Izirayɛli woolo pe yaa yiri wa kulowo pi ni mbe sɔngɔrɔ wa pe tara
14
1 Ki yɛn ma filige fɔ Yawe Yɛnŋɛlɛ li yaa Zhakɔbu setirige piile pe yinriwɛ ta naa, li yaa ka poro Izirayɛli woolo pe wɔ naa. Li yaa ka sɔngɔrɔ pe ni wa pe tara ti ni naa. Nambanmbala yaa ka pan mbe taga pe na, pe yaa ka pinlɛ mbe cɛn poro Zhakɔbu setirige piile pe ni.
2 Cɛngɛlɛ kele yɛgɛ woolo yaa ka pe lɛ mbe kari pe ni wa Izirayɛli tara. Izirayɛli woolo pe yaa ka ki cɛngɛlɛ woolo pe pye pe kulonambala naa pe kulojaala wa Yawe Yɛnŋɛlɛ li tara ti ni. Cɛngɛlɛ woolo mbele pàa Izirayɛli woolo pe yigi malaga kasopiile, Izirayɛli woolo pe yaa ka poro fun pe yigi malaga kasopiile, mbele pàa pye ma cɛn Izirayɛli woolo pe go na, Izirayɛli woolo poro pe yaa ka cɛn poro go na.
Babilɔni tara wunlunaŋa wi kunwɔ sɛnrɛ
3 Na Yawe Yɛnŋɛlɛ liga ka wogosaga kan yoro Izirayɛli woolo ye yeri sanga ŋa ni, ye tege naa ye jɔlɔgɔ ki puŋgo na, konaa kulowo tunŋgbanra nda tìla taga ye na ti puŋgo na, 4 pa kona yege yurugo ŋga ki le Babilɔni tara wunlunaŋa wi na, ye yo fɔ:
E, kì pye mɛlɛ, leele jɔlɔfɔ wì wogo kì si kɔ yɛɛn?
Wi fanŋga ŋga wìla taga leele pe na kì kɔ.
5 Yawe Yɛnŋɛlɛ lì lepeele pe fanŋga kanŋgala li kaari,
ma fanŋga fɛnnɛ tipeele pe wunluwɔ kanŋgala li kaari.
6 Wo wìla koro na tara sannda ti woolo pe kuun wa wi naŋgbanwa gbɔɔ pi ni, na pe kuun kɔnlɔ fu;
wa wi kɔnrɔ tandorogo ki ni, wìla cɛngɛlɛ sanŋgala ke go sogo fanŋga na,
ma jɔlɔgɔ gbɔgɔ wa pe na, ŋga kɔsaga woro ki na.
 
7 Koni tara ti ni fuun ti yɛn yɛyinŋge na na wogo;
leele pe yɛn na yɔgɔrimɔ yuuro koo.
8 Ali yɛrɛ sipirɛsi tire to naa Liban tara sɛdiri tire ti yɛn na yɔgɔri ma tolo li kala na.
Tì yo fɔ: «Maga lɛ mà to,
tire kɔnfɛnnɛ pe woro na paan mbaa we kɔɔn.»
9 Kuulo tara ti yɛn na tinni wa nɔgɔna, nɔɔ panga ki singi mbɔɔn fili;
ti yɛn na kuulo pe yɛnni ma kala na,
mbele fuun pàa pye legbɔɔlɔ laga dunruya wi ni we.
Ti yɛn na cɛngɛlɛ ke wunlumbolo pe ni fuun pe yinrigi wa pe wunluwɔ jɔnrɔ ti na ma kala na.
10 Pe ni fuun pe yaa ka sɛnrɛ ti lɛ mbɔɔn pye fɔ:
«Mboro fun ma pye fanŋga fu fɔ paa we yɛn,
mboro fun mà pye paa we yɛn.»
