Yɛnŋɛlɛ lì yo Izirayɛli woolo pe pe kapere ti jɛn peri yaga
4
1 Yawe Yɛnŋɛlɛ lo lì yo ma fɔ:
«Izirayɛli woolo, na yaga sɔngɔrɔ mbe pan,
na yaga sɔngɔrɔ mbe pan na kɔrɔgɔ,
na yaga ye yarisunndo tijangara ti kɔ mberi wɔ wa na yɛgɛ sɔgɔwɔ,
na yee koro mbaa yanri la kee kɛɛ ki ni fuun ki na,
2 na yaga wugu mi ŋa Yawe Yɛnŋɛlɛ na yinwege wolo na mɛgɛ ki na,
na yaga ki pye kaselege ni, naa nawa lagawa ni konaa kasinŋge ni,
pa kona cɛngɛlɛ sanŋgala ke yaa nala yɛnri mbe duwaw ke na,
pa ke yaa gbɔgɔwɔ ta na fanŋga na.»
3 Katugu Yawe Yɛnŋɛlɛ li yɛn naga yuun Zhuda tara woolo naa Zheruzalɛmu ca woolo pe kan fɔ:
«Ye kɛrɛ fɔnndɔ kɔn ye yɛɛ kan,
yaga ka yariluguro lugu wa wuuro ti sɔgɔwɔ naa.
4 Yoro Zhuda tara woolo naa Zheruzalɛmu ca woolo,
ye ye yɛɛ kɛnrɛkɛnrɛ mbege naga fɔ yè pye mi ŋa Yawe Yɛnŋɛlɛ na woolo,
ye ye kotoro ti pye kpoyi.
Nakoma na naŋgbanwa pi yaa yiri ye kɔrɔgɔ paa kasɔn yɛn,
mbaa sori ŋga lere se ya figi,
ye kapyere tijangara ti kala na.»
Jɔlɔgɔ ŋga ki yaa to Zhuda tara woolo pe na
5 «Ye saga wogo ŋga ki yari Zhuda tara woolo pe kan,
ye ti Zheruzalɛmu ca woolo pege wogo ki jɛn!
Ye mbanlaga win wa tara ti ni ye leele pe yɛri,
ye ye magaŋgala ke yirige yege yo fɔ leele pe pe yɛɛ gbogolo wa cara nda pè malaga sigemboro kan mari maga ti ni.
6 Ye kacɛn yaraga ka pye yege yirige wa naayeri mbaa Siyɔn ca kɛɛ ki nari!
Yaa fee, yaga ka yere!
Katugu mi yaa ti jɔlɔgɔ mbe yiri wa yɔnlɔparawa kamɛŋgɛ kɛɛ yeri mbe pan,
ki yaa ka pye jɔgɔwɔ gbɔɔ.
7 Jara wì yew ma yiri wa wi larasaga;
cɛngɛlɛ ke tɔngɔfɔ wi yɛn wa konɔ na paan.
Wì yiri wa wi cɛnsaga ki ni,
mbe pan mbe ye tara ti jɔgɔ mberi yaga waga;
ye cara ti yaa ka tɔngɔ mbe pye katara,
lere se ka pye wa ti ni.
8 Ki kala na, ye jatere piriwɛn yaripɔrɔ le ye yɛɛ na;
yaa kunwɔ gbele, yaa yuŋgbɔgɔrɔ sɛnrɛ yuun,
katugu Yawe Yɛnŋɛlɛ li naŋgbanwa gbɔɔ pi se kɔ ye ni.»
 
9 Yawe Yɛnŋɛlɛ lo lì yo ma fɔ:
«Ko pilige ko ni, wunlumbolo naa kundigile pe ni, pe yaa ka kotogo la.
Saraga wɔfɛnnɛ pe jigi wi yaa ka kɔn pe na,
Yɛnŋɛlɛ yɔn sɛnrɛ yofɛnnɛ pe nawa pi yaa ka wɔ pe na.»
 
