Kunwɔ yurugo ŋga kìla kɔ Tiri ca ki wogo na
27
1 Yawe Yɛnŋɛlɛ làa li sɛnrɛ ti kan na yeri, ma yo fɔ: 2 «Sɛnwee pyɔ, kunwɔ yurugo kɔ Tiri ca ki wogo na. 3 Maga yo Tiri ca ki kan, ko ŋga ki yɛn ma cɛn wa kɔgɔje wi yɔn na, ko ŋga ki maa safari waa cɛngɛlɛ lɛgɛrɛ ni wa lɔgɔ furo tara ti ni; maga yo fɔ, pa we Fɔ, Yawe Yɛnŋɛlɛ lì yo yɛɛn fɔ:
‹Mboro Tiri ca, màa pye naga yuun ma yo fɔ
ma tiyɔnwɔ pì pi yɛɛ yɔn fili.
4 Ma tara laga ki kɔnlɔ lì kari fɔ wa kɔgɔje wi nandogomɔ,
mbele pɔ̀ɔn kan pɔ̀ɔn kan mɔɔ yɔn jɛŋgɛ.
5 Pàa ma kan paa tɔnmɔkɔrɔ yɛn, ma Seniri yanwiga sipirɛsi tire ta tɛgɛ
mɔɔ kanŋgara na lara ti gbegele.
Tɔnmɔkɔrɔ ki gona paraga ki ma pɔ tiyala na na, Liban tara sɛdiri tige ko kayi pàa tɛgɛ mali gbegele.
6 Bazan tara tigbɔrɔ gbɔrɔ to tari pàa tɛ ma pye ma tɔnmɔkɔrɔ mbiriye.
Solo ŋgangala pè tɛgɛ mɔɔ tɔnmɔkɔrɔ nawa lara ti gbegele,
ma ke lele sɛdiri tire ta ni mari kan, nda tì yiri wa Shipiri lɔgɔ furo tara ti ni.
7 Ezhipiti tara lɛn jese paara tiyɔnrɔ nda pàa sɔgɔ to tari tìla pye tɔnmɔkɔrɔ ki gona tɔnparigbɔgɔ ye,
ma pye tɔnmɔkɔrɔ ki kacɛn yaraga.
Ŋganra paara naa kondoro paara nda tìla pye na yinrigi wa Elisha lɔgɔ fugo tara ti ni,
to tari tìla pye tɔnmɔkɔrɔ ki paritɔnŋgɔ ye.
8 Sidɔn ca naa Arivadi ca fɛnnɛ poro pàa pye ma tɔnmɔkɔrɔ fevɛnnɛ wele;
mboro Tiri ca, ma tɔnmɔkɔrɔ jɛnfɛnnɛ jɛmbɛlɛ wele, poro pàa pye ma tɔnmɔkɔrɔ tunmbyeele wele.
9 Gebali ca lelɛɛlɛ naa ki kapyɔ jɛnfɛnnɛ pàa pye wa ma yeri,
ma pye ma tɔnmɔkɔrɔ jɔgɔsara ti gbegelefɛnnɛ.
Kɔgɔje tɔnmɔkɔɔrɔ ti ni fuun naa ti nawa tunmbyeele pe ni, pàa pye na paan wa ma yeri na safari waa ma ni.›
10 Pɛrisi tara fɛnnɛ, naa Ludi tara fɛnnɛ konaa Puti tara fɛnnɛ poro pàa pye ma maliŋgbɔɔnlɔ ŋgbelege ye.
Poro pàa pye ma maliŋgbɔɔnlɔ wele.
Pàa pye na pe tugurɔn sigeyaara konaa pe tugurɔn njagala ke yanŋgi wa ca nawa,
poro pàa ma mɛgɛ ki yirige.
11 Arivadi ca lenambala poro nɔɔ maliŋgbɔɔnlɔ pe ni, pàa pye na ca ki mbogo ki kɔrɔsi.
Gamadi ca fɛnnɛ poro pàa pye na sanŋgazoye pe kɔrɔsi.
Pàa pye na pe tugurɔn sigeyaara ti yanŋgi wa ca ki mbogo ki na naga mari,
pàa ma fere mɔɔ tiyɔnwɔ pi yɔn fili.
