Zhuda tara naa Zheruzalɛmu ca kagala kè gbɔn ma piri
3
1 Ye wele, we Fɔ, Yawe Yɛnŋɛlɛ na yawa pi ni fuun fɔ,
li yaa Zheruzalɛmu ca woolo naa Zhuda tara woolo pe sagawa pi yirisaga ki ni fuun ki shɔ pe yeri konaa pe kɛɛndagaserege ki ni fuun ki ni,
li yaa pe yaakara tasara ti ni fuun konaa pe tɔnmɔ tasara ti ni fuun ti kɔ mberi wɔ wa;
2 naa nambala kotogofɛnnɛ konaa maliŋgbɔɔnlɔ pe ni,
naa kiti kɔnfɛnnɛ konaa Yɛnŋɛlɛ yɔn sɛnrɛ yofɛnnɛ pe ni,
naa jɛlɛfɛnnɛ konaa lelɛɛlɛ pe ni;
3 naa maliŋgbɔɔnlɔ teele mbele pe yɛn nambala nafa shyɛn ma yiri kɛ kɛ go na
konaa legbɔɔlɔ pe ni,
naa yɛrifɛnnɛ konaa kapyɔ jɛnfɛnnɛ pe ni,
naa lekara jɛnfɛnnɛ jɛmbɛlɛ pe ni.
4 Mi yaa lefɔnmbɔlɔ kan pe yeri pe pye pe teele;
piile pe yaa ka cɛn pe go na.
5 Tara woolo pe yaa kaa pe yɛɛ jɔlɔ,
wa yaa yiri wa kɔrɔgɔ,
cɛnyɛnlɛ wa yaa yiri wi cɛnyɛnlɛ wa kɔrɔgɔ,
lefɔnŋɔ wi yaa yiri mbe je lelɛgbaraga ki na,
lejaga wi yaa yiri mbe je legbɔɔ wi na.
6 Ko wagati wo ni, lere wa yaa ka saa nɔsepyɔ lenaŋa wa yigi
wa wi tosee wi go ki ni, mboo pye fɔ:
«Derigbɔgɔ nuŋgba yɛn mboro yeri, pan ma pye we to!
Cɛn tegere ti na, maa ki katara nda ti yɛgɛ sinni!»
7 Ɛɛn fɔ ko pilige ko ni, ki lerefɔ wi yaa kaa yɔn sogo mbe yo fɔ:
«Mi woro lɔgɔtɔrɔ mbe ye yama pi gbara!
Yarikara kpɛ woro wa na go, yaripɔrɔ si woro wa;
yaga kanla tɛgɛ tara woolo pe to!»
8 Ee, Zheruzalɛmu ca teele pè kurugo,
Zhuda tara teele pè toori,
katugu pè yiri ma je Yawe Yɛnŋɛlɛ li na wa pe sɛnyoro to naa pe kapyere ti ni;
pè je li gbɔgɔwɔ pi na.
9 Poro jate pe yɛgɛ cɛnwɛ pi yɛn na pe jɛrɛgi,
pe yɛn na pe kapere ti piin kpeŋgbeleŋgbe paa Sodɔmu ca ki yɛn,
pe yɛrɛ woro nari lara.
Jɔlɔgɔ yɛn pe wogo,
katugu pe yɛn na jɔlɔgɔ gbɛgɛlɛ pe yɛɛ kan.
 
10 Ye mbe ya mbaa ki yuun fɔ lesinŋɛ wi wogo kì yɔn,
katugu wi yaa kaa kapyere jɛndɛ ti tɔnli wi ta.
11 Ɛɛn fɔ lepee wo na, jɔlɔgɔ ki yɛn wi wogo, kapege ki yaa kaa ta,
katugu kapyere nda wì pye, ko sara wo wi yaa ta.
 
12 Piile pe yɛn nala woolo pe jɔlɔ,
jɛɛlɛ pe yɛn ma cɛn pe go na.
Na woolo, ye yɛkeele pe yɛn na ye punŋgu,
pe yɛn na ye nii kombele.