10 Kona, a mì sho fɔ: «E, we Fɔ, Yawe Yɛnŋɛlɛ,
kì cɛn mà ki cɛnlɛ woolo mbele poro naa Zheruzalɛmu ca woolo pe fanla wi,
maga yo pe kan fɔ: ‹Ye yaa ka yɛyinŋge ta›,
ma si yala, tokobi wi yɛn wa pe yɔlɔgɔ ki na makɔ!»
 
11 Ko sanga wo ni, pe yaa kaga yo ki cɛnlɛ woolo poro naa Zheruzalɛmu ca woolo pe kan fɔ:
«Tifɛlɛgɛ wɛrɛgɛ ka yɛn na gbɔɔn na yinrigi wa gbinri wi ni, wa tinndiye pe na.
Ki yɛn na gbɔɔn na paan na woolo pe kɔrɔgɔ.
Ki woro na paan mbe yarilire sigire fɛ, nakoma mbe yarilire pyɔ fɛ.
12 Tifɛliŋgbɔgɔ kayi,
ŋga kì yiri wa na paan, mbe pan mbanla nandanwa kala li pye.
Koni mi jate mi yaa kiti wi kɔn pe na.»
 
13 Leele pe yɛn na yuun fɔ: «Wele, juguye pe yɛn na paan paa kambaara yɛn.
Pe malaga gbɔnwotoroye pe yɛn paa tifɛlinjolo yɛn;
pe shɔnye pè wege ma wɛ yɔnye na.
Jɔlɔgɔ yɛn we wogo, katugu pè we tɔngɔ pew.»
 
14 «Zheruzalɛmu ca woolo, ye ye kotoro ti pye kpoyi, ye tipere pyew ti wɔ wa,
jaŋgo ye ta ye shɔ.
Ye yaa jatere pere ti yaga wa ye kotoro na
sa gbɔn fɔ wagati wiwiin?
15 Pe yɛn na sɛnrɛ ta nuru na yinrigi wa Dan tara ti ni, wa yɔnlɔparawa kamɛŋgɛ kɛɛ yeri,
ti yɛn na jɔlɔgɔ panga wogo yari na yinrigi wa Efirayimu tara yanwira ti na.
16 Yege sɛnrɛ nda ti yo ye cɛngɛlɛ sanŋgala ke kan,
ye ti Zheruzalɛmu ca woolo peri logo fɔ:
Maliŋgbɔɔnlɔ mbele pe ma pan ma ca ki yɔn tɔn mbege shɔ, pele yɛn na paan, ma yiri taleere ta ni.
Pe yɛn na malaga kɔŋgɔlɔ waa na paan Zhuda tara cara ti mɛgɛ ni.
17 Pe yaa pan mbe Zheruzalɛmu ca ki maga mbege fili paa yɛgɛ ŋga na kɛrɛ sigefɛnnɛ maa ki piin we,
katugu pè yiri ma je na na.
Yawe Yɛnŋɛlɛ lo lì yo ma.
18 Ye tangalɔmɔ pee po naa ye kapere tijangara to tì ti
ki wogo ŋga kì gbɔn ye na.
Ye tipere ti tɔnli wowi,
kaselege yi, kì ye nawa pi tanga ye na,
ki yɛn na ye jɔlɔ fɔ wa ye sunndo wi na.»
Tara woolo pe kala làa Zheremi wi nawa pi tanga wi na
19 E, na nawa, na nawa!
Kayaŋga yɛn wa na kotogo na fɔ jɛŋgɛ.
Na kotogo ki yɛn ma wɛri na na;
mi se ya mbe pyeri,
katugu mì mbanlaga winmɛ pi logo,
ma malaga kɔŋgɔlɔ ke logo.
20 Tɔngɔwɔ naa tɔngɔwɔ sɛnrɛ pe yɛn na yari,
pè tara ti ni fuun ti tɔngɔ.
Pànla paara yinrɛ ti jaanri yɔnlɔ nuŋgba,
mala wɔnlɔsara ti jɔgɔ go nuŋgba.
21 Mi yaa koro mbaa ki malaga gbɔnkacɛn ŋa wi yaan fɔ sa gbɔn wagati wiwiin?
Mi yaa koro mbaa ki mbanlaga magala li nuru fɔ sa gbɔn wagati wiwiin?
 
