YƐNŊƐLƐ LI YAA KA JƆLƆGƆ WA CƐNGƐLƐ SANŊGALA KE NA
46–51
Babilɔni tara fɛnnɛ pàa ya Ezhipiti tara fɛnnɛ pe ni wa Karikemishi ca
46
1 Yawe Yɛnŋɛlɛ làa sɛnrɛ nda kan Yɛnŋɛlɛ yɔn sɛnrɛ yofɔ Zheremi wi yeri cɛngɛlɛ sanŋgala ke wogo na, tori nda yɛɛn: 2 Sɛnrɛ nda to tì yo Ezhipiti tara ti wogo na konaa Ezhipiti tara wunlunaŋa Farawɔn Neko wi maliŋgbɔɔnlɔ ŋgbelege ki wogo na. Ma pe ta wa Efirati gbaan wi tanla, wa Karikemishi ca, Babilɔni tara wunlunaŋa Nebukanezari wìla malaga gbɔn ma ya Farawɔn wi ni; kìla pye Yehoyakimu pinambyɔ Zhoziyasi ŋa wìla pye Zhuda tara wunlunaŋa wi wunluwɔ pi yɛlɛ tijɛrɛ wolo lo ni. Tì yo fɔ:
3 «Ye tugurɔn sigeyaara jɛgɛlɛ jɛgɛlɛ naa tugurɔn sigeyaara tugbɔɔrɔ gbɛgɛlɛ,
ye yiri ye kari malaga na!
4 Ye malaga gbɔnwotoroye pe pɔpɔ shɔnye pe na!
Yoro shɔn lugufɛnnɛ, ye ye wa ye wotoroye pe ni!
Ye ye tugurɔn njagala ke kan ye yere!
Ye ye njaanra ti yɔnrɔ ti wɔwɔ!
Ye ye malaga gbɔndeere ti lele!
 
5 «Yiŋgi mi yɛn na yaan yɛɛn?
Pe sunndo wì kɔn pe na, pe yɛn na sɔngɔrɔ puŋgo na.
Pe maliŋgbɔɔnlɔ kotogofɛnnɛ, juguye pè ya pe ni.
Pe yɛn na fee, na fee pe yɛrɛ woro na wele wa pe puŋgo na.
Fyɛrɛ gbɔrɔ yɛn kɛɛ ki ni fuun ki na!
Yawe Yɛnŋɛlɛ lo lì yo ma.
6 Ŋa wì feŋge ya ma wɛ, wi se ya fe mboo yɛɛ shɔ!
Maliŋgbɔɔn kotogofɔ wi se ya fe mboo yɛɛ shɔ!
Pe yɛn na kunrugu na tuun,
wa Efirati gbaan wi yɔn na, wa yɔnlɔparawa kamɛŋgɛ kɛɛ yeri.
 
7 «Ambɔ fɔ wi yɛn na yinrigi yɛɛn paa Nili gbaan tɔnmɔ pi yɛn,
paa yɛgɛ ŋga na gbaan ma kaa yin ma jaraga we.
8 Ezhipiti tara to ti yɛn na yinrigi paa Nili gbaan wi yɛn,
paa gbaan ŋa wì yin wi tɔnmɔ pì jaraga na fuun.
Tì yo fɔ: ‹Mi yaa yiri mbe fo mbe tara ti tɔn muŋga;
mi yaa cara to naa cara woolo pe tɔngɔ.›
 
9 «Shɔnye, yaa gbinri yaa kee,
malaga gbɔnwotoroye, yaa fee yaa kee!
Yoro maliŋgbɔɔnlɔ ye yiri:
Etiyopi tara maliŋgbɔɔnlɔ naa Puti tara maliŋgbɔɔnlɔ,
yoro mbele ye maa tugurɔn sigeyaara lee;
naa Ludi tara maliŋgbɔɔnlɔ ye ni,
yoro mbele yè sandiga wɔnmɔ pi jɛn!
 
