Yɛnŋɛlɛ lii je li woolo pe na
50
1 Pa Yawe Yɛnŋɛlɛ lì yo yɛɛn fɔ:
«Pɔrɔgɔ jɔgɔsɛwɛ ŋa mì kan ye nɔ ŋa wi yɛn Zheruzalɛmu ca ki yeri, ma wi pɔrɔgɔ ki sa, wi yɛn se yeri?
Ambɔ fɔgɔ kila pye na na, fɔ a mi ye pɛrɛ ki fɔ wi yeri kulolo mala fɔgɔ ki tɔn?
Ɛɛn fɔ yege jɛn ye yo fɔ pè ye pɛrɛ ye kajɔgɔrɔ to kala na;
ye nɔ wi pɔrɔgɔ kì jɔgɔ, naa yè yiri ma je ki kala na.
2 Naa mìla pan, yiŋgi na mi sila si lere yan?
Mìla ye yeri, ɛɛn fɔ lere kpɛ sigi shɔ.
Naga yɛn ma, na kɛɛ ki were ma toro mbe ye shɔ wi le?
Naga yɛn ma, fanŋga woro na ni mbe ya mbe ye shɔ wi le?
Ma si yala, na mi ka gbanla nuŋgba kɔgɔje wi na, wi ma waga,
mi ma gbaanla pe kanŋga ma pe pye lawaga;
ŋgbanra ti ma fɔngɔ tɔnmɔ lama pi kala na,
katugu wɔgɔ ki mari gbo.
3 Mi ma diwi wi le wa naayeri maa fo paa paraga yɛn,
mbe naayeri lara ti tɔn paa lere ma kaa jatere piriwɛn yaripɔrɔ le wi yɛɛ na we.»
Yurugo taanri wogo: Yɛnŋɛlɛ li tunmbyee wi kala
4 We Fɔ, Yawe Yɛnŋɛlɛ lìlan naga sɛnrɛ yolɔmɔ pi ni,
jaŋgo lere ŋa wi yɛn tege na, mbe ya mboo saga na sɛnyoro ti ni.
Pinliwɛ nuŋgba nuŋgba pyew li mala yɛn,
li mala yɛn, jaŋgo mbe nuŋgbolo jan mbaa nuru paa fɔrɔgɔfɛnnɛ yɛn.
5 Ee, we Fɔ, Yawe Yɛnŋɛlɛ lìlan nuŋgbogolo ke yɛngɛ;
mii yiri mbe je, mii si sɔngɔrɔ puŋgo na.
6 Mìla na pɔgɔlɔ ke kan na gbɔnfɛnnɛ pe yeri,
mala mbatelege ki jan mbele pàa pye nala siyɔ wi kologi pe kan;
mbele pàa pye nala tegele konaa na cɛnrɛ ti surugun na na,
mi sila na yɛgɛ ki lara pe na.
 
7 Ɛɛn fɔ we Fɔ, Yawe Yɛnŋɛlɛ lìlan saga,
ki kala na, mi sila go sogo,
ki kala na, mìla na go ki sheli paa sinndɛlɛgɛ yɛn;
katugu mìla ki jɛn ma yo mi se fɛrɛ shɔ.
8 Ŋa wi yɛn na tanga ki kaan na yeri, wi yɛn na tanla tɔɔn;
ambɔ wila jaa mbe kiti kɔn na na?
Ki lerefɔ wi pan we kari wa kiti kɔnsaga.
Ambɔ wi yɛn na winfɔ wo?
Ki lerefɔ wi yiri wi pan na mɛgɛ ni.
9 Ee, we Fɔ, Yawe Yɛnŋɛlɛ lìlan saga,
ambɔ wi mbe ya mbe kiti kɔn mboo jan na na?
Na winfɛnnɛ pe ni fuun pe yaa kɔn mbe toori paa parisankɔnrɔ kɔnrɔ yɛn,
fyɛnrɛ yaa ka ye pe ni mbe pe ka mbe pe kɔ.
 
10 Ye ni, ambɔ wi maa fyɛ Yawe Yɛnŋɛlɛ li yɛgɛ
nali tunmbyee wi sɛnrɛ ti nuru?
Lere o lere wi yɛn na tanri wa wɔwɔ pi ni;
yanwa kpɛ si woro wi yeri wa wi konɔ li ni,
wo mboo jigi wi taga Yawe Yɛnŋɛlɛ li na,
wuu kɛɛ ki kan wi Yɛnŋɛlɛ lo na.
11 Ɛɛn fɔ yoro mbele fuun ye yɛn na kasɔn ki muni,
ma ye yɛɛ maga wangala kasɔn wogolo ni,
yaa kee ye sa ye wa kasɔn ŋga yè mu ye yɛ ki ni,
konaa wa ye wangala kasɔn wogolo ke sɔgɔwɔ.
Muwi mi yaa ti ki wogo ŋga ki gbɔn ye na,
ye yaa ka sinlɛ mbe ku wa jɔlɔgɔ ki ni.