Yɛnŋɛlɛ yɔn sɛnrɛ nda tìla yo Amɔ cɛnlɛ woolo pe wogo na
49
1 Sɛnrɛ nda tìla yo Amɔ cɛnlɛ woolo pe wogo na.
Pa Yawe Yɛnŋɛlɛ lì yo yɛɛn fɔ:
«Naga yɛn ma, pinambyɔ woro Izirayɛli wi yeri wi le?
Naga yɛn ma, kɔrɔgɔ lifɔ woro wi yeri wi le?
Yiŋgi na, a yarisunŋgo Milikɔmu ki gbɔgɔfɛnnɛ pè si pan ma Gadi tara ti shɔ?
Yiŋgi na, a Amɔ cɛnlɛ woolo pè si pan ma cɛn wa Gadi tara cara ti ni?»
2 Yawe Yɛnŋɛlɛ lo lì yo ma fɔ: «Ki kala na, ye wele, piliye ya yɛn wa na paan,
mi yaa ka ti paa malaga kɔŋgɔlɔ nuru Amɔ cɛnlɛ woolo pe cagbɔgɔ Araba ki mɛgɛ ni.
Ki yaa ka pye kataga mbe koro waga,
ki kanŋgaga na kapire ti yaa ka sogo kasɔn ni.
Pa kona mbele pàa Izirayɛli woolo pe tara ti shɔ pe yeri,
Izirayɛli woolo pe yaa sari shɔ pe yeri fun.»
Yawe Yɛnŋɛlɛ lo lì yo ma.
 
3 «Ɛshibɔn ca woolo yaa gbele, katugu pè Ayi ca ki jɔgɔ!
Araba ca woolo, yaa jɔrɔgi,
ye jatere piriwɛn yaripɔrɔ le;
yaa fee yaa tooro tooro yaa ca ki mbogo ki mari.
Katugu pe yaa ka yarisunŋgo Milikɔmu ki yigi mbe kari ki ni kulowo ni,
naa ki saraga wɔfɛnnɛ konaa ki tara teele pe ni.
4 Yoro mbele yè yiri ma je, yiŋgi na ye nɛɛ ye yɛɛ gbogo ye gbunlundɛrɛ ti kala na,
ye gbunlundɛrɛ tara tanra ti kala na?
Yè ye jigi wi taga ye yarijɛndɛ ti na ma yo fɔ:
‹Ambɔ wi mbe ya pan mbe to we na?›
5 Ye wele, mi yaa sunndo kɔngɔ wa ye na;
we Fɔ, Yawe Yɛnŋɛlɛ na yawa pi ni fuun fɔ, lo lì yo ma.
Ki sunndo kɔngɔ ki yaa pan mbe yiri ye kɛɛ ki ni fuun ki na;
pe yaa ka ye ni fuun nuŋgba nuŋgba ye purɔ, ye yaa ka kari ye yɛ ye yɛ ye karisara.
Lere kpɛ se ka ta mbe mbele paa fee pe gbogolo.
6 Ɛɛn fɔ ko puŋgo na, mi yaa ka sɔngɔrɔ mbe Amɔ cɛnlɛ woolo pe tɛgɛ wa pe cɛnsaga koŋgbanŋga ki ni.» Yawe Yɛnŋɛlɛ lo lì yo ma.
Yɛnŋɛlɛ yɔn sɛnrɛ nda tìla yo Edɔmu cɛnlɛ woolo pe wogo na
7 Sɛnrɛ nda tìla yo Edɔmu tara ti wogo na.
Yawe Yɛnŋɛlɛ na yawa pi ni fuun fɔ, pa lì yo yɛɛn fɔ:
«Naga yɛn ma, kajɛnŋɛ woro wa Tema tara ti ni naa wi le?
Naga yɛn ma, yɛrifɛnnɛ pe yɛrɛwɛ jɛmbɛ pi kɔ wi le?
Tijinliwɛ fɛnnɛ pe tijinliwɛ pi kɔ wi le?
8 Yoro Dedan ca fɛnnɛ, ye puŋgo le yaa fee,
ye kari ye sa lara fɔ wa yanwira were ti nawa!
Katugu mi yaa Ezawu setirige piile pe tɔngɔ,
ko wagati wo mi yaa pe kapere ti fɔgɔ tɔn pe na.
