Zheruzalɛmu ca ki yaa ka yiri naa fɔnŋgɔ
52
1 Yɛn ma yiri, yɛn ma yiri!
Siyɔn ca, yiri ma fanŋga le ma yɛɛ ni!
Mboro Zheruzalɛmu ca ŋga ki yɛn kpoyi, ma yaripɔrɔ tiyɔnrɔ ti le ma yɛɛ na!
Katugu leele mbele pee kɛnrɛkɛnrɛ konaa leele mbele pe yɛn fyɔngɔ ni, wo wa kpɛ se ka ye wa ma ni naa.
2 Yiri ma gbanŋgban wi yangara, maa lagala ma yɛɛ na,
ma pan ma cɛn wa ma cɛnsaga, mboro Zheruzalɛmu ca ye!
Kulowo maŋga ŋga pè le wa ma yɔlɔgɔ, ki sanga,
mboro Siyɔn ca ŋga paa sumboro yɛn.
3 Katugu pa Yawe Yɛnŋɛlɛ lì yo yɛɛn fɔ: «Kì kaa pye pàa ye pɛrɛ sɔnŋgɔ fu na, penjara se ka sara fun mbe ye go shɔ.» 4 Katugu pa we Fɔ, Yawe Yɛnŋɛlɛ lì yo yɛɛn fɔ: «Maga lɛ wa faa, na woolo pàa kari wa Ezhipiti tara ma saa cɛn wa; ko puŋgo na, a Asiri tara fɛnnɛ pè si pan ma baga pe na ma pe jɔlɔ go fu.» 5 Yawe Yɛnŋɛlɛ lo lì yo ma fɔ: «Koni yiŋgi mi daga mbe pye? Katugu pànla woolo pe yigi ma kari pe ni kulowo ni wagafe. Mbele pè cɛn pe go na fanŋga, pe yɛn na cew tawa yɔgɔrimɔ kɔŋgɔlɔ waa. Pe yɛn nala mɛgɛ ki jogo pilige pyew. Yawe Yɛnŋɛlɛ lo lì yo ma. 6 Ki kala na, pilige ka, na woolo pe yaa kanla mɛgɛ ki jɛn. Ko pilige ko ni, pe yaa kaga jɛn fɔ muwi mì para. Mi kpaw muwi!»
Yɛnŋɛlɛ li yaa sɔngɔrɔ mbe pan wa Zheruzalɛmu ca
7 Mbele pe yɛn na paan sɛntanra ti ni mberi yo,
pe panlɔmɔ pi yɛn ma yɔn wa yanwira ti na,
poro mbele pe yɛn na yɛyinŋge sɛnrɛ ti yari,
na yarijɛndɛ sɛntanra ti yuun,
na shɔwɔ pi sɛnrɛ ti yari,
naga yuun Siyɔn ca ki kan fɔ: «Ye Yɛnŋɛlɛ lo lì yɛn wunluwɔ we
8 Ye ca kɔrɔsifɛnnɛ pe magaŋgala ke yɛn na yinrigi,
pè pinlɛ na cew tawa yɔgɔrimɔ kɔŋgɔlɔ waa;
katugu poro jate pe yɛn naga yaan yɛnlɛ ni
fɔ Yawe Yɛnŋɛlɛ lì sɔngɔrɔ na paan wa Siyɔn ca.
9 Zheruzalɛmu katara woolo, ye pinlɛ yaa jɔrɔgi nayinmɛ ni;
katugu Yawe Yɛnŋɛlɛ li yɛn na Zheruzalɛmu ca woolo pe kotoro ti sogo pe na,
li yaa Zheruzalɛmu ca ki go shɔ.
10 Yawe Yɛnŋɛlɛ lìli yawa po naa li yɛn kpoyi yɛgɛ ŋga na ki naga cɛngɛlɛ sanŋgala ke yɛgɛ na;
leele pe ni fuun pe yaa ka we Yɛnŋɛlɛ li shɔwɔ pi yan sa gbɔn fɔ wa tara ti kɔsaga ki na.
Yɛnŋɛlɛ li yaa kali woolo pe yirige wa Babilɔni tara
11 Yaa kee, yaa kee ye yiri laga ki laga ŋga ki ni!
Yaga ka jiri fyɔngɔ yaraga ka kpɛ na.
Ye yiri wa Babilɔni ca ki ni, ye ye yɛɛ pye kpoyi,
yoro mbele ye maa Yawe Yɛnŋɛlɛ li gbɔgɔyaara ti lee we.
12 Yaga ka yiri wa fyɛlɛgɛ na,
yaga ka fe mbe yiri,
katugu Yawe Yɛnŋɛlɛ li yaa ka keli ye yɛgɛ,
lo na Izirayɛli woolo Yɛnŋɛlɛ le, li yaa ka pye ye puŋgo na.
Yurugo tijɛrɛ wogo: Yɛnŋɛlɛ li tunmbyee wi jɔlɔgɔ kala
13 Yɛnŋɛlɛ lì yo fɔ: «Wele, na tunmbyee wi kagala ke yaa kaa yɔngɔ mbaa kee yɛgɛ,
wi yɔlɔgɔ ki yaa ka yiri caw,
wi yaa ka gbɔgɔwɔ ta,
wi yaa ka yiri naayeri fɔ jɛŋgɛ.
14 Wìla pye fyɛrɛ yaraga lelɛgɛrɛ yeri,
katugu wi yɛgɛ cɛnwɛ pìla jɔgɔ ma piri, pi sila yiri sɛnwee woo kɔrɔgɔ,
wi cɛnlɔmɔ pi sila sɛnwee pyɔ woo lɛ.
15 Ki kala na, wi kala lì to cɛngɛlɛ lɛgɛrɛ yɔn na fun,
wunlumbolo pele yaa ka pyeri dinw wi yɛgɛ sɔgɔwɔ,
katugu kala na pe fa li yɛgɛ yo pe kan faa, lo pe yaa yan.
Kala na pe fa logo faa, pe yaa li kɔrɔ jɛn.»