22 «Kaselege ko na, na woolo pe yɛn kambajɛnmbɛlɛ,
pee na jɛn;
pe yɛn piile mbele pe yɛn lembire,
tijinliwɛ woro pe ni.
Kapege pyege ko cɛ pè jɛn,
ɛɛn fɔ kajɛŋgɛ pyege pee ko jɛn.»
Jɔgɔwɔ gbɔɔ pyesanga
23 Mì tara ti wele, mari yan ti woro ma yala, ti yɛn waga!
Mì naayeri wi wele, mì si yanwa kpɛ yan.
24 Mì yanwira ti wele, mɛɛ ti yan ti yɛn na yɛgɛyɛgɛ!
Tinndiye pe ni fuun pe yɛn na tigile tigile.
25 Mì wele, mi si sɛnwee pyɔ kpɛ yan naa!
Naayeri sannjɛrɛ ti ni fuun tì fe ma kari.
26 Mì wele, mɛɛ tara ti kɛrɛ kɔnsara tiyɔnrɔ ti yan tì kanŋga ma pye gbinri ŋa wì waga!
Ki cara ti ni fuun tìla kanŋga ma pye katara,
Yawe Yɛnŋɛlɛ li yɛgɛ sɔgɔwɔ, li naŋgbanwa gbɔɔ pi kala na.
 
27 Katugu pa Yawe Yɛnŋɛlɛ lì yo yɛɛn fɔ:
«Tara ti ni fuun ti yaa ka koro waga,
ɛɛn fɔ mi se ka ti ti ni fuun ti tɔngɔ pew.
28 Ki kala na, tara ti yaa ka kunwɔ gbele.
Wa naayeri, wa yɛnŋɛlɛ na, diwi wi yaa ye;
katugu mìgi yo, maga kɔn maga tɛgɛ.
Ki kala li se ye na go na,
mi se si yɔn kanŋga.»
Siyɔn ca ki tɔngɔkala
29 Shɔn lugufɛnnɛ naa sandira wɔnfɛnnɛ pe tinmɛ pi kala na,
ca woolo pe ni fuun pè fe.
Pe yɛn na lara wa kɔɔrɔ ti ni.
Pè fe ma lugu wa waara ti na.
Cara ti ni fuun tì koro waga,
lere kpɛ si koro wa ca ki ni naa.
30 Mboro Zheruzalɛmu ca ŋga pè tɔngɔ makɔ, yiŋgi ma yaa pye san?
Ali na ma kaa pariyɛnrɛ sɔnŋgbanga woro nii,
mbaa tɛ fereyaara nii,
mbaa kale nii wa ma yɛngɛlɛ ke ni,
maa ko piin nɔɔ yɛɛ gbegele wagafe.
Ma kɛɛnlɛ pè je ma na,
pe yɛn naga jaa ma ku.
31 Mi yɛn na jɔrɔgɔmɔ pa nuru paa jɛlɛ ŋa wi selara yiri wi ni wi jɔrɔgɔmɔ pi yɛn,
na jɔlɔgɔ jɛngɛ ka nuru paa jɛlɛ ŋa wi yɛn na wi pyɔ koŋgbanŋa siin wi yɛn.
Siyɔn ca woolo pe jɔrɔgɔmɔ powi;
pe yɛn na jɛɛn, na pe kɛyɛn yi yinrigi wa naayeri na yuun fɔ:
«Ow! We wogo kì jɔgɔ!
We yɛn na kuun legboleele pe gbɔnrɔ ti kɛɛ.»