Yɛnŋɛlɛ yɔn sɛnrɛ nda tìla yo Mowabu tara ti wogo na
48
1 Sɛnrɛ nda tì yo Mowabu tara ti wogo na.
Yawe Yɛnŋɛlɛ na yawa pi ni fuun fɔ, Izirayɛli woolo Yɛnŋɛlɛ le, pa lì yo yɛɛn fɔ:
«Jɔlɔgɔ yɛn Nebo ca woolo pe wogo, katugu pège tɔngɔ!
Kiriyatayimu ca kì fɛrɛ shɔ, katugu juguye pège shɔ!
Malaga sigego gbɔgɔ woolo pè fɛrɛ shɔ, a pe sunndo wì kɔn pe na!
2 Gbɔgɔwɔ mba pìla pye Mowabu tara ti na pì kɔ!
Pe yɛn na kapege gbɛgɛlɛ ki mɛgɛ ni wa Ɛshibɔn ca.
Pè yo fɔ: ‹Ye pan we saga tɔngɔ wege mɛgɛ ki kɔ wege wɔ wa cɛngɛlɛ ke sɔgɔwɔ!›
Yoro Madimɛni ca fɛnnɛ, ye tinmɛ pi se ka logo naa;
katugu tokobi wi yɛn ye puŋgo na.
3 Jɔrɔgɔmɔ pa yɛn na yinrigi wa Horonayimu ca,
jɔgɔwɔ naa jɔgɔwɔ, pe yɛn naga tɔnri!
4 Pè Mowabu tara ti tɔngɔ,
tara piile pe yɛn na gbele.
5 Pe yɛn na gbele suyi na nuru na kee wa Luhiti laga tinndi wi yeri;
jɔlɔgɔ gbeere yɛn na yinrigi wa Horonayimu ca konɔ tigiwɛn pi ni,
jɔgɔwɔ pi kala na.
6 Yaa fee ye ye yɛɛ go shɔ,
ye sa koro wa gbinri wi ni paa yan sofile yɛn.
7 Kì kaa pye Mowabu tara fɛnnɛ yè ye jigi wi taga ye kɛɛ tunndo to naa ye yarijɛndɛ to na,
ki kala na, pe yaa ka ye yigi fun.
Pe yaa ka ye yarisunŋgo Kemɔshi ki yigi kasopyɔ mbe kari ki ni, naa ki saraga wɔfɛnnɛ poro naa ki yɛkeele pe ni.
8 Jɔgɔwɔ pyefɔ wi yaa ka ye ca nuŋgba nuŋgba pyew ki ni,
ca ko ka kpɛ se ka shɔ mbe to.
Gbunlundɛgɛ laga ki yaa ka jɔgɔ,
funwa laga falafala ki yaa ka tɔngɔ.
Ko sɛnrɛ to Yawe Yɛnŋɛlɛ lì yo.
9 Ye kanwira kan Mowabu tara fɛnnɛ pe yeri,
jaŋgo pe yiri sire na pe kari lege!
Katugu pe cara ti yaa tɔngɔ mbe koro waga.
Lere se ka pye mbe cɛn wa ti ni.
10 Lere ŋa wi maa Yawe Yɛnŋɛlɛ li tunŋgo ki piin sambalawa ni, daŋga yɛn ki fɔ wi wogo!
Lere ŋa wi woro na jaa mbe legbogo pye wi tokobi wi ni, daŋga yɛn ki fɔ wi wogo!
 
11 «Mowabu tara fɛnnɛ pàa pye ma cɛn pɔw maga lɛ wa pe puwɛn sanga wi ni,
pe fa pe yigi kasopiile mbe kari pe ni.
Pe yɛn paa duvɛn yɛn, ŋa wi yɛgɛ kì sulu; wi sindɛrɛ ti yɛn ma sinlɛ wa nɔgɔna;
ŋa pe faa wɔ leyaraga ka ni mboo kanŋga ka yɛgɛ ni.
Ki kala na, wi tanwa pì koro wi ni,
wi nuwɔ taan pii kanŋga.»
