Izirayɛli woolo pàa je Yɛnŋɛlɛ li na
3
1 Yawe Yɛnŋɛlɛ lì yo fɔ: «Na naŋa wa kaa jɔ je,
na ki jɛlɛ wi ka sa naŋa wa yɛgɛ tɛgɛ,
naga yɛn ma, wi pɔlɔ lɛɛ wi mbe yɛnlɛ mbege jɛlɛ wi lɛ naa le?
Ayoo, na ki ka pye ma, ki yaa ki tara ti ni fuun ti tɛgɛ fyɔngɔ ni.
Yoro fun yè yiri ma saa nanjara pye nambala lɛgɛrɛ ni;
mɛlɛ, a yè sho fɔ ye yaa sɔngɔrɔ mbe pan na kɔrɔgɔ?» Yawe Yɛnŋɛlɛ lo lì yo ma.
2 Ye ye yɛrɛ ti yirige ye wele wa tinndiye pe na,
laga kikiin ki koro yee nanjara pye wa ki na?
Ye ma saa cɛn wa koŋgolo ke yɔn na, na ye nanjara pyeyɛɛnlɛ pe singi,
paa yɛgɛ ŋga na beŋganri pyefɔ ma lara na singi wa gbinri wi ni.
Yè tara ti tɛgɛ fyɔngɔ ni ye nanjara naa tipege ŋga yè pye ki ni.
3 Ko kala na tisara tì yere,
tisara puŋgo woro tii pan.
Konaa ki ni fuun, yè ye yinrɛ ti liri na ye nanjara ti piin, yee yere ki na mbe yo fɔ ye fɛrɛ shɔ.
 
4 Koni ko yège jɛn na gbele nala yinri, na yuun fɔ: «We to!
Mboro ma yɛn we wɔnlɔ, maga lɛ wa we punwɛ sanga wi ni!»
5 Ye yɛn na yewe na yuun fɔ:
«Naga yɛn ma, li yaa nawa ŋgban we ni sanga pyew wi le?
Naga yɛn ma, li yaa gbu tɛgɛ we ni sanga pyew wi le?»
Ko sɛnrɛ to ye yɛn na yuun,
ɛɛn fɔ, a yè si koro na kapege ki piin fanŋga ni na kee yɛgɛ.
Izirayɛli tara woolo naa Zhuda tara woolo pe yɛn ma taanla nɔsepiile sumbonɔ shyɛn ni, mbele pe woro ma sin
6 Kona, wunlunaŋa Zhoziyasi wi wagati wi na, a Yawe Yɛnŋɛlɛ lì si para na ni ma yo fɔ: «Izirayɛli woolo mbasinmbele pè kala na pye, mali yan kɛ? Pè kari wa yanwira titɔɔnrɔ ti ni fuun ti go na, konaa ma kari wa tigbɔrɔ nda fuun ti yɛn wɛtipiire ni ti nɔgɔ, ma saa na nanjara piin wa.»
7 Mìla na yɛɛ pye fɔ: «Ko kagala ŋgele koro ke ni fuun pyeŋgɔlɔ, pe yaa sɔngɔrɔ mbe pan na kɔrɔgɔ. Ɛɛn fɔ pee sɔngɔrɔ mbe pan na kɔrɔgɔ. Pe nɔsepyɔ Zhuda tara woolo javapyefɛnnɛ pàa pye ki kagala ke sɛrɛfɛnnɛ fun. 8 Mì Izirayɛli woolo mbasinmbele pe wa, ma pɔrɔgɔ jɔgɔ sɛwɛ kɔn ma kan pe yeri pe nandara ti kala na. Konaa ki ni fuun, mìgi wele maga yan fɔ ko ka si fyɛrɛ wa pe nɔsepyɔ Zhuda tara woolo javapyefɛnnɛ pe na. Ɛɛn fɔ poro fun paa saa na nanjara piin. 9 Izirayɛli woolo pè tara ti tɛgɛ fyɔngɔ ni pe nanjara tipere ti ni; pè kalikalawa pye yarisunndo sinndɛɛrɛ woro konaa tire woro ti ni.
10 «Konaa ki ni fuun, pe nɔsepyɔ Zhuda tara woolo javapyefɛnnɛ pe sila sɔngɔrɔ mbe pan na kɔrɔgɔ pe kotogo ki ni fuun ni. Ɛɛn fɔ pàa pye naga piin kopiire ni.» Yawe Yɛnŋɛlɛ lo lì yo ma.
11 A Yawe Yɛnŋɛlɛ lì silan pye naa fɔ: «Izirayɛli woolo mbasinmbele poro pe yɛɛ naga ndɛɛ pè sin ma wɛ Zhuda tara woolo java pyefɛnnɛ poro na. 12 Yiri ma saga sɛnrɛ nda ti yari wa yɔnlɔparawa kamɛŋgɛ kɛɛ tara ti yeri fɔ:
‹Yoro Izirayɛli woolo mbasinmbele, ye sɔngɔrɔ ye pan!›
Yawe Yɛnŋɛlɛ lo lì yo ma.
‹Mi se yɛgɛ san ye ni naa,
katugu mi yɛn kagbaraga pyefɔ.›
Yawe Yɛnŋɛlɛ lo lì yo ma.
‹Mila gbu tɛgɛ lere ni sanga pyew.
13 Ye ye kajɔɔgɔ ki jɛn ye yere ki na ko cɛ,
yege jɛn ye yo fɔ yè yiri ma je mi ŋa Yawe Yɛnŋɛlɛ, ye Yɛnŋɛlɛ na na.
Ye saa na yanri na toro yarisunndo nambannda puŋgo na,
wa tigbɔrɔ nda fuun ti yɛn wɛtipiire ni ti nɔgɔ;
yee yɛnlɛ mbe logo na yeri.› »
Yawe Yɛnŋɛlɛ lo lì yo ma.
Yɛnŋɛlɛ li yɛn na li woolo pe yinri pe sɔngɔrɔ pe pan li kɔrɔgɔ
14 Yawe Yɛnŋɛlɛ lo lì yo ma fɔ:
«Ye sɔngɔrɔ ye pan na kɔrɔgɔ, yoro piile mbele yè yiri ma je,
katugu muwi mi yɛn ye tafɔ we.
Mi yaa ka nuŋgba nuŋgba lɛ ye ni, mbe yiri cara ti ni,
mbe shyɛnzhyɛn lɛ ye ni, mbe yiri seye yi ni,
mbe sɔngɔrɔ ye ni wa Siyɔn ca.
15 «Mi yaa ka kundigile tɛgɛ ye go na mbe yala na nandanwa kala li ni. Pe yaa kaa ye yɛgɛ sinni kajɛnmɛ naa tijinliwɛ ni. 16 Na yaga ka lɛgɛ wa tara ti ni, mbe piile lɛgɛrɛ se sanga ŋa ni, ki wagati wi ni, pe se kaa para mi ŋa Yawe Yɛnŋɛlɛ na yɔn finliwɛ kɛsu wi wogo na naa. Yawe Yɛnŋɛlɛ lo lì yo ma. Wi wogo ki se ka tigi lere nawa naa, pe se ka nawa to wi na naa, pe se si ka wa yɛgɛ gbegele naa. 17 Ko wagati wo ni, pe yaa kaa Zheruzalɛmu ca ki yinri ‹Yawe Yɛnŋɛlɛ li wunluwɔ jɔngɔ›. Cɛngɛlɛ ke ni fuun ke yaa ka sa ke yɛɛ gbogolo wa, wa Zheruzalɛmu ca mbaa Yawe Yɛnŋɛlɛ li gbogo. Pe se koro mbaa tanri mbaa yala pe yɛɛra nawa jatere pere to ni. 18 Ki wagati wi ni, Zhuda tara woolo pe yaa ka pan mbe taga Izirayɛli woolo pe na. Pe yaa ka pinlɛ mbe yiri wa yɔnlɔparawa kamɛŋgɛ kɛɛ tara ti yeri, mbe sɔngɔrɔ wa pe tara ti ni, tara nda mìla kan pe tɛlɛye pe yeri ti pye pe kɔrɔgɔ ye.»
Izirayɛli tara woolo pe sɔngɔrɔkala Yɛnŋɛlɛ li kɔrɔgɔ
19 We Fɔ wì yo fɔ:
«Mìla pye nala yɛɛ piin ma yo
mìla jaa mbaa ye jate paa na piile yɛn,
mìla pye naga jaa mbe tara nda tì tanla ti kan ye yeri;
mbe tara laga tiyɔngɔ kan ye yeri, ŋga ki yɔngɔ woro cɛngɛlɛ sanŋgala ke sɔgɔwɔ.
Mìla pye naga yuun fun fɔ ye yaa kaa na yinri we to,
fɔ ye se ka laga na na fyew.
20 Ɛɛn fɔ, jɛlɛ ŋa wii sin wi maa pɔlɔ wi java yɛgɛ ŋga na,
pa yoro Izirayɛli woolo yànla java ma.
Yawe Yɛnŋɛlɛ lo lì yo ma.
 
