SƐWƐ WI KƆNSAGA SHYƐN WOGO
40–55
Yɛnŋɛlɛ làa Zheruzalɛmu ca woolo pe kotogo ki sogo pe na
40
1 Ye pe kotogo ki sogo pe na, yanla woolo pe kotogo ki sogo pe na,
ye Yɛnŋɛlɛ lo lì yo ma.
2 Ye para Zheruzalɛmu ca ki ni, yege kotogo ki sogo ki na,
yege yari ki kan fɔ pe jɔlɔgɔ tunŋgbanra tì kɔ,
fɔ pe kajɔgɔrɔ tì kala yaga pe na,
fɔ Yawe Yɛnŋɛlɛ lì ki kapere ti ni fuun ti fɔgɔ ki tɔn ki na fɔ tɔnsaga shyɛn.
 
3 Lere wa magala yɛn na yinrigi na yuun fɔ:
«Ye konɔ li gbegele Yawe Yɛnŋɛlɛ li kan wa gbinri wi ni,
ye koŋgbɔgɔ wɔ, yege yala we Yɛnŋɛlɛ li kan wa ki tara nda tì waga ti ni.
4 Ye yanwira gbunlundɛrɛ ti ni fuun ti yinyin,
ye yanwira to naa tinndiye pe ni ti yaari yeri yɔn yala,
ye mbogolo ke jaraga ye ke pye falafala,
ye tigiwɛn lara nda tì tijanga ti yɔn yala.
5 Kona, Yawe Yɛnŋɛlɛ li gbɔgɔwɔ yanwa pi yaa pi yɛɛ naga,
sɛnwee pyɔ pyew wi yaa kaa yan;
katugu Yawe Yɛnŋɛlɛ lo lì yo ma
 
6 Magala la yɛn na yuun fɔ: «Ta jɔrɔgi!»
A mì sho fɔ: «Mi yaa la jɔrɔgi mbaa yuun mɛlɛ?»
A magala lì sho fɔ: «Sɛnwee pyɔ pyew wi yɛn paa yan yɛn,
pe tiyɔnwɔ pi yɛn paa yanfyɛɛnrɛ yɛn wa wasege.
7 Na Yawe Yɛnŋɛlɛ li yɔn tifɛlɛgɛ ki ka yan ki fɛ,
ki ma waga, ki fyɛɛnrɛ ti ma fanla.
Kaselege ko na, sɛnwee piile pe yɛn paa yan yɛn.
8 Yan ki ma waga, ki fyɛɛnrɛ ti ma fanla,
ɛɛn fɔ we Yɛnŋɛlɛ li sɛnrɛ ti yaa koro wa ti yɔnlɔ fɔ sanga pyew
Sɛntanra nda ti daga mbe yari
9 Mboro Siyɔn ca, lugu yanwiga titɔnlɔgɔ ka go na,
mboro ca ŋga ma maa sɛntanra ti yari we.
Mboro Zheruzalɛmu ca, ma magala li yirige ŋgbanga,
mboro ca ŋga ma maa sɛntanra ti yari we.
Maga ka fyɛ, maga yo Zhuda tara cara ti kan fɔ:
«Ye Yɛnŋɛlɛ li na!»
10 Wele, we Fɔ, Yawe Yɛnŋɛlɛ li yɛn na paan fanŋga gbɔgɔ ni,
li yɛn nali tegere ti piin li fanŋga kɛɛ ki ni.
Li yɛn na paan li sara wi ni li kɛɛ,
li tunŋgo tɔnli wì keli li yɛgɛ.
11 Li yaa kaa li woolo pe kɔrɔsi paa simbaala kɔnrifɔ yɛn;
wi yaa ka simbapiile pe gbogolo wi kɛɛ ki ni,
mbe pe lɛ mbe pe taga kotogo na.
Li yaa kaa simbanɛɛlɛ mbele piile na wɔnri pe na pe kɔnri yɔɔrɔ.
Yɛnŋɛlɛ li gbɔgɔwɔ po naa li tijinliwɛ gbɔɔ
12 Ambɔ wila kɔgɔje tɔnmɔ pi taanla wi kɛndala li ni?
Ambɔ wila naayeri wi taanla wi kɛndala gbemɛ pi ni?
Ambɔ wila tara ti gbanŋgban wi ni fuun wi le tiwiyaraga ni maa taanla?
Ambɔ wila yanwira to naa tinndiye pe nuguwɔ pi taanla culo na?
13 Ambɔ wi Yawe Yɛnŋɛlɛ li nawa jatere gbemɛ pi jɛn?
Ambɔ wi yɛn li yɛrifɔ mali naga?
14 Laa yɛrɛwɛ pi lagaja ambɔ yeri, jaŋgo mbe kagala kɔrɔ jɛnmɛ pi ta?
Ambɔ wi kasinŋge konɔ tangala li naga wi na?
Ambɔ wili naga jɛnmɛ pi ni,
ma kajɛnmɛ konɔ li naga li na?
 
