Yeŋge lege ŋga ki yɛn ma Yɛnŋɛlɛ li ndanla
58
1 We Fɔ wì yo fɔ: «Ta jɔrɔgi ŋgbanga ma yagbotirige ki ni fuun ki ni,
maga ka pyeri;
ma magala li yirige paa mbanlaga magala yɛn,
mala woolo pe kambasinnde ti naga pe na,
ma poro Zhakɔbu setirige piile pe kapere ti yo pe kan.
2 Pe yɛn nala lagajaa pilige pyew,
pe yɛn naga jaa mbanla koŋgolo ke jɛn;
pè pe yɛɛ pye paa cɛnlɛ la yɛn, na li yɛn na tanri kasinŋge ki na,
na lii je li Yɛnŋɛlɛ li kakɔnndɛgɛlɛ na li yɛn ma sin li na.
Pe maa jaa mbaa pe kiti wi kɔɔn mbaa yala kasinŋge ki ni,
pe maa jaa mi ŋa Yɛnŋɛlɛ mbe fulo pe tanla.
 
3 «Ɛɛn fɔ, pe maa yuun fɔ:
‹We yeŋge lege ki go ko yɛn kikiin,
mbege ta ma woro na we yaan we!
We yɛɛ tigiwɛn pi go ko yɛn kikiin,
mbege ta ma woro naga jate we?›
Kona, a mì si pe yɔn sogo ma yo fɔ:
Ye yeŋge lepilige ki na, ye nandanwa kagala koro ye maa piin,
ye maga ŋgban ye tunmbyeele pe ni fuun pe na.
4 Wele, na yaga yeŋge ki le,
kendige ye maa woo ye yɛɛ ni na maara wiin,
na leele pe gbɔɔn ye kɛŋguŋgolo ke ni tipewe pi kala na;
yeŋge lege cɛnlɛ ŋga yaa piin nala, ye woro naga piin na yala ki lelɔmɔ pi ni,
jaŋgo ye yɛnrɛwɛ pi logo wa yɛnŋɛlɛ na.
5 Naga yɛn ma, yeŋge lege cɛnlɛ ŋga ki yɛn mala ndanla pa ki yɛn yɛɛn le?
Sɛnwee wi daga mboo yɛɛ tirige yɛgɛ ŋga na koyi yɛɛn wi le?
Na sɛnwee wi kaa go ki sogo paa gbagara kanŋgaga yɛn,
mbe jatere piriwɛn yaripɔrɔ le wi yɛɛ na,
mbe sa sinlɛ wa cɔnrɔ ti ni,
naga yɛn ma, ko ye maa yinri yeŋge lege wi le?
Ko pilige ko mbe ya ti ye kala li Yawe Yɛnŋɛlɛ li ndanla mɛlɛ?
 
6 «Yeŋge lege ŋga ki yɛn mala ndanla koyi ŋga fɔ:
‹Yè yɔngɔwɔ pi le leele mbele na ye tipewe pi kala, yoo sangala pe na,
fanŋga ŋga yè taga leele pe na kila dingi pe na, yege laga pe na,
leele mbele pe yɛn na jɔlɔ, ye pe wa paa kee,
ye kulowo cɛnlɛ pyew pi laga leele pe go na.
7 Fuŋgo yɛn mbele na, ye yaakara kan pe yeri,
fyɔnwɔ fɛnnɛ mbele sinlɛsaga woro pe yeri, ye pe leŋge wa ye yinrɛ ti ni.
Ye yaripɔrɔ le lere ŋa wi yɛn witiwaga wi na,
yaga ka puŋgo le ye lewee yɛnlɛ wi ni.›
 
8 «Pa kona ki yaa pye yanwa, mbaa yinrigi ye kan paa pinliwɛ yɔn yɔnlɔ yɛn,
pa mi yaa ye yama pi kɔ le ki yɔngɔlɔ nuŋgba ke ni;
ye kasinŋge ki yaa ka pye paa ye yɛkelewe yɛn,
Yawe Yɛnŋɛlɛ li gbɔgɔwɔ pi yaa pye ye puŋgo na, mbaa ye kɔrɔsi.
9 Pa kona yaga yeri, Yawe Yɛnŋɛlɛ li yaa ye yɔn sogo,
na yaga gbele mbeli yɛnri sagawa ni, pa li yaa yo fɔ: ‹Mi ŋa!›
 
«Na yaga jɔlɔgɔ ŋga ye yɛn na tari leele pe na ki yaga,
na yaga yombɛlɛ na ye maa nari pe na konaa mbe sɛnpere nda ye maa yuun pe na ti yaga.
10 Na ye kaa ye yɛɛra yaakara ta kaan mbele fuŋgo yɛn pe na pe yeri,
na ye kaa mbele pe yɛn tege na pe kala li yɔngɔ,
pa kona yanwa yaa yiri ye kan wa diwi wi ni;
ye yembinɛ li yaa kanŋga mbe pye paa yɔnlɔ fuŋgbanga yanwa yɛn.
11 Yawe Yɛnŋɛlɛ li yaa la ye yɛgɛ sinni sanga pyew,
li yaa la ye kala li yɔngɔ ali wa lawaga tara ti ni,
mbe fanŋga le ye ni.
Ye yaa ka pye paa naŋgɔ kɛrɛ yɛn, nda ti yɛn tɔnmɔ lɛgɛrɛ laga na,
paa pulugo yɛn, ŋga ki tɔnmɔ pila waga fyew.
12 Pa ye woolo pe yaa ka ye katara lɛrɛ ti gbegele mberi kan naa fɔnŋgɔ,
yinrɛ lɛrɛ nda ti nɔgɔ kìla le maga lɛ wa faa, ye yaa ka ki mboro ti kan mberi yirige naa.
Pe yaa ka ye mɛgɛ taga mbaa ye yinri: ‹Mbogo ŋga kì jɛɛnri ki gbegelefɛnnɛ›
konaa ‹koŋgolo gbegelefɛnnɛ jaŋgo tara ti pye leele cɛnsaga naa.› »
Cɛnpilige ŋga ki yɛn ma Yɛnŋɛlɛ li ndanla
13 «Na ye kaa cɛnpilige ki cɛɛn ye woro naga jogo,
na ye woro na kee mbe saa ye nandanwa kagala piin na pilige kpoyi ki ni,
na yaga cɛnpilige ki pye ye nandanwa pilige,
na yaga gbɔgɔwɔ taga Yawe Yɛnŋɛlɛ li cɛnpilige kpoyi ki na,
na ye kaa ki gbogo mbe ye yɛɛra koŋgolo ke yaga wa, ye woro na tanri ye yɛɛra nandanwa kagala ke na,
nakoma mbaa sɛnwara yuun,
14 pa kona Yawe Yɛnŋɛlɛ li wogo ki yaa yɔgɔrimɔ kan ye yeri,
mi yaa ka ye tara ti yirige tara sannda pyew ti go na.
Ye tɛlɛ Zhakɔbu wìla tara nda ta kɔrɔgɔ, mi yaa ti yeri tanwa pi li.
Yawe Yɛnŋɛlɛ lo lì yo ma.»