11 Ma yɛɛ gbɔgɔwɔ pì tigi wa kuulo tara ti ni,
konaa ma juruye magaŋgala ke ni;
fanga fyɛnrɛ to tì pye ma sinlɛyaraga ye,
fyɛnrɛ tunmɔɔrɔ to tì pye ma paritɔnŋgɔ ye.
12 E, yindogo wɔnnɔ, lalaaga wɔnnɔ!
Mboro mà yiri wa yɛnŋɛlɛ na ma to yɛɛn?
Pɔ̀ɔn wa tara,
mboro ŋa màa fanŋga ta cɛngɛlɛ sanŋgala ke na we.
13 Màa pye naga yuun wa ma nawa fɔ:
«Mi yaa lugu mbe kari fɔ wa yɛnŋɛlɛ na,
mi yaa sanla wunluwɔ jɔngɔ ki tɛgɛ fɔ wa Yɛnŋɛlɛ li wɔnŋgɔlɔ ke go na;
mi yaa sa cɛn fɔ wa yanwiga ŋga yɛngɛŋgɛlɛ ke maa ke yɛɛ gbogolo wa ki na,
fɔ wa yɔnlɔparawa kamɛŋgɛ kɛɛ ki puŋgo na.
14 Mi yaa lugu mbe kari fɔ wa kambaara ti go na,
mi yaa pye paa Yɛnŋɛlɛ na yaara ti ni fuun ti go na li yɛn
15 Ɛɛn fɔ pɔ̀ɔn wɔnrɔgɔ mɔɔ tirige wa kuulo tara ti ni,
fɔ wa wegbɔgɔ tijugo ki nɔgɔna.
16 Leele mbele kɔɔn yan, poro yaa pe yɛngɛlɛ ke kan ma na lɔɔn wele,
pe yaa lɔɔn kɔrɔsi jɛŋgɛ mbe yo fɔ:
«E, naŋa ŋa wìla pye na tara ti tigile, wowi yɛɛn gbari?
Wo ŋa wìla pye na wunluwɔ tara sannda ti yɛgɛyɛgɛ we.
17 Wo ŋa wìla pye na tara ti kanŋgi nari piin gbinri na kee,
na cara ti tɔnri;
kìla pye, mbele wì yigi malaga kasopiile, wila yɛnlɛ mbe wa wa fyew.»
18 Cɛngɛlɛ sanŋgala ke wunlumbolo pe ni fuun,
ee, pe ni fuun pe yɛn ma sinlɛ na wogo wa pe fanra ti ni gbɔgɔwɔ ni.
19 Ɛɛn fɔ mboro wo na, pɔ̀ɔn wa wa funwa na, mɔɔ laga lali ma fanga ki ni.
Mà pye paa pyɔ ŋa wì ku wa wi nɔ lara, a pè suu se;
ŋa wi kala li lakɔ leele pe na.
Pɔ̀ɔn yɔn tɔn wa leele mbele pè gbo pe sɔgɔwɔ,
poro mbele pè pe gbo tokobi ni, ma pe gboolo pe wa waliwege ka ni wa sinndɛɛrɛ ti na.
Mà pye paa gboo yɛn, ŋa leele pòo tangala.
20 Pe se kɔɔn le fanga ni paa wunlumbolo sanmbala pe yɛn,
katugu mɔ̀ɔ tara ti jɔgɔ,
mɔ̀ɔ tara woolo pe gbo.
Lepee wi cɛnlɛ li mɛgɛ ki se ka yeri naa fyew.
 
21 Ye pe piile pe gbo kala li gbɛgɛlɛ,
pe teele pe kambasinnde ti kala na,
jaŋgo paga ka yiri pilige ka mbe tara ti shɔ mberi ta,
mbe pe cara ti kan lagapyew ki ni.