 
12 Ki kala na, Yawe Yɛnŋɛlɛ lì yo fɔ: «Piliye ya yɛn wa na paan, mi yaa ka leele pele torogo pe saa kanŋga poo wɔ leyaara ta ni mboo le ta yɛgɛ ni. Pe yaa kaa kanŋga mboo wɔ wa leyaara ti ni, mbe cɔrɔ ti yaari. 13 Kona Mowabu cɛnlɛ woolo pe yaa fɛrɛ shɔ pe yarisunŋgo Kemɔshi ki wogo na, paa yɛgɛ ŋga na Izirayɛli woolo pàa fɛrɛ shɔ Betɛli ca yarisunŋgo ki wogo na, ko ŋga pàa pe jigi wi taga ki na we.
 
14 «Mowabu cɛnlɛ woolo, naga yɛn ma, ye mbe ya mbege yo mɛlɛ mbe yo fɔ:
‹We yɛn lenambala
ma pye maliŋgbɔɔnlɔ kotogofɛnnɛ?›
15 Mowabu tara tì jɔgɔ pew,
pe cara ti sogowo wirige ki yɛn na yinrigi wa naayeri.
Pe lefɔnmbɔlɔ mbele pe yɛn fanŋga ni ma wɛ, pè pe yigi na kee pe ni wa pe gbosaga.»
Wunlunaŋa ŋa wi mɛgɛ ki yɛn Yawe Yɛnŋɛlɛ na yawa pi ni fuun fɔ,
wo wì yo ma.
16 Mowabu tara jɔgɔsanga wì gbɛrɛ gbɔn,
ti jɔlɔgɔ ki yɛn na fyɛɛlɛ mbe pan mbe to ti na.
17 Yoro mbele fuun ye yɛn ma cɛn mari maga, yaa gbele ti wogo na,
Yoro mbele fuun yàa ti mɛgbɔgɔ ki jɛn, yaa ki yuun fɔ:
«Ki wunluwɔ kanŋgala fanŋga wolo na lì pye mɛlɛ mɛɛ kaari?
Lo na làa pye gbɔgɔwɔ ni we!»
 
18 Yoro Dibɔn ca fɛnnɛ, ye tigi ye yiri wa ye cɛnsaga gbɔgɔwɔ wogo ki na,
ye pan ye cɛn wa tawara ti na.
Katugu Mowabu tara tɔngɔfɔ wi yɛn na paan mbe to ye na,
wi yaa ye malaga sigecara ti tɔngɔ.
19 Yoro Aroyɛri ca woolo, ye sa yere wa konɔ li yɔn na yaa kɔrɔsiri piin;
naŋa ŋa wila fee konaa jɛlɛ ŋa wila fee mboo yɛɛ shɔ, ye pe yewe fɔ: «Yiŋgi ki pye?»
20 Mowabu cɛnlɛ woolo pè fɛrɛ shɔ, katugu pè sunndo wì kɔn pe na.
Yaa gbele ŋgbanga yaa jɔrɔgi!
Ye saga yari wa Arinɔ lafogo ki yɔn na, fɔ Mowabu tara tì tɔngɔ.
21 Yɛnŋɛlɛ li kiti kɔngɔ kì to funwa laga falafala tara woolo pe na, naa Holɔn ca, naa Yaza ca konaa Mefaati ca ki na, 22 naa Dibɔn ca, naa Nebo ca konaa Bɛti Dibilatayimu ca ki na, 23 naa Kiriyatayimu ca, naa Bɛti Gamuli ca konaa Bɛti Mewɔn ca ki na, 24 naa Keriyɔti ca, naa Bozira ca konaa Mowabu tara cara ti ni fuun ti na, nda ti yɛn wa lege konaa nda ti yɛn na tɔɔn.
25 «Mowabu tara ti fanŋga kì to,
ti fanŋga kɛɛ kì kaw.
Yawe Yɛnŋɛlɛ lo lì yo ma.»
