tara ti ma yɛgɛ.
Na li ka welewele, cɛngɛlɛ ke ma fyɛ na seri.
Yanwira nda ti yɛn wa, maga lɛ wa fafafa, ti ma jɛɛnri.
Tinndiye mbele pe yɛn wa, maga lɛ wa wagati titɔnlɔwɔ ni, pe ma toori,
poro mbele pàa pye faa li konɔ le.
7 Mì Kushan tara paara yinrɛ woolo pe yan paa jɔlɔ;
Madiyan tara paara yinrɛ woolo pe yɛn na seri fyɛrɛ ti kala na.
8 E, Yawe Yɛnŋɛlɛ, naa mà lugu ma shɔnye pe na na paan,
naa màa pye na paan ma malaga gbɔnwotoroye pe na mbe pan mbe cew ta,
maa nawa ŋgban gbaanla poro ni wi le?
Maa nawa ŋgban laforo to ni wi le?
Maa kɔnrɔ ta kɔgɔje wo ni wi le?
9 Mɔ̀ɔ sandiga ki yirige funwa na mbe wɔn.
Ma wangala koro ke yɛn wuguro sɛnrɛ nda mà yo we. Wɔnmatigiwɛn laga
Mà tara ti jɛnw maga pye gbaanla pe torosara.
10 Yanwira ti kɔɔn yan, ti maa yɛgɛ.
Tɔnmɔ lɛgɛrɛ pan na fuun.
Kɔgɔje wì tinmɛ gbɔɔ yirige,
tɔnmɔ mba pi maa yinrigi na tuun pi yɛn na yinrigi wa naayeri.
11 Yɔnlɔ konaa yeŋge ki ni, tì koro ma yere wa ti yeresaga,
ma wangala ŋgele ke yɛn na yɛngɛlɛ na kee ke kala na,
ma njanraga ŋga ki yɛn na yɛngɛlɛ ki kala na.
12 Wa ma naŋgbanwa pi ni, ma ma tara ti yanri ma toro.
Wa ma naŋgbanwa ndorogo ki ni, ma ma cɛngɛlɛ ke tɔngɔ ma toro.
13 Mà yiri mbe sɔɔn woolo pe shɔ,
mbe sa ma wunluwɔ ŋa mà wɔ wi shɔ.
Ma ma lepee wi go woolo pe yɛkelewe wi tɔngɔ maa wɔ wa;
ma maa go ki jɔgɔ pew, mbege lɛ nɔgɔna fɔ sa gbɔn wa naayeri. Wɔnmatigiwɛn laga
14 Mɔ̀ɔ juguye pe teele pe yinrɛ ti furugu pe yɛɛra wangala ke ni.
Poro mbele pe yɛn na gbinri na paan we kɔrɔgɔ paa tifɛliŋgbɔgɔ yɛn, mbe we gbɔn mbe we jaraga we.
Pe yɛn na jɔrɔgi nayinmɛ ni,
ndɛɛ leele mbele gbɛgɛlɛ mbe lere ŋa pe maa jɔlɔ wi gbo larawa.
15 Mà konɔ wɔ ma shɔnye pe kan wa kɔgɔje wi ni,
ma toro wa wi tɔnmɔ mba pi maa yinrigi na tuun fanŋga ni pi sɔgɔwɔ.
16 Mìgi tinmɛ gbɔɔ pi logo,
a na nawa pì wɔ na na.
Na yɔngbasɛɛrɛ tila seri na na fyɛrɛ ti na.
Na wire tì fanla na na,
na jegele ke fyɔ na nɔgɔ,
katugu mi daga mbe pyeri mbaa jɔlɔgɔ pilige ki singi,
ki pilige ŋga juguye pe yaa ka pan mbe to leele pe na we.
17 Ali na kaa pye figiye tire ti se ka fyɛnwɛ naa,
ɛrɛzɛn pire se ka ta wa ɛrɛzɛn tiire ti na naa,
ali na kaa pye oliviye tire ti se ka sɛ naa,
yarilire se ka ta wa kɛɛrɛ ti ni naa,
ali na kaa pye simbaala naa sikaala pe yaa ka kɔ wa jasaala pe ni,
nɛrɛ ti yaa kɔ wa naŋgbondo ti ni,
18 konaa ki ni fuun, mi wo na, mi yaa kaa yɔgɔri Yawe Yɛnŋɛlɛ li kala na.
Mi yaa kaa nayinmɛ nii na shɔfɔ Yɛnŋɛlɛ li kala na.
19 Yawe Yɛnŋɛlɛ, na Fɔ we, wo wi yɛn na fanŋga ye.
Wì ti a mì feŋge jɛn paa lufaa yɛn.
Wì ti a mila tanri na toro wa lara nda tì yaraga ti go na.
 
Yurukɔɔlɔ pe to wo yurugo yi, ŋga pàa kɔ na ŋgɔniye gbɔɔn.