Yɛnŋɛlɛ li yaa kiti kɔn li woolo pe na
13 Yawe Yɛnŋɛlɛ lì yiri mbe leele pe jɛrɛgi,
lì yiri ma yere mbe kiti kɔn li woolo pe na.
14 Yawe Yɛnŋɛlɛ li yɛn na li woolo pe lelɛɛlɛ poro naa teele pe yinri kiti na,
lì yo fɔ: «Yoro yè ɛrɛzɛn kɛrɛ ti jɔgɔ;
yè fyɔnwɔ fɛnnɛ pe kɛɛ yaara ti shɔ ma ye yinrɛ ti yin.
15 Yiŋgi na, ye nɛɛ na woolo pe jɔlɔ?
Yiŋgi na, ye nɛɛ fyɔnwɔ fɛnnɛ pe tege?
We Fɔ, Yawe Yɛnŋɛlɛ na yawa pi ni fuun fɔ lo lì yo ma.»
Yɛnŋɛlɛ làa yɛrɛwɛ kan Zheruzalɛmu ca jɛɛlɛ pe wogo na
16 Yawe Yɛnŋɛlɛ lì yo fɔ:
«Siyɔn ca jɛɛlɛ pe maa yɛgɛ tungu leele na,
pe ma pe yɔlɔgɔ ki yirige caw na tanri,
na nambala pe nɛgɛnɛgɛ pe welelɔmɔ pi ni.
Pe maa sumborowo tangala li tanri yɔɔrɔ,
na pe tɔɔrɔ wenjanra ti tinni.
17 Ki kala na, we Fɔ wi yaa Siyɔn ca jɛɛlɛ pe yinrɛ ti kulu;
Yawe Yɛnŋɛlɛ li yaa pe fɛrɛ ti yirige funwa na.»
18 Ko pilige ko ni, we Fɔ wi yaa ka pe fereyaara ti ni fuun ti wɔ pe na, to ti yɛn pe tɔɔrɔ wenjanra, naa gbatoye, naa yɔlɔgɔ somu kiiri kiiri wi ni, 19 naa nuŋgbogolo, naa kɛɛ kannjiŋgele, naa pe go tɔnmbɔgɔlɔ ke ni, 20 naa wunluwɔ njagala ŋgele pè fere ke ni, naa pe tɔɔrɔ yɔngɔwɔ pi ni, naa kurusijaraye, naa latikɔrɔ nuwɔ taan kugbogolo ke ni, naa tafoolo pe ni, 21 naa vegembele, naa numala kannjiŋgele, 22 naa fɛti yaripɔrɔ, naa bunduye, naa derigbɔrɔ, naa kɛɛ kashara, 23 naa duwaleele, naa yaripɔrɔ nda ti yɛn milɛnmilɛn, naa gbɔgɔwɔ njagala, konaa laŋganaye pe ni.
24 Pe sinmɛ nuwɔ taan pi yaa ka kanŋga mbe pye yarifɔngɔ nuwɔ,
manda ti yaa ka pye pe na kurusijaraye pe yɔnlɔ,
go yinzire nda tì kɔlɔgi kɔlɔgi, to ti yaa ka pye pe na yinrɛ nda tì ti ma yɔn ti yɔnlɔ,
kunwɔ yaripɔrɔ ti yaa ka pye pe na derigbɔrɔ tiyɔnrɔ ti yɔnlɔ,
pe witire tiyɔnwɔ pi yaa kanŋga mbe tijanga.
Zheruzalɛmu ca jɛɛlɛ pe kɔlɔmɔ
25 Mboro Siyɔn ca, tokobi wi yaa ma maliŋgbɔɔnlɔ pe gbo,
ma maliŋgbɔɔnlɔ kotogofɛnnɛ pe yaa ku malaga.
26 Kona, ca woolo pe yaa kaa jɛɛn mbaa kunwɔ gbelege gbele,
pe yaa ka koro kɛwara mbe cɛn tara.