10 «Ɛɛn fɔ ko pilige ko yɛn we Fɔ, Yawe Yɛnŋɛlɛ na yawa pi ni fuun fɔ lo wogo,
li kayaŋga wɔpilige koyi,
pilige ŋga ni li yaa kali kayaŋga ki wɔ li juguye pe ni we.
Tokobi wi yaa ka jɔgɔwɔ pye fɔ mbe tin,
wi yaa ka kasanwa pi wɔ mbe tin.
Katugu ki yɛn saraga we Fɔ, Yawe Yɛnŋɛlɛ na yawa pi ni fuun fɔ li kan,
wa yɔnlɔparawa kamɛŋgɛ kɛɛ tara ti ni, wa Efirati gbaan yɔn ki na.
 
11 «Yoro Ezhipiti tara fɛnnɛ wele,
ye yiri ye kari wa Galaadi tara, ye sa wɛrɛ faworo lagaja!
Ye yɛn na wɛrɛ lɛgɛrɛ piin wagafe,
ti se ya mbe ye sagala.
12 Cɛngɛlɛ sanŋgala kè ye fɛrɛ kala li sɛnrɛ logo,
Ye gbeere tì gbɔn tara ti lagapyew ki ni;
katugu maliŋgbɔɔn wà kurugo maliŋgbɔɔn wa na,
a pe ni fuun shyɛn pè pinlɛ ma toori.»
Babilɔni tara fɛnnɛ pe yaa ka Ezhipiti tara ti shɔ
13 Sɛnrɛ nda Yawe Yɛnŋɛlɛ làa yo Yɛnŋɛlɛ yɔn sɛnrɛ yofɔ Zheremi wi kan Babilɔni tara wunlunaŋa Nebukanezari wi panga ki wogo na, wo ŋa wìla pye na paan mbe malaga gbɔn Ezhipiti tara ti ni, ki sɛnrɛ ti nda:
14 «Ye saga sɛnrɛ nda ti yari wa Ezhipiti tara,
yeri yo wa Migidɔli ca,
yeri yo fun wa Mɛfisi naa Tapanɛsi cara ti ni!
Yege yo fɔ: ‹Ye yiri, ye ye yɛɛ gbɛgɛlɛ,
katugu tokobi wi yɛn na jɔgɔwɔ piin na ye mari.
15 Yiŋgi na, a ye yarisunŋgo Apisi kì se fe?
Ye napɔlɔ wii ya koro yeresaga, katugu Yawe Yɛnŋɛlɛ lùu jan tara.›
16 Li yaa ti lelɛgɛrɛ mbe kurugo,
pe yaa la tuunri pe yɛɛ na.
Pe yɛn naga yuun pe yɛɛ kan fɔ: ‹Ye ti we yiri we sɔngɔrɔ we kari we woolo pe kɔrɔgɔ,
wa tara nda pè we se ti ni,
mbe wɔ laga ki tokobiye legbogo ki sɔgɔwɔ.›
17 Na paga sa gbɔn wa, pe yaa la Farawɔn wi yinri mbaa yuun fɔ:
‹Ezhipiti tara wunlunaŋa wi woro yaraga ka, kaawɔ tinmɛ wagafe yirigefɔ;
wi wagati wì toro wi na makɔ.›
 
18 «Wunlunaŋa ŋa wi mɛgɛ koyi ŋga Yawe Yɛnŋɛlɛ na yawa pi ni fuun fɔ, lo lì yo ma fɔ:
‹Mi ŋa Yɛnŋɛlɛ na yinwege wolo na mɛgɛ ki na,
yɛgɛ ŋga na Tabɔri yanwiga ki yɛn ma yagara wa yanwira sannda ti sɔgɔwɔ,
yɛgɛ ŋga na Karimɛli yanwiga ki yɛn ma yaraga kɔgɔje wi go na,
pa jugu wi yaa pan ma fun.›
19 Ezhipiti tara fɛnnɛ, ye ye tuguro ti gbɛgɛlɛ,
pe yaa ye yigi kasopiile mbe kari ye ni.
Katugu Mɛfisi ca ki yaa ka jɔgɔ mbe koro waga,
pe yaa kaga sogo, lere se ka pye mbe cɛn wa ki ni naa.
 
