2
1 Mi wo na, mi yaa koro wa na kɔrɔsiri pyesaga ki ni, mbaa kɔrɔsiri piin.
Mi yaa yere wa malaga sigembogo ki na, mbaa kɔrɔsiri piin.
Mi yaa nuŋgbolo jan mbege jɛn sɛnrɛ nda Yɛnŋɛlɛ laa jaa mbe yo na kan,
mbege jɛn li yaa na yɔn sogo yɛgɛ ŋga na na yuŋgbɔgɔrɔ sɛnrɛ ti na.
Yɛnŋɛlɛ làa li yɔn sɛnrɛ yofɔ wi yɔn sogo: Lesinŋɛ wo naa leele jɔlɔfɔ wi ni pe kala
2 Yawe Yɛnŋɛlɛ làa na yɔn sogo ma yo fɔ:
«Yariyanga ŋga mì naga ma na, ki sɛnrɛ ti yɔnlɔgɔ,
ti keregi keregi sinndɛɛrɛ papara papara na,
jaŋgo pe ya paa ti kara jɛŋgɛ.
3 Katugu ki yariyanga ki kala li yaa pye wagati ŋa wì kɔn ma tɛgɛ wo ni.
Li pyewagati wì yɔngɔ tɔɔn, yagbolo ma.
Ali na li kaa mɔni, mali sige;
katugu li yaa pye mbeli yɛɛ yɔn fili jate, ki ka kaa ma kɔɔn shyɛn.
Li pyewagati wi se mɔ
4 Wele, lere ŋa wi maa wi yɛɛ gbogo, wi woro ma sin wa wi kotogo na.
Ɛɛn fɔ lesinŋɛ wi yaa ka yinwege ta wi tagawa pi fanŋga na.
5 Kaselege ko na, penjagbɔrɔ tawa pi ma sɛnwee wi fanla maa puŋgo.
Yɛɛ gbɔgɔwɔ fɔ wila cɛn yɛw.
Wi ma pye suro kala ni paa kuulo tara ti yɛn;
wi yɛn paa kunwɔ pi yɛn, wila tin fyew.
Wi ma cɛngɛlɛ ke ni fuun ke tile mbe pan ke ni wi yɛɛ kɔrɔgɔ,
mbe leele pe ni fuun pe gbogolo wi yɛɛ tanla mbe cɛn pe go na.
 
6 Wì ya cɛngɛlɛ ŋgele ni, ke ni fuun ke yaa kaa yomiyɛlɛ waa wi na,
mbaa wi tifaga mbaa ki la koo wi na.
Pe yaa kaa yuun fɔ:
«Lere ŋa wi maa leele pe kɛɛ yaara ti koli, na yarijɛndɛ lɛgɛrɛ gbogolo wi yɛɛ kan,
jɔlɔgɔ yɛn ki fɔ wi wogo.
Leele pe yaara nda wi yɛn na koli na fɔgɔ ki gbogo wi yɛɛ go na na kee,
wi yaa ki wogo ki pye sa gbɔn fɔ wagati wiwiin?»
7 Mbele pe fɔrɔ yɛn ma na, pe yaa ka yiri ma kɔrɔgɔ mbɔɔn fo.
Mbele mà jɔlɔ, pe yaa ka yɛn mbe yiri ma kɔrɔgɔ mbɔɔn yangara.
Pe yaa kɔɔn yaara ti koli.
8 Mà cɛngɛlɛ lɛgɛrɛ yaara koli ke yeri,
ki kala na, cɛngɛlɛ ke woolo mbele pè koro go na, pe yaa kɔɔn yaara ti koli fun.
Ki kagala ke yaa pye ma na, katugu mà leele gbo,
mà lewɛlɛwɛ kapyere pye laga tara ti ni, naa ca konaa ca woolo pe na.
 
9 Lere ŋa wi maa nambara piin na tɔnli taa,
na wi go woolo pe yɔngɔ,
jɔlɔgɔ yɛn ki fɔ wi wogo!
Wi maa ki jaa mboo cɛnsaga ki tɛgɛ wa naayeri paa sere yɛn,
jaŋgo mbe shɔ jɔlɔgɔ ki kɛɛ.
10 Mà fɛrɛ wa ma go woolo pe na.
Cɛngɛlɛ lɛgɛrɛ ŋgele mà gbo ke kala na,
tipege mà pye ma yɛɛ na.
11 Katugu ca ki mbogo sinndɛɛrɛ ti yaa kaa gbele, mbaa ye nii kɛɛ,
yinrɛ ti tiyapaara tila ki shoo fun ti yɔn na.
 