9 Na ɛrɛzɛn pire cɔfɛnnɛ pele ka pan wa ye yeri,
ali ɛrɛzɛn pile nuŋgba pe se ka lo toro pe yɛɛ puŋgo na.
Na yoolo paga pan wa ye yeri yembinɛ,
yaraga ŋga fuun ka pe ndanla, ko pe yaa lɛ.
10 Ɛɛn fɔ mi wo na, mi yaa Ezawu setirige piile pe gbori mbe pe kɛɛ ki yaga waga;
mi yaa pe larasara ti yirige funwa na,
pe se ka ya lara naa.
Pe setirige piile, naa pe sefɛnnɛ konaa pe cɛnyɛɛnlɛ pe ni, pe yaa ka tɔngɔ,
wa kpɛ se ka koro pe ni, ŋa wi yaa yo fɔ:
11 ‹Yaga kaa ye pijiriwele poro wogo ko gbele,
muwi mi yaa la pe baro;
ye naŋgunjaala pe pe jigi wi taga na na!› »
12 Pa Yawe Yɛnŋɛlɛ lì yo yɛɛn fɔ: «Ye wele, mbele kiti wi sila to pe na mbe pe kan pe wɔ wa na naŋgbanwa wɔjɛnnɛ li ni, poro yaa wɔ wa li ni. Ɛɛn fɔ yoro wo na Edɔmu cɛnlɛ woolo, ye yɛn naga sɔnri ye yaa koro mbajɔlɔwɔ wi le? Ayoo, ye se koro mbajɔlɔwɔ. Yoro fun ye yaa wɔ wa ki wɔjɛnnɛ li ni. 13 Katugu mì wugu na yɛɛra mɛgɛ ki na, Yawe Yɛnŋɛlɛ lo lì yo ma, fɔ Bozira ca ki yaa pye sunndo kɔngɔ laga, mbe pye tifagawa yaraga, naa kataga konaa laga ŋga kì daŋga. Ki kanŋgara na cara ti ni fuun ti yaa ka pye katara fɔ sanga pyew.»
14 Mì sɛnrɛ ta logo ma yiri wa Yawe Yɛnŋɛlɛ li yeri,
lì pitunŋɔ wa torogo wa cɛngɛlɛ ke yeri wi saga yo ke kan fɔ:
«Ye ye yɛɛ gbogolo ye yiri Edɔmu tara ti kɔrɔgɔ,
ye yiri ye sa to ti na malaga ni!»
15 «Edɔmu cɛnlɛ woolo, mi yaa ti ye kologo cɛngɛlɛ ke ni fuun ke sɔgɔwɔ,
mi yaa ti sɛnwee piile paa ye tifaga.
16 Fyɛrɛ nda leele paa fyɛ ye yɛgɛ konaa ye yɛɛ gbɔgɔwɔ pi ni tì ye puŋgo,
yoro mbele ye yɛn ma cɛn wa waliwere ti ni,
yoro mbele ye yɛn ma cɛn wa tinndiye pe go na.
Ɛɛn fɔ ali na yaga sa ye sere ti pɔ fɔ wa lege, wa naayeri mbe wɛ yɔn wi na,
mi yaa ye tirige mbe yiri wa.»
Yawe Yɛnŋɛlɛ lo lì yo ma.
17 «Edɔmu tara ti yaa ka tɔngɔ mbe koro waga. Mbele fuun pe yaa kaa tooro wa ti tanla, pe yaa kaa kawa mbaa wofegele wiin ti jɔlɔgɔ kagala ke ni fuun ke kala na. 18 Sodɔmu ca naa Gomɔri ca konaa ti kanŋgara na cara ti ni tìla tɔngɔ yɛgɛ ŋga na, pa Edɔmu tara ti yaa ka pye ma. Yawe Yɛnŋɛlɛ lo lì yo ma. Lere kpɛ se ka cɛn wa ti ni naa, sɛnwee pyɔ kpɛ se ka tugu wa ti ni.»
 
19 Yawe Yɛnŋɛlɛ lì yo fɔ:
«Wele, yɛgɛ ŋga na jara wi ma yiri wa Zhuridɛn gbaan yɔn kɔlɔgɔ ki ni,
mbe sa to yaayoro ti na wa naŋgboŋgo tiyɔngɔ ka ni,
pa mi yaa ka Edɔmu cɛnlɛ woolo pe purɔ ma fun,
mbe pe yirige wa pe tara ti ni le ki yɔngɔlɔ nuŋgba ke ni.
