Yaa Yawe Yɛnŋɛlɛ li sɔnni li yawa pi kala na
135
1 Yaa Yawe Yɛnŋɛlɛ li sɔnni!
Yaa Yawe Yɛnŋɛlɛ li mɛgɛ ki sɔnni!
Yoro mbele Yawe Yɛnŋɛlɛ li tunmbyeele, yaa li sɔnni,
2 yoro mbele ye maa tunŋgo piin wa Yawe Yɛnŋɛlɛ li go ki ni we,
wa we Yɛnŋɛlɛ li go londo ti ni we!
 
3 Yaa Yawe Yɛnŋɛlɛ li sɔnni, katugu li yɛn ma yɔn,
yaa yuuro koo yaa li mɛgɛ ki sɔnni, katugu li yɛn nandanwa ni.
4 Yawe Yɛnŋɛlɛ lì Zhakɔbu setirige piile pe wɔ li yɛɛ kan,
lì poro Izirayɛli woolo pe wɔ ma pe pye li yɛɛ woolo.
 
5 Kaselege ko na, mìgi jɛn ma yo Yawe Yɛnŋɛlɛ li yɛn ma gbɔgɔ,
fɔ we Fɔ wì wɛ yarisunndo ti ni fuun ti na.
6 Kala o kala li yɛn ma Yawe Yɛnŋɛlɛ li ndanla, li mali pye,
wa yɛnŋɛlɛ na konaa laga tara na,
wa kɔgɔjeye pe ni konaa wa pe wetijuro ti ni.
7 Li ma kambaara ti yirige mbege lɛ fɔ wa tara ti kɔsaga ki na,
li ma yɛnŋɛlɛ yɛngɛlɛmɛ yirige mbe ti tisaga ki ma pan;
li ma ti tifɛlɛgɛ ki ma yiri wa ki cɛnsaga na funlu.
 
8 Làa Ezhipiti tara fɛnnɛ pe pinambiile koŋgbanmbala pe gbo,
maga lɛ sɛnwee piile pe na fɔ ma saa ki wa yaayoro ti na.
9 Làa kacɛn kagala naa kafɔnŋgɔlɔ pye wa mboro Ezhipiti tara ma ni,
ma ke pye Farawɔn wo naa wi tunmbyeele pe ni fuun pe na.
 
10 Làa cɛngɛlɛ lɛgɛrɛ tɔngɔ,
ma wunlumbolo fanŋga fɛnnɛ gbo.
11 Poro wɛlɛ Amɔri cɛnlɛ woolo pe wunlunaŋa Sihɔn,
naa Bazan tara wunlunaŋa Ɔgi,
konaa Kana tara wunlumbolo pe ni.
12 Làa pe tara ti kan kɔrɔgɔ li woolo pe yeri,
làa ti kan kɔrɔgɔ Izirayɛli, li woolo pe yeri.
 
13 Yawe Yɛnŋɛlɛ, ma mɛgɛ ki yaa koro wa fɔ sanga pyew,
Yawe Yɛnŋɛlɛ, leele pe jatere wi yaa pye ma mɛgɛ ki na sanga pyew fɔ tetete.
14 Yawe Yɛnŋɛlɛ li yaa kiti kɔn li woolo pe na, mbe tanga ki kan pe yeri,
li yaa li tunmbyeele pe yinriwɛ ta.
 
15 Cɛngɛlɛ sanŋgala ke yarisunndo ti yɛn warifuwe naa tɛ woro,
sɛnwee kɛɛ kìri gbegele.
16 Yɔn yɛn ti na, ɛɛn fɔ tila ya mbaa para,
yɛngɛlɛ yɛn ti na, ɛɛn fɔ tila ya mbaa yaan.
17 Nuŋgbogolo yɛn ti na, ɛɛn fɔ tila ya mbaa nuru,
yɔn tifɛlɛgɛ kpɛ na la yinrigi wa ti yɔn.
18 Ti gbegelefɛnnɛ poro naa mbele fuun pe ma pe jigi wi taga ti na,
poro naa ki yarisunndo ti ni pè yala.
 
19 Yoro Izirayɛli cɛngɛlɛ woolo, yaa Yawe Yɛnŋɛlɛ li sɔnni!
Yoro Arɔn setirige piile, yaa Yawe Yɛnŋɛlɛ li sɔnni!
20 Yoro Levi setirige piile, yaa Yawe Yɛnŋɛlɛ li sɔnni!
Yoro mbele ye maa fyɛ Yawe Yɛnŋɛlɛ li yɛgɛ, yaa Yawe Yɛnŋɛlɛ li sɔnni!
21 Ki daga paa Yawe Yɛnŋɛlɛ li sɔnni wa Siyɔn yanwiga ki na,
lo na lì Zheruzalɛmu ca ki pye li cɛnsaga!
 
Yaa Yawe Yɛnŋɛlɛ li sɔnni!