Ki yɛn ma yɔn mbaa Yɛnŋɛlɛ li sɔnni
92
1 Yɛnŋɛlɛ gbɔgɔyurugo. Cɛnpilige yurugo.
2 Ki yɛn ma yɔn mbaa Yawe Yɛnŋɛlɛ li gbogo,
mbaa yuuro koo mbaa lo na yaara ti ni fuun ti go na li mɛgɛ ki sɔnni;
3 mbaa ma kagbaraga ki sɛnrɛ yuun pinliwɛ ni,
ma yɛn sɛnrɛ nuŋgba yofɔ yɛgɛ ŋga na, mbaa ki yari yembinɛ;
4 mbaa ki piin ŋgɔni maŋgala kɛ woo ni,
naa juru ni konaa ŋgɔni gbɔngɔ ni.
 
5 E, Yawe Yɛnŋɛlɛ, kapyegele ŋgele mà pye, kè yɔgɔrimɔ kan na yeri,
mi yɛn na jɔrɔgi nayinmɛ ni ma kɛɛ tunŋgo ki kala na.
6 E, Yawe Yɛnŋɛlɛ, ma kapyegele kè tugbɔlɔ,
ma jatere wi yɛn ma jugo.
7 Kambajɛnŋɛ wila kala lo la jɛn wa ki ni,
lembige kila tijinliwɛ ta mbege kɔrɔ jɛn.
8 Ali na lepeele paga yiri mbe jiti paa yan yɛn,
ali na kapere pyefɛnnɛ pe kagala ke kaa yɔngɔ la kee yɛgɛ,
pe yaa ka tɔngɔ mbe wɔ wa pew.
 
9 Ɛɛn fɔ, mboro wo na, Yawe Yɛnŋɛlɛ,
ma yɛn yaara ti ni fuun ti go na fɔ sanga pyew.
10 E, ma juguye pe wele Yawe Yɛnŋɛlɛ,
ma juguye pe wele pe yɛn na koo na woo wa,
mbele fuun pe yɛn na kambasinnde ti piin, ma yaa pe gbɔn mbe pe jaraga.
 
11 Ma ma fanŋga kan na yeri paa yannɔ wogo yɛn,
mà sinmɛ nuwɔ taan fɔnmbɔ wo na na mala nawa pi yinŋgi.
12 Mi yɛn nala winfɛnnɛ pe tolo li yaan,
mbele pe yɛn na yinrigi na kɔrɔgɔ mbe kapege pye na na, na nuŋgbolo yɛn pe gbelege ki na.
 
13 Ɛɛn fɔ lesinmbele pe kagala ke maa yɔngɔ na kee yɛgɛ paa sɛngɛndige ma kaa na tɔnlɔ we,
pe maa fanŋga taa na kee yɛgɛ paa Liban tara sɛdiri tire ti yɛn.
14 Pe yɛn paa tige yɛn ŋga pè sanri wa Yawe Yɛnŋɛlɛ li go ki ni,
pe ma yiri ma yɔn wa we Yɛnŋɛlɛ li shɛrigo gbɔgɔ londo nawa pi ni.
15 Ali mbege ta pè lɛ, pe maa siin,
pe yɛn tɔnmɔ ni na funnu;
16 ki ka pye ma, ki maga naga fɔ Yawe Yɛnŋɛlɛ li yɛn ma sin,
lo li yɛn na walaga mbaa na go singi, kambasinŋge kpɛ woro li ni.