Zheremi wìla Yɛnŋɛlɛ li yewe kagala kele wogo na
12
1 Yawe Yɛnŋɛlɛ, ma yɛn sinŋɛ wagati wi ni fuun ni,
mbe ya mbe kendige wɔ ma ni mɛlɛ?
Konaa ki ni fuun, mila jaa mbɔɔn yewe kiti kɔnkagala wogo na.
Yiŋgi na lepeele pe kapyegele ke ma sila yɔngɔ pe kan?
Yiŋgi na java pyefɛnnɛ pe si yɛn yɛyinŋge na?
2 Mà pe sanri paa tige yɛn, fɔ a pè ndire kan;
pe yɛn na gbogo fɔ na pire sɛni.
Ma mɛgɛ ki yɛn wa pe yɔn wagati pyew,
ma si yala, pe nawa jatere wi yɛn ma lali ma ni.
3 Ɛɛn fɔ mboro wo na, Yawe Yɛnŋɛlɛ, màla jɛn, ma yɛgɛ yɛn na na;
màla nawa jatere wi cancan ma wele, maga jɛn ma yo na jatere wi yɛn mboro na.
Lepeele pe yigi paa simbaala yɛn, mbele pe yɛn na kee pe ni wa yaayoro gbosaga;
pe tɛgɛ pe yɛ pe gbopilige ki kan!
 
4 Tara woolo pe yaa koro mbaa kunwɔ gbelege gbele fɔ sa gbɔn wagati wiwiin?
Yan ki yaa koro mbe waga wa wasege ki ni fɔ sa gbɔn wagati wiwiin?
Tara woolo pe tipewe pi kala na, woŋgaala naa sannjɛrɛ ti yɛn na kuun;
katugu pe yɛn na yuun fɔ: «Yɛnŋɛlɛ lii we goto kala li jɛn.»
Yawe Yɛnŋɛlɛ làa yɔn sogomɔ kan
5 Kì kaa pye mbaa fee tɔɔrɔ fɛnnɛ pe ni kɔ̀ɔn te,
ma yaa pye mɛlɛ mbe si ya mbaa fee shɔn lugufɛnnɛ poro ni?
Kì kaa pye tara ti ka yinmɛ ta ko mboro ma pye yɛyinŋge na pɔw,
koni na maga ka sa cɛn wa Zhuridɛn gbaan tɔnmɔ tinmɛ gbɔɔ pi sɔgɔwɔ, ma yaa ki pye mɛlɛ?
6 Katugu ali yɛrɛ ma nɔsepiile naa ma go woolo pe ni, pe yɛn nɔɔ java;
pe yɛn na pe magaŋgala ke yinrigi na sɛnpere yuun ma na.
Ki kala na, maga ka taga pe na,
ali na pe kaa sɛntanra yuun ma ni o!
Yɛnŋɛlɛ lì je li shɛrigo gbɔgɔ konaa li woolo pe na
7 Mì je na gbɔgɔgo ki na,
mìlan woolo pe wa;
poro mbele pàa pye mala ndanla we,
mì pe le na juguye pe kɛɛ.
8 Na woolo pè kanŋga ma pye na yeri paa jara yɛn wa kɔlɔgɔ ki ni,
pe yɛn na kuunru na na;
ki kala na, pe yɛn mala mbɛn.
9 Ma yo mɛlɛ hɛn? Na woolo pè kanŋga ma pye na yeri paa sannjɛgɛ tiyɔngɔ yɛn, ŋga kasanwa yɛn ki na,
kara kasannjɛrɛ tì pan maga maga kɛɛ ki ni fuun na.
Ye sa woŋgaala pe ni fuun pe gbogolo,
pe pan liwɛn gbɔɔ pi na.
10 Yaayoro kɔnrifɛnnɛ lɛgɛrɛ pan mala ɛrɛzɛn kɛrɛ ti jɔgɔ,
pànla kɛrɛ ti tangala ma toro;
pànla kɛrɛ tiyɔnrɔ ti jɔgɔ mari pye laga ŋga ki yɛn waga, laga ŋga kì tɔngɔ.
11 Pèri jɔgɔ mari yaga waga;
tì koro yɛsanga ni,
pèri tɔngɔ mari yaga waga na yɛgɛ sɔgɔwɔ.
«Tara ti ni fuun tì jɔgɔ ma koro waga,
katugu lere kpɛ suu jatere wi tɛgɛ ti na.
12 Jɔgɔwɔ pyefɛnnɛ pe yɛn na paan,
na yinrigi wa gbinri wi yanwira nda fuun ti yɛn waga ti go na;
katugu Yawe Yɛnŋɛlɛ li tokobi wi yɛn na jɔgɔwɔ piin,
maga lɛ tara ti go ŋga na mbe saga wa ti go ŋga na.
Lere kpɛ se yɛyinŋge ta.
13 Pè yariluguro lugu, ma kaa pan ma wuuro kɔn wa yarilire ti yɔnlɔ;
pè pe yɛɛ te pee tɔnli ta wa.
Ye yarilire kɔngɔ kì pye fɛrɛ ni ye yeri,
katugu Yawe Yɛnŋɛlɛ lì nawa ŋgban ye ni fɔ jɛŋgɛ.»
Yɛnŋɛlɛ li yaa yiri Izirayɛli woolo pe cɛnyɛɛnlɛ pe kɔrɔgɔ
14 Pa Yawe Yɛnŋɛlɛ lì yo yɛɛn fɔ: «Tara nda mì kan Izirayɛli woolo, na woolo pe yeri ti pye pe woro, na cɛnyɛɛnlɛ tipeele mbele fuun ka kɛɛ taga ti na, mi yaa ka pe ni fuun pe purɔ mbe pe yirige wa pe tara ti ni, mbe Zhuda tara woolo pe yirige mbe pe wɔ wa pe sɔgɔwɔ fun. 15 Ɛɛn fɔ na mi ka ka pe purɔ mbe pe yirige mbe kɔ, mi yaa ka sɔngɔrɔ pe ni fuun nuŋgba nuŋgba pe ni wa pe tara ti ni. 16 Na paga ka yɛnlɛ mbanla woolo pe tangalɔmɔ pi fɔrɔgɔ, mbaa tanri pi ni, na pe kaa wungu na mɛgɛ ki na mbaa yuun fɔ: ‹Yawe Yɛnŋɛlɛ na yinwege wolo li mɛgɛ ki na› paa yɛgɛ ŋga na pàa na woolo pe naga ma yo paa wungu yarisunŋgo Baali ki mɛgɛ ki na, pa kona pe yaa cɛnsaga ta wa na woolo pe sɔgɔwɔ. 17 Ɛɛn fɔ na cɛnlɛ na si yɛnlɛ mbe logo na yeri, mi yaa ki cɛnlɛ li tɔngɔ mbeli kɔ pew. Yawe Yɛnŋɛlɛ lo lì yo ma.»