15 Wele, cɛngɛlɛ ke yɛn li yɛgɛ na paa tɔnmɔ sɔlɔsaga nuŋgba yɛn, ma yiri kpoŋgbo ni,
ke yɛn paa tambyɔ nuŋgba yɛn culo na;
lɔgɔfuro tara ti yɛn li yɛgɛ na paa gbanŋgban yɛn wa naayeri.
16 Liban tara tire ti ni fuun ti se ya mbeli saraga sogowo kanŋgirɛ ti bɔ,
ti yaayoro ti se ka bɔ mbe pye li saara sogoworo.
17 Cɛngɛlɛ ke ni fuun ke woro yaraga ka li yɛgɛ na,
li yɛn na ke jate kayɔngɔ fu yaara, ma pye wagafe.
Yɛnŋɛlɛ li yɔngɔ woro wa
18 Ye yɛn na jaa mbe Yɛnŋɛlɛ li taanla yiŋgi yaraga ni?
Yaraga yanlɛgɛ kikiin ye mbe gbegele ki yiri li kɔrɔgɔ?
19 Kapyɔ jɛnfɔ wi ma tugurɔn ti yan ma yaraga yanlɛgɛ ka gbegele,
tɛ gbɔnfɔ wi ma tɛ wi yan mboo wo ki na,
mbe si warifuwe yɔngɔwɔ yaŋgala kele tɛgɛ mbege fere.
20 Lere ŋa ka pye fyɔnwɔ fɔ mbe sa toro, mbe pye wi se ya ko wogo ŋga ko ka ta,
ko fɔ wo ma saa tige ka lagaja, ŋga kambuguwo se ya mbege jɔgɔ.
Wi mɛɛ saa kapyɔ jɛnfɔ wa lagaja,
wo mbe yaraga yanlɛgɛ ka gbegele yarisunŋgo, ŋga wi mbe ya yerege, ki yere tiyɔngɔ.
 
21 Ye sigi jɛn wi le? Ye faga logo wi le?
Pe faga yo ye kan maga lɛ wa fafafa wi le?
Pe tara ti nɔgɔ ki teŋge yɛgɛ ŋga na, ye sigi wogo ki jɛn mbe wali ki na wi le?
22 Yawe Yɛnŋɛlɛ lo li yɛn ma cɛn wa tara ti go na, to nda ti yɛn kiiri,
tara na woolo pe yɛn li yɛgɛ na paa kambɛɛrɛ yɛn.
Lo lì naayeri wi jaraga paa parigbɔgɔ fɛgɛfɛgɛ yɛn,
ma naayeri wi pye paa paraga go yɛn, mbe cɛn wa ki nawa.
23 Li ma tara ti fanŋga fɛnnɛ pe pye yarijagara,
mbe dunruya kiti kɔnfɛnnɛ pe pye leele mbele pe woro yaraga ka.
24 Na pè pe tɛgɛ, pa paa cɛɛn,
pe yɛrɛ fa ta mbe ndire kan wa tara,
a Yɛnŋɛlɛ lì si pe fɛ li yɔn tifɛlɛgɛ ki ni, a pè si waga.
A tisaga tifɛlɛgɛ kì si pe lɛ paa yan waga yɛn.
 
25 Yɛnŋɛlɛ na kpoyi lì yo fɔ:
«Ye yɛn na jaa mbanla taanla ambɔ fɔ ni?
Mi naa ambɔ we yala?»
26 Ye ye yɛrɛ ti yirige ye wele wa naayeri!
Ambɔ wigi yaara nda ti da?
Wo wi yɛn ŋa wi ma wɔnŋgɔlɔ ke yirige ma ke tanli ke yɛɛ na paa maliŋgbɔɔnlɔ yɛn,
wi maa ke ni fuun nuŋgba nuŋgba ke yinri ke mɛrɛ ti na.
Wi fanŋga gbɔgɔ ko naa wi yawa gbɔɔ pi kala na, ali nuŋgba lo na la wa ke ni.
Yɛnŋɛlɛ li yaa ka fanŋga fɔnŋgɔ le fanŋga fu fɛnnɛ pe ni
27 Yoro Zhakɔbu setirige piile, yiŋgi na, a ye nɛɛ ki sɛnrɛ nda ti yuun?
Yoro Izirayɛli woolo wele, yiŋgi na, a ye nɛɛ ki sɛnrɛ nda ti yuun nari tagala ti yɛɛ na fɔ:
«We yinwege kala li yɛn ma lara Yawe Yɛnŋɛlɛ li na,
we daga mbe tanga ta laga ŋga na, li woro naga jate.»
28 Ye sigi jɛn wi le?
Ye faga logo wi le?
Yawe Yɛnŋɛlɛ lo li yɛn Yɛnŋɛlɛ na li yɛn kɔsaga fu,
lo lì tara ti da ma gbɔn fɔ wa ti kɔsaga ki na.
Li fanŋga ki se kɔ, li se te,
li tijinliwɛ pi se ya jɛn mbe kɔ.
29 Li ma fanŋga kan ŋa wì te wi yeri,
mbe fanŋga le ŋa wi fanŋga kì kɔ wi ni.
30 Lefɔnmbɔlɔ yirifɔnmbɔlɔ pe ma te, pe fanŋga ki ma kɔ pe ni;
ali lefɔnmbɔlɔ tugbɔmbɔlɔ pe ma kurugo ma to.
31 Ɛɛn fɔ mbele pe maa wele Yawe Yɛnŋɛlɛ li yeri,
pe maa fanŋga taa.
Pe maa yinrigi sire na paa yɔn yɛn,
pe maa fee, paa te,
pe maa tanri, pe fanŋga kila kɔ.