Wunlunaŋa wa na Yɛnŋɛlɛ li shari cew ŋa lì kan wi yeri wi juguye pe na wi wogo na
144
1 Davidi wogo.
Yawe Yɛnŋɛlɛ, mboro ŋa ma yɛn paa na walaga yɛn nala go singi, sɔnmɔ yɛn ma woo!
Lo lìlan kɛyɛn yi fɔrɔgɔ malaga gbɔngɔ ki ni,
mala yombɛgɛlɛ ke naga malaga gbɔnlɔmɔ pi ni.
 
2 Lo li yɛn na kajɛŋgɛ pyefɔ konaa na go sigefɔ,
naa na malaga sigeca, ŋga ni mìlan yɛɛ karafa konaa na shɔfɔ;
lo li yɛn na tugurɔn sigeyaraga nala go singi konaa na larasaga,
lo lì ti, a na woolo pe go sogo na kan.
3 Yawe Yɛnŋɛlɛ, sɛnwee wi yɛn yiŋgi fɔ a maa jatere piin wi wogo na?
Lere wi yɛn yiŋgi fɔ a maa sɔnri wi wogo na?
4 Sɛnwee wi yɛn paa tifɛlɛgɛ yɛn,
wi yinwege piliye yi yɛn paa yinmɛ yɛn, mba pi ma toro ma kɔ.
 
5 Yawe Yɛnŋɛlɛ, ki yaga mɔɔ naayeri wi tirige tɔɔn, ma tigi laga,
ma jiri yanwira ti na, jaŋgo tila wirige yinrigi!
6 Yɛnŋɛlɛ yɛngɛlɛmɛ yirige mala juguye pe gbɔn ma pe jaraga,
pe wɔn ma wangala ke ni ma pe jaraga!
7 Mbɔɔn ta wa naayeri, ma kɛɛ ki sanga mala shɔ,
mala tile mala shɔ wa tɔnŋgbɔɔ tijuguwo pi ni,
na shɔ cɛngɛlɛ sanŋgala woolo pe kɛɛ!
8 Poro mbele pe maa finlɛlɛ wa pe yɔn we,
pe ma pe kalige kɛɛ ki yirige, mbe wugu yagbolo li na.
9 E, Yɛnŋɛlɛ, mi yaa yurugo fɔnŋgɔ shɔ ma kan mbɔɔn gbɔgɔ,
mi yaa yurugo kɔ mbɔɔn sɔn ŋgɔni maŋgala kɛ woo ni.
10 Mboro ma maa wunlumbolo pe shoo,
mboro mɔ̀ɔ tunmbyee Davidi wi shɔ tokobi ŋa wi ma lere gbo wi kɛɛ.
 
11 Na shɔ, mala wɔ wa cɛngɛlɛ sanŋgala woolo pe kɛɛ,
poro mbele pe maa finlɛlɛ wa pe yɔn we,
pe ma pe kalige kɛɛ ki yirige, mbe wugu yagbolo li na.
 
12 Yɛnŋɛlɛ sa ti we pinambiile pe pye paa tire yɛn, nda ti yirilɔmɔ pì yɔn maga lɛ wa ti yirifɔnmɔ pi ni,
we sumborombiile pe pye paa tiyagala yɛn, ŋgele pè tɛ ma yerege wa wunluwɔ go ki ni maga fere.
13 We bondoolo pe yinyin,
pe yin yarilire cɛnlɛ pyew ta ni!
We simbaala naa we sikaala pe lɛgɛ pe pye wagaye lɛgɛrɛ,
pe lɛgɛ pe pye waga kɛ kɛ tɛgɛsaga lɛgɛrɛ wa wasege ki ni!
14 We nɛrɛ ti tugbɔlɔ ti tɔrɔ!
We juguye paga ka ya pan mbe to we na naa, mbe we yigi kasopiile mbe kari we ni naa;
paga ka jɔlɔgɔ gbelege logo wa we katoro ti ni naa!
15 Cɛnlɛ na ka pye ko cɛnlɔmɔ mba po na, fɛrɛwɛ yɛn li woo!
Yawe Yɛnŋɛlɛ li ka pye cɛnlɛ na woolo Yɛnŋɛlɛ, fɛrɛwɛ yɛn pe woo!