SƐWƐ TIJƐRƐ WOO
Yuuro 90–106
Yɛnŋɛlɛ li yɛn kɔsaga fu, ɛɛn fɔ sɛnwee wi yɛn torofɔ
90
1 Yɛnŋɛlɛ li lere Moyisi wi Yɛnŋɛlɛ yɛnrɛwