Sumboro wìla wɔɔnrɔ wɔnlɔ lefɔnŋɔ wi ni
(Sumboro wi sɛnyoro)
3
1 Mala ta wa na sinlɛyaraga ki na yembinɛ li ni,
ŋa wi yɛn mala ndanla wa na kotogo na, mùu lagaja,
maa lagaja ma saa te, mi suu yan.
2 A mì si yiri ma ca ki yanri ma toro;
ŋa wi yɛn mala ndanla wa na kotogo na, a mùu lagaja
wa ca nawa koŋgolo ke ni konaa wa katoro ti ni.
Mùu lagaja ma saa te, mi suu yan.
3 Ca ki go sigefɛnnɛ mbele pe yɛn na ca ki mari naga go singi,
a mì si saa fili pe ni.
A mì si pe yewe ma yo fɔ: «Ŋa wi yɛn mala ndanla wa na kotogo na, yoo yan laga le?»
4 Pa mila pe tooro,
a mì si ŋa wi yɛn mala ndanla wa na kotogo na wi yan le teere.
A mì suu yigi kɛɛ na, mi soo wa naa,
fɔ mbe ka sa ye wi ni wa na nɔ wi go,
wo ŋa wìlan se, wa wi go.
5 Zheruzalɛmu ca sumbonɔ, mi yɛn na ye yɛnri ŋgbanga,
lufaala naa safiile pe mɛgɛ ni,
yaga kanla ndanlafɔ wi yirige,
yaga kaa yɛn mboo yirige,
mbege ta wi faa ki jaa gbɛn.
6 Ambɔ wi yɛn na yinrigi wa gbinri wi ni na paan ma,
paa wirige gbɔgɔ titɔnlɔgɔ yɛn?
Nuwɔ taanyaara nda pe yinri miiri, naa wusuna nuwɔ taan,
konaa nuwɔ taanyaara gbegelefɛnnɛ pe nuwɔ taanyaara ti ni fuun ti nuwɔ taan pa yɛn wi na.
7 Ye wele, wunlunaŋa Salomɔ pe maa wi lee sinlɛyaraga ŋga na koyi.
Maliŋgbɔɔnlɔ kotogofɛnnɛ nafa taanri yɛn maa maga na tanri,
Izirayɛli maliŋgbɔɔnlɔ mbele pe yɛn pe pe ni fuun kotogofɛnnɛ poro wɛlɛ.
8 Pe ni fuun pe yɛn tokobiye ni,
pè malaga gbɔngɔ ki fɔrɔgɔ maga jɛn jɛŋgɛ,
pe ni fuun nuŋgba nuŋgba pe tokobiye pe yɛn ma pɔpɔ wa pe sɛnŋgɛlɛ ke na,
mbaa pe yɛɛ go singi kaŋgbangala ke na yembinɛ.
 
9 Wunlunaŋa Salomɔ pe maa wi lee sinlɛyaraga ŋga na,
wìla ki gbegele Liban tara tire tiyɔnrɔ ni.
10 Wìla ki jegele ke gbegele warifuwe ni,
ma ki tɛlɛgɛsaga ki gbegele tɛ ni,
ma ki cɛnsaga ki gbegele kondoro paraga tiyɔngɔ ni.
Zheruzalɛmu ca sumbonɔ, pège nawa pi gbegele, maa sɔgɔ, maa yɔn ndanlawa pi kala na.
11 Siyɔn ca sumbonɔ, ye yiri, ye pan ye wunlunaŋa Salomɔ wi wele,
wunluwɔ njala li ni wa wi go na!
Lo wi nɔ wìla kan wi kan wi jayire pilige ki na.
Ko pilige ko kìla pye wi nayinmɛ pilige ye.