26 We Fɔ wì yo fɔ: «Ye Mowabu cɛnlɛ woolo pe kan pe wɔ pe tin pe yɛgɛ kila kanŋgi; katugu pè pe yɛɛ gbɔgɔ Yawe Yɛnŋɛlɛ li na. Ki yɛn ma yala pe tuguru paa koŋgi wa pe tuguro ti ni. Pe pye titɛgɛrɛ yaraga leele pe yeri. 27 Naga yɛn ma, ye sila Izirayɛli woolo pe pye ye titɛgɛrɛ yaraga wi le? Naga yɛn ma, paa pe yigi yuro go na wi le, fɔ na ye kaa para pe sɛnrɛ na sanga o sanga, ye maa go yangara na tɛgɛ pe na?
28 Yoro Mowabu cɛnlɛ woolo, ye yiri wa ye cara ti ni,
ye sa cɛn wa waara ti sɔgɔwɔ;
ye pye paa ketenɛ yɛn,
na li ma saa li sere ti pɔ wa waliwege ki yɔn na.
29 Wè Mowabu cɛnlɛ woolo pe yɛɛ gbɔgɔwɔ pi sɛnrɛ logo,
pe yɛɛ gbɔgɔwɔ pì kɛɛ toro,
naa pe yɛɛ nagawa pi ni, naa pe yɛɛ gbɔgɔwɔ pi ni,
naa pè pe yɛɛ bɔ yɛgɛ ŋga na ki ni, konaa pe yɛɛ mbɔnrɔwɔ leele na pi ni.»
30 Yawe Yɛnŋɛlɛ lo lì yo ma fɔ: «Mì pe yɛgɛ tuguwo kala li jɛn, ɛɛn fɔ ko yɛn wagafe; pe yɛɛ nagawa sɛnyoro to naa pe kapyere ti yɛn wagafe.»
31 Ki kala na, na mi kaa jatere piin Mowabu tara ti wogo na, mi maa gbele,
mi yɛn na gbele ŋgbanga Mowabu tara ti ni fuun ti wogo na,
mi yɛn na jɛɛn Kiri Haresɛti ca woolo pe kala na.
32 E, Sibima ca ɛrɛzɛn kɛrɛ, mi yɛn na gbele ma wogo na ma wɛ
mi yɛn na gbele Yayezɛri ca woolo pe wogo na yɛgɛ ŋga na ki na.
Ma njere tìla tɔnlɔndɔnlɔ fɔ ma kari wa kɔgɔje wi puŋgo na,
ma saa gbɔn fɔ wa Yayezɛri ca ki na.
Ɛɛn fɔ jɔgɔwɔ pyefɔ wì pan ma to ye tige pire to naa ye ɛrɛzɛn pire ti na mberi jɔgɔ.
33 Nayinmɛ naa yɔgɔrimɔ pì kɔ wa Mowabu tara tige pire kɛɛrɛ ti ni,
konaa wa tara ti lara sannda ti ni.
Mì ti, a duvɛn wì waga wa wi leyaara ti ni.
Lere woro wa mbaa ɛrɛzɛn pire tɔnmɔ pi woo wa ti wɔsaga, mbaa jɔrɔgi nayinmɛ ni;
gbeere ta na yinrigi, ɛɛn fɔ to woro nayinmɛ gbeere.
34 Pe yɛn na Ɛshibɔn ca fɛnnɛ pe gbeere ti nuru wa Eleyale ca, ti yɛn na gbɔɔn wa Yahazi ca. Pe yɛn nari nuru wa Sowari ca, fɔ ma saa gbɔn wa Horonayimu ca, fɔ ma saa gbɔn wa Egilati Shelishiya laga ki na; katugu ali yɛrɛ Nimirimu laga tɔnmɔ pì waga fun.