12 Lere ŋa wi ma leele gbo mboo ca ki kan legbogo ki fanŋga na,
lere ŋa wi maa ca ki tɛgɛ kambasinnde pyege ki fanŋga na,
jɔlɔgɔ yɛn ki fɔ wi wogo.
13 Ki kala na, leele pe yɛn na tunŋgo ŋga piin, kasɔn yaa ki sogo,
cɛngɛlɛ ke yɛn na ke yɛɛ tege jaga.
Ko ki ni fuun ŋga ko yɛn na yinrigi Yawe Yɛnŋɛlɛ na yawa pi ni fuun fɔ lo yeri.
14 Katugu Yawe Yɛnŋɛlɛ li gbɔgɔwɔ pi yaa ka jɛn laga tara ti lagapyew ki ni,
paa yɛgɛ ŋga na tɔnmɔ pi yɛn ma kɔgɔje wi yin we.
 
15 Lere ŋa wi ma sinmɛ kan wi lewee yɛnlɛ wi yeri wuu wɔ,
jɔlɔgɔ yɛn ki fɔ wi wogo!
Mboro ŋa ma ma sinmɛ wɛlɛwɛ mba pi yɛn paa shɔnrɔ yɛn pi kanŋga ma lewee yɛnlɛ wi kan wuu wɔ,
mbe ti wila sinndire piin,
jaŋgo mbe ta mboo fɛrɛ ti yan,
jɔlɔgɔ yɛn ma wogo!
16 Mboro fun fɛrɛ ti yaa ma yigi fɔ jɛŋgɛ, ma se gbɔgɔwɔ ta.
Koni, mboro ma yaa wɔ mbe tin mbɔɔn witiwaga ki yirige funwa na.
Naŋgbanwa wɔjɛnnɛ na li yɛn wa Yawe Yɛnŋɛlɛ li kalige ki ni, li yaa ma ŋgbanga mali li wɔ.
Kona, ma gbɔgɔwɔ pi yaa kanŋga mbe pye fɛrɛ.
17 Katugu jɔgɔwɔ mba mà pye wa Liban tara,
ki fɔgɔ ki yaa tɔn ma na.
Mà woŋgaala gbo;
koni, woŋgaala pe yaa fyɛrɛ gbɔrɔ wa ma na.
Ko yaa pye ma, katugu mà leele gbo,
mà lewɛlɛwɛ kapyere pye wa tara ti ni, naa ca konaa ca woolo pe na.
18 Yaraga yanlɛgɛ ŋga kapyɔ jɛnfɔ wi ma tɛ yarisunŋgo, ki mbe ya yiŋgi yɔn?
Nakoma yarisunndo nda pe ma tugurɔn yan mberi gbegele, to nda ti maa leele pe nari yagbogolo ni, ti mbe ya yiŋgi yɔn?
Kapyɔ jɛnfɔ ŋa wi ma ki yarisunndo nda ti se ya para ti gbegele,
wi mbe ya mboo jigi wi taga ti na mɛlɛ?
 
19 Lere ŋa wi ma tige ŋga pè tɛ yarisunŋgo ki pye fɔ: «Yiri,»
lere ŋa wi ma sinndɛlɛgɛ ŋga pè tɛ yarisunŋgo ki pye fɔ: «Yɛn ma yiri,»
jɔlɔgɔ yɛn ki fɔ wi wogo!
Yarisunŋgo ki mbe ya yiŋgi nagawa kan lere yeri?
Ye wele, pe ma tɛ naa warifuwe wo ki na mbege tɔn,
ɛɛn fɔ yinwege woro ki ni.
20 Yawe Yɛnŋɛlɛ lo na, li yɛn wa li shɛrigo gbɔgɔ kpoyi ki ni.
Tara na yaara ti ni fuun ti daga mbe pyeri li yɛgɛ sɔgɔwɔ!