20 «Ezhipiti tara ti yɛn paa nasumboro tiyɔɔn yɛn,
ɛɛn fɔ nakɔnɔ là yiri wa yɔnlɔparawa kamɛŋgɛ kɛɛ ki yeri na paan wi kɔrɔgɔ.
21 Maliŋgbɔɔnlɔ mbele pè lɛ sara na,
pe yɛn ma tɔrɔ tɔrɔ wa tara ti ni paa napire yirifɔnndɔ yɛn wa naŋgboŋgo.
Ɛɛn fɔ poro fun pe yaa ka puŋgo le mbe fe,
pe ni fuun pe yaa ka fe, pe se ka ya mbe yere naa mbe sige;
katugu pe tɔngɔpilige kila paan mbe gbɔn pe na,
pe jɔlɔgɔ sanga wì gbɔn.
22 Ezhipiti tara fɛnnɛ pe yɛn na fee, ki tinmɛ pi yɛrɛ si wɔɔgɔ tinmɛ bɔ,
katugu pe juguye pe yɛn na paan maliŋgbɔɔnlɔ ŋgbelege ni pe kɔrɔgɔ,
pe yɛn na paan pe kɔrɔgɔ gbɔɔnrɔ ni
paa tire janfɛnnɛ yɛn.
23 Pe yɛn na paan mbe pe kɔlɔgɔ ki jan,
ali mbege ta ki yɛn kɔwɔgɔ.
Yawe Yɛnŋɛlɛ lo lì yo ma;
katugu pe juguye pè lɛgɛ ma wɛ gbatɔ wi na,
lere se ya mbe pe jiri.
24 Ezhipiti tara woolo pè fɛrɛ shɔ,
Yɛnŋɛlɛ lì pe le yɔnlɔparawa kamɛŋgɛ kɛɛ tara woolo pe kɛɛ!»
25 Yawe Yɛnŋɛlɛ na yawa pi ni fuun fɔ, Izirayɛli woolo Yɛnŋɛlɛ lì yo fɔ: «Wele, mi yaa ka yiri pe yarisunŋgo Amɔ ŋga wa Tɛbu ca ki kɔrɔgɔ, mbe yiri Farawɔn wi kɔrɔgɔ, naa Ezhipiti tara ti kɔrɔgɔ, naa ti yarisunndo ti kɔrɔgɔ konaa ti wunlumbolo pe kɔrɔgɔ; mi yaa yiri Farawɔn wi kɔrɔgɔ konaa mbele pè pe jigi wi taga wi na pe kɔrɔgɔ. 26 Mi yaa pe le mbele pe yɛn na pe gbosaga jaa pe kɛɛ, Babilɔni tara wunlunaŋa Nebukanezari wi kɛɛ konaa wi maliŋgbɔɔnlɔ pe kɛɛ. Ko puŋgo na leele yaa ka sɔngɔrɔ mbe sa cɛn wa Ezhipiti tara naa, paa yɛgɛ ŋga na kìla pye faa we. Yawe Yɛnŋɛlɛ lo lì yo ma.»
Izirayɛli woolo pe shɔwɔ kala
27 «Yoro Zhakɔbu setirige piile, na tunmbyeele wele, yaga ka fyɛ,
yoro mbele na tunmbyeele wele!
Yoro Izirayɛli woolo, ye sunndo wiga ka kɔn ye na!
Katugu mi yaa ka ye shɔ mbe ye yirige wa taleere ti ni,
mbe ye setirige piile pe shɔ mbe pe yirige wa ki tara ti ni,
pàa pe yigi kasopiile ma kari pe ni tara nda ni we.
Zhakɔbu setirige piile pe yaa ka sɔngɔrɔ mbe pan,
pe yaa ka cɛn pɔw mbe pye yɛyinŋge na;
lere kpɛ se kaa pe jɔlɔ naa.
28 Yoro Zhakɔbu setirige piile, na tunmbyeele wele, yaga ka fyɛ,
katugu mi yɛn ye ni;
Yawe Yɛnŋɛlɛ lo lì yo ma.
Mìla ye purɔ ma ye jaraga cɛngɛlɛ ŋgele fuun sɔgɔwɔ,
mi yaa ka ke ni fuun ke tɔngɔ mbe ke kɔ.
Ɛɛn fɔ yoro wo na, mi se ka ye tɔngɔ mbe ye kɔ.
Mi yaa ka ye koro mbe yala kasinŋge ki ni;
katugu mi se ka ye yaga jɛrɛgisaga fu.»