21 «Magaŋgala yɛn na yinrigi wa tinndiye pe na,
Izirayɛli woolo pe gbeere naa pe yɛnriŋgbanga ŋga pe yɛn na yɛnri koyi,
katugu pè kombele lɛ;
pè fɛgɛ mi ŋa Yawe Yɛnŋɛlɛ, pe Yɛnŋɛlɛ na na.
22 Yoro piile mbele yè yiri ma je, ye sɔngɔrɔ ye pan na kɔrɔgɔ!
Pa mi yaa ye sagala, mbe ye shɔ ye kambasinnde ti ni.»
 
Kona, a leele pè sho fɔ: «We mbele, wè sɔngɔrɔ na paan ma kɔrɔgɔ,
katugu mboro ma yɛn Yawe Yɛnŋɛlɛ, we Yɛnŋɛlɛ le.
23 Kaselege ko na, yarisunndo gbɔgɔwɔ mba pi yɛn na piin wa tinndiye pe na,
ki tinmɛ mba fuun pi yɛn na yinrigi wa yanwira ti na,
pe yɛn na we fanla wi wagafe.
Ɛɛn fɔ kaselege ko na, pa Izirayɛli woolo pe yaa shɔwɔ pi ta Yawe Yɛnŋɛlɛ, we Yɛnŋɛlɛ lo yeri.»
 
24 «Maga lɛ wa we punwɛ sanga wi ni,
yarisunndo fɛrɛ woro nda we tɛlɛye pàa pye na gbogo, tì pe tunŋgo tɔnli wi li,
pe simbaala naa sikaala konaa pe nɛrɛ ti ni,
naa pe pinambiile konaa pe sumborombiile pe ni.
25 We daga mbe sinlɛ fɛrɛ ti ni,
we tifagawa pì pye paa we tɔnparaga yɛn;
katugu wè kapere pye Yawe Yɛnŋɛlɛ, we Yɛnŋɛlɛ li na, woro naa we tɛlɛye pe ni,
maga lɛ wa we punwɛ sanga wi ni fɔ ma pan ma gbɔn nala.
Wee yɛnlɛ mbe logo Yawe Yɛnŋɛlɛ, we Yɛnŋɛlɛ li yeri.»