Mi jate mi yaa ka lere wa wɔ mboo tɛgɛ pe go na;
naga yɛn ma, ambɔ wi mbe ya mboo yɛɛ taanla na ni?
Ambɔ wi mbe ya mbanla yewe na yɔn sɛnrɛ ti ni?
Yɛkelewe wiwiin wi mbe ya yere mbanla sige?»
20 Ki kala na, Yawe Yɛnŋɛlɛ lì kagala ŋgele kɔn ma tɛgɛ Edɔmu cɛnlɛ woolo pe wogo na,
konaa kagala ŋgele lì gbɛgɛlɛ mbe pye Tema ca fɛnnɛ pe na, ye ke logo!
Ki woro na lere kɔɔn shyɛn, pe yaa ka pe yigi mbe pe tilele mbe kari pe ni paa simbapiile yɛn, mbele fanŋga woro pe ni.
Ki woro na lere kɔɔn shyɛn, pe yaa ka pe tara ti tɔngɔ mberi yaga waga.
21 Pe tolo li tinmɛ pi yaa ka ti tara ti yɛgɛyɛgɛ;
pe yaa kaa pe gbelege ki nuru fɔ wa Kɔgɔje yɛɛn wi na.
22 Ye wele, ki yɛn paa yɔn yɛn, ŋa wì yiri na toro wa naayeri,
wùu kanwira ti sanga mari jaraga wa Bozira ca ki go na.
Ko pilige ko ni, Edɔmu tara maliŋgbɔɔnlɔ kotogofɛnnɛ pe nawa pi yaa ka tanga pe na,
paa jɛlɛ ŋa wila jaa mbe se wi yɛn.
Yɛnŋɛlɛ yɔn sɛnrɛ nda tì yo Damasi ca ki wogo na
23 Sɛnrɛ nda tìla yo Damasi ca ki wogo na.
«Hamati ca naa Aripadi ca fɛnnɛ pè fɛrɛ shɔ,
katugu pè sɛnpere ta logo.
Pe sunndo wila kɔɔn pe na,
pe jatere wì piri pe na,
paa kɔgɔje tɔnmɔ mba pi maa yinrigi na tuun pila ya sinlɛ pi yɛn.
24 Damasi ca fɛnnɛ pe fanŋga kì kɔ,
pè puŋgo le na fee.
Pe yɛn na seri fyɛrɛ ti na,
jatere piriwɛn naa jɔlɔgɔ yɛn pe na,
paa jɛlɛ ŋa wila jaa mbe se wi yɛn.
25 Ki panwa pan mɛlɛ, a pè sigi ca ŋga ki yaga,
ki ca ŋga ki mɛgɛ kì gbɔgɔ we,
ko ŋga mìla pye na yɔgɔri ki kala na we?
26 Ki kala na, pe lefɔnmbɔlɔ pe yaa ka toori mbe ku wa pe katoro ti ni,
ko pilige ko ni, pe maliŋgbɔɔnlɔ pe ni fuun pe yaa ka ku.
Yawe Yɛnŋɛlɛ na yawa pi ni fuun fɔ lo lì yo ma.
27 Mi yaa kasɔn le Damasi ca mbogo ki ni mbege sogo;
ki kasɔn ki yaa Bɛni Hadadi wunluwɔ yinrɛ ti sogo.»
Yɛnŋɛlɛ yɔn sɛnrɛ nda tìla yo Kedari cɛnlɛ woolo naa Hazɔri ca tara woolo pe wogo na
28 Sɛnrɛ nda to tìla yo Kedari cɛnlɛ woolo pe wogo na konaa Hazɔri ca tara woolo pe wogo na, to nda Babilɔni tara wunlunaŋa Nebukanezari wìla malaga gbɔn ma ya ti ni we.
Pa Yawe Yɛnŋɛlɛ lì yo yɛɛn fɔ:
«Ye yiri ye sa to Kedari cɛnlɛ woolo pe na,
ye sa tara ti yɔnlɔ yirisaga kɛɛ woolo pe tɔngɔ.
29 Ki daga juguye pe pe paara yinrɛ naa pe yaayoro ŋgbeleye yi koli,
pe pe paara yinrɛ ti tɔnpaara naa pe tuguro konaa pe yɔngɔmɛye pe koli.
