Yurugo shyɛn wogo: Yawe Yɛnŋɛlɛ li tunmbyee
49
1 Yoro lɔgɔ furo tara fɛnnɛ, ye logo na yeri!
Yoro taleere fɛnnɛ, ye nuŋgbolo jan na yeri!
Yawe Yɛnŋɛlɛ lìlan yeri mala ta wa na nɔ wi lara,
làa na mɛgɛ ki taga maga lɛ wa na sesanga wi ni.
2 Lìlan yɔn ki pye kì tanla, paa tokobi yɔn tanga woo yɛn,
lìlan lara wa li kɛɛ ki nɔgɔ.
Lìlan pye paa wanla yɛn, na pèli yɔn ki wɔ,
lìlan lara wa li sanŋgbɔ wi ni.
3 Lìgi yo na kan fɔ: «Mboro Izirayɛli tara, mboro ma yɛn na tunmbyee we,
mboro mi yaa tɛgɛ mbanla gbɔgɔwɔ pi naga.»
4 Mi wo na, a mì silan yɛɛ pye fɔ: «Mìlan yɛɛ te jaga,
mìlan fanŋga kì kɔ wagafe, tɔnli fu kala na.
Ɛɛn fɔ ŋga ki daga na ni, ki yɛn Yawe Yɛnŋɛlɛ lo yeri,
na sara wi yɛn wa Yɛnŋɛlɛ lo yeri.»
 
5 Koni, Yawe Yɛnŋɛlɛ lì para,
lo lìlan fanri maga lɛ wa na nɔ wi lara, mala pye li tunmbyee,
jaŋgo mbe ti Zhakɔbu setirige piile pe sɔngɔrɔ li kɔrɔgɔ,
mbe poro Izirayɛli woolo pe gbogolo wa li tanla.
Mì gbɔgɔwɔ ta Yawe Yɛnŋɛlɛ li yeri,
na Yɛnŋɛlɛ lo li yɛn na fanŋga ye.
6 Làa na pye fɔ: «Mbɔɔn pye na tunmbyee,
mbe ta mbe Zhakɔbu setirige piile pe cɛnlɛ li yirige,
mbe ta mbe poro Izirayɛli woolo sanmbala mbele pè koro go na pe pye pe sɔngɔrɔ pe pan,
ki kɔ wo ma.
Ɛɛn fɔ mi yaa ma pye paa yanwa yɛn cɛngɛlɛ sanŋgala ke kan,
jaŋgo na shɔwɔ kala li gbɔn fɔ wa tara ti kɔsaga ki na.»
Yɛnŋɛlɛ li yaa ka pan Izirayɛli woolo pe ni
7 Yawe Yɛnŋɛlɛ lo li yɛn Izirayɛli woolo pe go shɔfɔ, ma pye pe Yɛnŋɛlɛ kpoyi le;
lere ŋa pe yɛn na tifaga,
a wì pye yaritijaanga cɛngɛlɛ sanŋgala ke yɛgɛ na,
ma pye fanŋga fɛnnɛ pe kulo,
Yawe Yɛnŋɛlɛ na Izirayɛli woolo pe go shɔfɔ, ma pye pe Yɛnŋɛlɛ kpoyi le,
pa lì yo yɛɛn wi wogo na fɔ:
«Na wunlumbolo paga kɔɔn yan, pe yaa yiri mbe yere;
na tara teele paga kɔɔn yan, pe yaa fɔli ma yɛgɛ sɔgɔwɔ mbɔɔn gbɔgɔ,
Yawe Yɛnŋɛlɛ na li yɛn sɛnrɛ nuŋgba yofɔ li kala na,
lo na li yɛn Izirayɛli woolo Yɛnŋɛlɛ kpoyi na lɔ̀ɔn wɔ we.»
 