22 Yawe Yɛnŋɛlɛ na yawa pi ni fuun fɔ lo lì yo ma fɔ: «Mi yaa ka yiri pe kɔrɔgɔ. Mi yaa ka Babilɔni ca ki tɔngɔ mbege mɛgɛ ki kɔ mbege wɔ wa, naa leele jɛnri mbele pe yaa ka koro wa ki ni pe ni, naa ki piile konaa ki setirige piile pe ni. Yawe Yɛnŋɛlɛ lo lì yo ma. 23 Mi yaa kaga pye njuguniye pe cɛnsaga konaa mbege pye laŋgɔrɔgɔ. Mi yaa kaga pɛ kambɛrɛ nda ti maa jɔgɔwɔ piin ta ni.» Yawe Yɛnŋɛlɛ na yawa pi ni fuun fɔ lo lì yo ma.
Yɛnŋɛlɛ yɔn sɛnrɛ nda tìla yo Asiri tara ti wogo na
24 Yawe Yɛnŋɛlɛ na yawa pi ni fuun fɔ lì wugu ma yo fɔ:
«Ŋga mì sɔnri mbe pye, ko ki yaa pye.
Ŋga mì kɔn ma tɛgɛ mbe pye, ki yaa pye mbe yɔn fili!
25 Mi yaa ka Asiri tara fɛnnɛ pe tɔngɔ laga na tara ti ni,
mi yaa ka pe tangala wa na yanwira ti na.
Nɛrɛ tunŋgo pyetige ŋga pè taga na woolo pe na na pe tege, mi yaa ki laga pe na,
tuguro nda pè taga pe na, mi yaa ti laga wa pe pajoro ti na.»
 
26 Kala na we Fɔ wì kɔn ma tɛgɛ dunruya lomboŋɔ wi wogo na, loli na;
lìli kɛɛ ki yirige cɛngɛlɛ ke ni fuun ke na, mbe kala na pye ke na, loli na.
27 Yawe Yɛnŋɛlɛ na yawa pi ni fuun fɔ lo lìgi kala na li kɔn ma li tɛgɛ;
ambɔ wi mbe ya mbeli sa?
Lìli kɛɛ ki yirige mbeli pye,
ambɔ wi mbe ya mbege yerege?
Yɛnŋɛlɛ yɔn sɛnrɛ nda tìla yo Filisiti tara ti wogo na
28 Wunlunaŋa Ahazi wìla ku yɛlɛ na ni ko ki Yɛnŋɛlɛ yɔn sɛnrɛ nda tìla yo, ma yo fɔ:
29 Yoro Filisiti tara lombondo, yaga kaa yɔgɔri
mbe yo fɔ ye gbɔnkanŋgaga kì kaari;
katugu firisho yaa yiri wa wɔɔgɔ kugo ki ni,
ko yaa pyɔ ŋa se, wo yaa pye wɔɔgɔ pege, ŋga ki yɛn kanwira wogo.
30 Pa kona, mbele pe yɛn tege na ma wɛ pe ni fuun na, pe yaa la yaakara taa mbaa kaa,
fyɔnwɔ fɛnnɛ pe yaa wogosaga ta mbe pye yɛyinŋge na pɔw.
Ɛɛn fɔ yoro Filisiti tara fɛnnɛ, mi yaa ye setirige piile pe gbo fuŋgo ni,
ye woolo mbele fuun pe yaa ka koro yinwege na, mi yaa ka pe gbo.
 
31 Mboro ca yeyɔngɔ, ta gbele!
Mboro cagbɔgɔ, ta jɔrɔgi;
yoro Filisiti tara lombondo, yaa seri fyɛrɛ ti na,
katugu wirige ka yɛn na yinrigi wa yɔnlɔparawa kamɛŋgɛ kɛɛ yeri na paan,
wa ki leele pe maliŋgbɔɔnlɔ ŋgbelege ki ni, lere wa kpɛ si koro puŋgo na.
32 Ki cɛnlɛ na li pitunmbolo, we yaa pe yɔn sogo yiŋgi ni?
Fɔ Yawe Yɛnŋɛlɛ lo lì Siyɔn ca ki kan,
fɔ wa li woolo pe ni, mbele pe yɛn fyɔnwɔ fɛnnɛ pe yaa larasaga ta wa.