Tiri ca, ko ŋga kìla pye jawo pyecagbɔgɔ
12 «Tarisisi ca fɛnnɛ pàa pye na safari waa wa ma ni, katugu yarijɛndɛ lɛgɛrɛ la pye wa ma yeri. Pàa pye na loo ma yeri warifuwe, naa tugurɔn, naa tuguvire konaa sunmu ni. 13 Yavan tara woolo, naa Tubali tara woolo konaa Meshɛki tara woolo pàa pye na safari waa wa ma ni. Pàa pye na kulolo naa tuguyɛnrɛ yaara sunru ma yeri ma yaripɛɛrɛ ti na. 14 Bɛti Togarima ca woolo pàa pye na shɔnye mbele pe maa wotoroye tilele, naa malaga gbɔnshɔnye konaa sofilele worosoye sunru ma yeri ma yaripɛɛrɛ ti na. 15 Dedan ca woolo pàa pye na safari waa wa ma ni. Lɔgɔ furo tara lɛgɛrɛ woolo la pye na loo ma yeri; pàa pye nɔɔ sara solo ŋgangala konaa ebɛni tire ni. 16 Siri tara fɛnnɛ pàa pye na safari waa wa ma ni, katugu yaripɛɛrɛ lɛgɛrɛ la pye ma yeri. Pàa pye na paan ɛsikaribukili sinndɛɛrɛ sɔnŋgbanga woro ni, naa kondoro paara tiyɔnrɔ ni, naa paara nda pè sɔgɔ, naa lɛn jese paara, naa korayi sinndɛɛrɛ sɔnŋgbanga woro konaa urubisi sinndɛɛrɛ sɔnŋgbanga woro ni nari sunru ma yeri ma yaara ti na. 17 Zhuda tara woolo naa Izirayɛli woolo pàa pye na safari waa wa ma ni; pàa pye na paan Miniti ca bile tiyɔɔn ni, naa shɔgɔlɔ, naa sɛnrɛgɛ, naa sinmɛ konaa sinmɛ fawoo ni nari sunru ma yeri ma yaripɛɛrɛ ti na. 18 Damasi ca woolo pàa pye na safari waa wa ma ni, katugu yaripɛɛrɛ la pye ma yeri. Ma yarijɛndɛ tìla pye ma lɛgɛ fɔ jɛŋgɛ. Pàa pye na paan Hɛlibɔn ca duvɛn ni, naa Zahari ca simbasifire ni nari sunru ma yeri ma yarijɛndɛ ti na. 19 Vedan tara fɛnnɛ naa Yavan tara fɛnnɛ, ma yiri wa Uzali ca, pàa pye na paan tugurɔn nda pè gbɔn ta ni, naa kasi timuwɛ nuwɔ taan ni konaa gbagara kanŋgirɛ nuwɔ taan woro ni nari sunru ma yeri ma yaripɛɛrɛ ti na. 20 Dedan ca fɛnnɛ pàa pye na paan paara liire tiyɔnrɔ ni nari sunru ma yeri, to ti yɛn paara nda pe ma taga wa shɔn wi pɔgɔlɔ ma cɛn ti na. 21 Larabu tara fɛnnɛ naa Kedari tara teele pàa pye na safari waa wa ma ni; pàa pye na paan simbapɛnɛ yirifɔnmbɔlɔ, naa simbapɛnɛ lɛɛlɛ ni konaa sikapɛnɛ ni na pɛrɛ ma yeri. 22 Saba tara safari wafɛnnɛ, naa Arayema tara fɛnnɛ pe ni, pàa pye na paan na safari waa wa ma ni. Pàa pye na paan nuwɔ taanyaara jɛndɛ cɛnlɛ pyew ti ni, naa sinndɛɛrɛ sɔnŋgbanga woro ti cɛnlɛ pyew ti ni konaa tɛ ni nari sunru ma yeri ma yaripɛɛrɛ ti na. 23 Haran ca woolo, naa Kane ca woolo, naa Edɛn tara fɛnnɛ, naa Saba tara fɛnnɛ, naa Asiri tara fɛnnɛ konaa Kilimadi tara fɛnnɛ pàa pye na paan na safari waa wa ma ni. 24 Pàa pye na yaripɔrɔ tiyɔnrɔ safari waa wa ma ni; pàa pye na paan derigbɔrɔ ŋganra woro ni, naa yaripɔrɔ nda pè sɔgɔ, naa pariliire nda tì kɛnlɛgi kɛnlɛgi yɛgɛ cɛnwɛ lɛgɛrɛ na konaa maŋgala ni, ŋgele pè ti kè ŋgban. 25 Tarisisi ca tɔnmɔkɔɔrɔ tugbɔɔrɔ to tìla pye nɔɔ safari wayaara ti lee na kee ti ni.»