8 Yawe Yɛnŋɛlɛ lì yo fɔ: «Mɔ̀ɔ yɛnrɛwɛ pi logo na wagati jɛnŋɛ wi ni,
mɛɛ ma saga shɔwɔ pilige ki ni.
Mi yaa lɔɔn go singi, mbɔɔn tɛgɛ ma pye yɔn finliwɛ pi lefɔ mi naa leele pe sɔgɔwɔ,
mbe tara ti yirige naa fɔnŋgɔ,
mbe kɔrɔgɔ tara nda tì jɔgɔ ma koro waga ti yɛɛlɛ pe na naa;
9 mbege yo kasopiile pe kan fɔ: ‹Ye yiri wa kaso,›
mbege yo mbele pe yɛn wa diwi wi ni pe kan fɔ: ‹Ye yiri wa diwi wi ni!›
Pa kona, pe yaa kaa taa mbaa nii koŋgolo ke yɔn na,
mbaa yaakara taa mbaa kaa wa tinndiye pe ni fuun pe na, paa yaayoro ŋgbelege yɛn.
10 Fuŋgo se ka pe yigi naa, wɔgɔ se ka pe yigi naa,
gbinri tifɛlɛgɛ tufunwɔ naa yɔnlɔ se ka pe ya naa;
katugu ŋa wi yɛn na pe yinriwɛ taa, wi yaa pe yɛgɛ sin,
mbe kari pe ni puluyo tɔnmɔ tanla.
11 Mi yaa koŋgolo wɔ wa na yanwira ti ni fuun ti go na,
mbanla koŋgbɔrɔ ti yɔn yala.
12 Na woolo pe mbele paa paan ma yiri fɔ lege,
pele mbele pè yiri wa yɔnlɔparawa kamɛŋgɛ kɛɛ yeri, konaa ma yiri wa yɔnlɔ tosaga kɛɛ yeri;
pele mbele pe yɛn na paan ma yiri wa Sinimu tara.»
13 Mboro naayeri, ta nayinmɛ kɔŋgɔlɔ waa!
Mboro tara, ta yɔgɔri!
Yoro yanwira, yaa nayinmɛ yuuro koo!
Katugu Yawe Yɛnŋɛlɛ li yɛn nali woolo pe kotogo ki sogo pe na,
li yɛn na li woolo mbele pe yɛn tege na pe yinriwɛ taa.
Yɛnŋɛlɛ li se fɛgɛ li woolo pe na
14 Siyɔn ca woolo pàa pye na yuun fɔ: «Yawe Yɛnŋɛlɛ lì we wa,
we Fɔ wì fɛgɛ we na.»
15 Naga yɛn ma, jɛlɛ wi mbe ya mbe fɛgɛ wi pyɔ ŋa wi yɛn na wɔnri wi na, wi na le?
Naga yɛn ma, wi soo yɛɛra pisee wi yinriwɛ ta wi le?
Ali na wi ka fɛgɛ wi na, mi wo se fɛgɛ ye na fyew.
16 Wele, mboro Siyɔn ca, mɔ̀ɔ kerikeri wa na kɛndala paa tɛgɛrɛ yɛn,
mbogo ŋga ki yɛn mɔɔ maga, ki yɛn na yɛgɛ sɔgɔwɔ sanga pyew.
17 Ma piile pe yɛn na fee na paan,
ma si yala, mbele pɔ̀ɔn tɔngɔ konaa mɔɔ jɔgɔ mɔɔ pye kataga, pe yaa kari mbe laga ma na.
18 Ma yɛgɛ ki yirige ma wele mɔɔ yɛɛ maga,
ma piile pe ni fuun pe yɛn na pe yɛɛ gbogolo na paan ma kɔrɔgɔ.
Mbege ta mi yɛn Yɛnŋɛlɛ na yinwege wolo,
mì wugu fɔ ma yaa ka pe pɔ ma yɛɛ na paa fereyaara yɛn,
mbɔɔn yɛɛ fere pe ni paa pijɔ fɔnŋɔ yɛn.
Yawe Yɛnŋɛlɛ lo lì yo ma.
19 Ma ca ŋga kì pye kataga, naa ma lara nda tì koro waga,
konaa ma tara nda tì jɔgɔ ti ni,
ti yaa ka kologo ma woolo pe na.
Mbele pàa pye nɔɔ jogo, pe yaa ka fe mbe kari mbe laga ma na.
20 Màa pye naga sɔnri mà la ma piile mbele ni,
pe yaa kaa ki yuun wa ma nuŋgbolo fɔ:
«Laga kì kologo we na, laga ka kan we yeri we ta we cɛn wa ki ni.»
21 Kona, ma yaa kaa ma yɛɛ piin fɔ:
«Ambɔ wigi piile mbele pe se na kan?
Katugu mìla pye piile fu, ma pye jambasee.
Pàa na yigi ma kari na ni kasopyɔ,
mala purɔ ma kari na ni tara ta yɛgɛ ni.
Naga yɛn ma, ambɔ wigi piile mbele pe gbegele?
Mì koro na yɛ, mbele yɛɛn poro la pye se yeri?»
 
22 Pa we Fɔ, Yawe Yɛnŋɛlɛ lì yo yɛɛn fɔ:
«Mi yaa na kɛɛ ki yirige mbe wa cɛngɛlɛ sanŋgala ke yeri,
mbanla dirapo wi yirige tara woolo pe kan.
Kona, pe yaa ma pinambiile pe lɛ kɛyɛn na, mbe pan pe ni,
mbɔɔn sumborombiile pe lɛ pajoro na mbe pan pe ni.
23 Wunlumbolo poro pe yaa ka pye teele mbele pe yɛn ma piile pe nagafɛnnɛ,
wunlunjaala poro pe yaa ka pye nɛɛlɛ mbele pe yɛn ma piile pe gbegelefɛnnɛ;
pe yaa kaa fɔli ma yɛgɛ sɔgɔwɔ, mbaa pe yɛrɛ ti jiile wa tara, mbaa ma gbogo,
mbaa ma tɔɔrɔ gbanŋgban wi laala.
Pa kona, ma yaa ki jɛn mbe yo fɔ muwi mi yɛn Yawe Yɛnŋɛlɛ le,
fɔ mbele pè pe jigi wi taga na na, pe se ka fɛrɛ shɔ.»
 
24 Naga yɛn ma, maliŋgbɔɔn kotogofɔ wì yaara nda koli wa malaga,
ti mbe ya shɔ wi yeri le?
Naga yɛn ma, lewɛlɛwɛ wì lere ŋa yigi kasopyɔ, wi mbe ya shɔ wi yeri wi le?
25 Ee, Yawe Yɛnŋɛlɛ lo lì yo ma fɔ:
«Maliŋgbɔɔn kotogofɔ wì yaara nda koli wa malaga ki na, ti yaa ka shɔ wi yeri,
lewɛlɛwɛ wì kasopyɔ ŋa yigi wa malaga, wi yaa ka shɔ wi yeri.
Mi yaa ka malaga gbɔn ma winfɛnnɛ pe ni,
mbɔɔn piile pe shɔ.
26 Mi yaa ka ti mbele pe yɛn nɔɔ jɔlɔ, pe pe yɛɛra wire kara ti ka;
pe yaa ka pe yɛɛra kasanwa pi wɔ paa duvɛn fɔnŋɔ yɛn, fɔ wila pe yɛgɛ ki kanŋgi.
Pa kona lere pyew wi yaa ki jɛn fɔ muwi mi yɛn Yawe Yɛnŋɛlɛ na li yɛn ma shɔfɔ we,
naa ma go shɔfɔ, konaa Zhakɔbu Yɛnŋɛlɛ na fanŋga gbɔgɔfɔ.»