35 Yawe Yɛnŋɛlɛ lo lì yo ma fɔ: «Mbele pe maa saara sogoworo woo wa sunzara nda wa tinndiye pe na ti na, konaa mbele pe maa wusuna nuwɔ taan sori pe yarisunndo ti kan, mi yaa ka pe tɔngɔ pew wa Mowabu tara ti ni.» 36 Ki kala na, na nawa pì tanga na na Mowabu cɛnlɛ woolo naa Kiri Haresɛti ca fɛnnɛ pe wogo na, paa yɛgɛ ŋga na lere ma kaa wele win kunwɔ na, katugu yarijɛndɛ nda fuun pàa gbogolo pe yɛɛ kan, tì wɔ pe kɛɛ. 37 Pe ni fuun pe yinrɛ tì kulu, pe siyɔɔlɔ pe ni fuun pè kulu, pè njelewe gbɔn pe kɛyɛn yi ni fuun yi na, ma jatere piriwɛn yaripɔrɔ le pe yɛɛ na. 38 Kunwɔ gbeere ti yɛn na yinrigi wa biriyinrɛ ti ni fuun ti go na, wa Mowabu tara konaa wa katoro ti ni; katugu mì Mowabu tara ti ya paa yɛgɛ ŋga na pe ma cɔgɔ yaari, ŋga lere woro na jaa ki na. Yawe Yɛnŋɛlɛ lo lì yo ma. 39 E, Mowabu tara tì to! Yaa gbele! Mowabu cɛnlɛ woolo pè puŋgo le, fɛrɛ nda tì pe yigi ti kala na. Mowabu cɛnlɛ woolo pe kala lì pye titɛgɛrɛ kala konaa sunndo kɔngɔ gbɔgɔ tara woolo mbele fuun pe yɛn ma pe maga pe yeri.
40 Pa Yawe Yɛnŋɛlɛ lì yo yɛɛn fɔ: «Wele, ki yaa ka pye paa yɔn yɛn,
ŋa wì yiri maa kanwira ti jaraga Mowabu tara ti go na.
41 Keriyɔti ca pège shɔ, ma malaga sigeyinrɛ ti shɔ;
ko pilige ko ni, Mowabu tara maliŋgbɔɔnlɔ kotogofɛnnɛ pe nawa pi yaa ka tanga pe na,
paa jɛlɛ ŋa wila jaa mbe se wi yɛn.
42 Mowabu cɛnlɛ woolo pe yaa tɔngɔ pew, pe se pye naa cɛnlɛ lo la,
katugu pè pe yɛɛ yirige ma wɛ Yawe Yɛnŋɛlɛ li yɛgɛ sɔgɔwɔ.
43 Sunndo kɔngɔ, naa wegbɔgɔ tijugo konaa mɛrɛ
to ti yɛn wa ye yɛgɛ, yoro Mowabu cɛnlɛ woolo wele. Yawe Yɛnŋɛlɛ lo lì yo ma.
44 Ŋa kaa fee sunndo kɔngɔ kagala ke yɛgɛ,
wo yaa sa to wegbɔgɔ tijugo ni,
ŋa ka yiri wa wegbɔgɔ tijugo ki ni,
mɛrɛ yaa wo yigi;
katugu yɛlɛ na ni mi yaa Mowabu cɛnlɛ woolo pe kapere ti fɔgɔ tɔn pe na,
mi yaa yiri pe kɔrɔgɔ.
Yawe Yɛnŋɛlɛ lo lì yo ma.
45 Mbele paa fee, a pe fanŋga kì saa kɔ,
pè saa yere wa Ɛshibɔn ca yinmɛ pi ni.
Ɛɛn fɔ kasɔn janri ma yiri wa Hɛshibɔn ca ki ni,
kasɔn yinnɛ yiri wa wunlunaŋa Sihɔn wi wunluwɔ go ki ni,
ki yɛn na Mowabu tara kanŋgara na lara ti sori,
na tinmɛ yirigefɛnnɛ pe yuŋgɔrɔgɔ ki sori.
46 Jɔlɔgɔ yɛn ye wogo, yoro Mowabu cɛnlɛ woolo wele!
yoro mbele cɛnlɛ na li yɛn yarisunŋgo Kemɔshi ki woolo, pè ye tɔngɔ;
katugu pè ye pinambiile naa ye sumborombiile pe yigi kasopiile,
ma kari pe ni tara ta yɛgɛ ni.
47 Ɛɛn fɔ wa wagati ŋa wila paan wa wi ni,
mi yaa ka sɔngɔrɔ mbe Mowabu cɛnlɛ woolo pe tɛgɛ wa pe cɛnsaga koŋgbanŋga ki ni.
Yawe Yɛnŋɛlɛ lo lì yo ma.»
Kiti kɔngɔ sɛnrɛ nda tìla yo ma wa Mowabu tara ti na, pa tì kɔ na ki laga ŋga ki ni.