Leele paa gbele pe na fɔ: ‹Fyɛrɛ kagala ke yɛn ye kɛɛ ki ni fuun ki na!›
30 Yaa fee, yoro Hazɔri ca fɛnnɛ wele!
Yaa kee fyɛlɛgɛ na!
Ye sa lara fɔ wa waliwere ti nɔgɔ!
Yawe Yɛnŋɛlɛ lo lì yo ma.
Katugu Babilɔni tara wunlunaŋa Nebukanezari wì ka kɔn ma tɛgɛ ye mɛgɛ ni,
wì kala la gbɛgɛlɛ ye mɛgɛ ni.
 
31 «Ye yiri ye sa to cɛnlɛ la woolo na, mbele pe yɛn yɛyinŋge na,
cɛnlɛ na li woolo pe yɛn ma cɛn pɔw kaŋgbanga fu pe na,
Yawe Yɛnŋɛlɛ lo lì yo ma.
Kɔrɔ woro pe ca mbogo yeyɔngɔ ki na, sɔgɔyaraga woro ki na;
pe yɛn ma cɛn wa pe yɛ.
32 Pe juguye pe yaa ka pe yɔngɔmɛye pe koli
mbe pe yaayoro ŋgbeleye lɛgɛrɛ yi koli mbe kari ti ni.
Mi yaa ka pe fɛ mbe pe jaraga kɛɛ ki ni fuun ki na,
ki leele mbele pe ma pe siyɔ wi kanŋgara ti kulu we.
Mi yaa jɔlɔgɔ wa pe na mbe yiri kɛɛ ki ni fuun ki na.
Yawe Yɛnŋɛlɛ lo lì yo ma.
33 Hazɔri ca tara ti yaa ka pye dabaala larasaga,
mbe jɔgɔ mbe koro waga fɔ sanga pyew.
Lere kpɛ se ka cɛn wa ti ni naa,
sɛnwee pyɔ kpɛ se ka tugu wa ti ni naa.»
Yɛnŋɛlɛ yɔn sɛnrɛ nda tìla yo Elamu tara ti wogo na
34 Zhuda tara wunlunaŋa Sedesiyasi wi wunluwɔ pi lɛsanga wi ni, sɛnrɛ nda to Yawe Yɛnŋɛlɛ làa kan Yɛnŋɛlɛ yɔn sɛnrɛ yofɔ Zheremi wi yeri Elamu tara ti wogo na, ma yo fɔ:
35 Yawe Yɛnŋɛlɛ na yawa pi ni fuun fɔ, pa lì yo yɛɛn fɔ:
«Wele, mi yaa Elamu tara woolo pe sandiga ki kaari,
ko ŋga ki yɛn pe fanŋga ye.
36 Mi yaa tifɛlɛyɛ tijɛrɛ yirige mbe wa Elamu tara ti na,
mbe yiri wa naayeri wi go tijɛrɛ ki ni fuun ki na.
Mi yaa Elamu tara woolo pe fɛ mbe pe jaraga kɛɛ ki ni fuun ki na,
tara to ta se ka koro, na pee Elamu tara woolo pe gbɔn mbe pe jaraga mbe kari wa pe ni.
37 Mi yaa ka sunndo kɔngɔ wa Elamu tara woolo pe na mbe ti paa seri pe juguye pe yɛgɛ sɔgɔwɔ,
poro mbele pe yɛn na pe gbosaga jaa we.
Mi yaa ka jɔlɔgɔ wa pe na, na naŋgbanwa gbɔɔ pi kala na.
Yawe Yɛnŋɛlɛ lo lì yo ma.
Mi yaa ka pe purɔ tokobi ni,
mbe sa pe tɔngɔ mbe pe kɔ pew.
38 Mi yaa ka Elamu tara wunlunaŋa wo naa wi legbɔɔlɔ pe tɔngɔ mbe pe wɔ wa,
mbe silan wunluwɔ jɔngɔ ki tɛgɛ wa Elamu tara.
Yawe Yɛnŋɛlɛ lo lì yo ma.
39 Ɛɛn fɔ wa wagati ŋa wila paan wi ni,
mi yaa ka sɔngɔrɔ mbe Elamu tara woolo pe tɛgɛ wa pe cɛnsaga koŋgbanŋga ki ni;
Yawe Yɛnŋɛlɛ lo lì yo ma.»