Kunwɔ yurugo sanŋga ŋga kìla kɔ Tiri ca ki wogo na
Mboro Tiri ca, màa pye ma yin yarijɛndɛ lɛgɛrɛ ni konaa gbɔgɔwɔ ni wa kɔgɔje wi nandogomɔ.
26 Ma tɔnmɔkɔrɔ fevɛnnɛ pàa kari ma ni lege wa kɔgɔje tɔnŋgbɔɔ pi na,
a yɔnlɔ yirisaga tifɛliŋgbɔgɔ kà si pan mɔɔ tɔnmɔkɔrɔ ki kaari wa kɔgɔje wi nandogomɔ.
27 Kì pye ma, ma yarijɛndɛ, naa ma safari wayaara, naa ma yaripɛɛrɛ,
naa ma tɔnmɔkɔrɔ nawa tunmbyeele, naa ma tɔnmɔkɔrɔ fevɛnnɛ, naa ma tɔnmɔkɔrɔ gbegelefɛnnɛ,
naa safari wafɛnnɛ, naa maliŋgbɔɔnlɔ mbele fuun pe wa ma ni,
konaa leele sanmbala mbele fuun pe yɛn wa ma ni,
pe ni fuun pe yaa tigi wa kɔgɔje wi ni ma tɔngɔpilige ki na.
28 Ma tɔnmɔkɔrɔ fevɛnnɛ pe gbeere ti kala na,
kɔgɔje yɔn tara fɛnnɛ pe yɛn na seri fyɛrɛ ti na.
29 Tɔnmɔkɔɔrɔ fevɛnnɛ pe ni fuun pe yaa ka tigi mbe yiri wa pe tɔnmɔkɔɔrɔ ti ni,
naa tɔnmɔkɔrɔ nawa tunmbyeele poro naa tɔnmɔkɔrɔ fevɛnnɛ pe ni fuun pe ni.
Pe yaa ka sa yere wa lɔgɔ koŋgo ki na.
30 Pe yaa ka pe magaŋgala ke yirige mbaa gbele ma kala na,
pe nawa pi yaa ka tanga pe na paa gbele fɔ jɛŋgɛ.
Pe yaa kaa gbanŋgban wi koli mbaa wi wuun wa pe yɛɛra yinrɛ ti na,
mbe to mbaa koŋgi wa cɔnrɔ ti ni jatere piriwɛn pi kala na.
31 Pe yaa ka pe yinrɛ ti kulu jatere piriwɛn pi na ye kala na,
mbe jatere piriwɛn yaripɔrɔ le pe yɛɛ na.
Pe yaa kaa gbele yɛsanga ni ma kala na,
pe yaa kaa gbele nandangawa ni.
32 Wa pe kayaŋga ki ni, pe yaa kaa kunwɔ yurugo koo ma kala na.
Pe yaa kaa ki yuŋgbɔgɔrɔ yurugo ŋga ki koo fɔ:
«Ca kikiin kìla yɔn paa Tiri ca ki yɛn?
Tiri ca ŋga ki yɔngɔ woro, ko pè tɔngɔ wa kɔgɔje wi nandogomɔ yɛɛn gbari?
33 Sanga ŋa ni pàa pye nɔɔ safari wayaara ti lee na kee ti ni kɔgɔje wi na,
màa cɛngɛlɛ lɛgɛrɛ yɛnlɛ tin yaara ni.
Màa tara na wunlumbolo pe pye penjagbɔrɔ fɛnnɛ
ma yarijɛndɛ to naa ma yaripɛɛrɛ ti fanŋga na.
34 Koni naa kɔgɔje tɔnmɔ mba pi maa yinrigi na tuun pɔ̀ɔn kaari,
mɔɔ tirige wa kɔgɔje wi latijugo ki ni.
Ma yaripɛɛrɛ to naa janwa ŋa fuun wi yɛn ma ni,
pè pinlɛ ma ni ma tigi wa.
35 Lɔgɔ furo tara fɛnnɛ pe ni fuun pe jigi wì kɔn pe na ma kala na,
sunndo kɔngɔ pe wunlumbolo pe ta,
a pè yɛrɛ cɛnwɛ pì kanŋga pe na fyɛrɛ ti na.
36 Ma kala lì to cɛngɛlɛ ke safari wafɛnnɛ pe yɔn na,
fɔ pe yɛn na wofegele wiin ma kala na;
katugu ma kala lì pye sunndo kɔngɔ kala,
mà kɔ ma wɔ pew.»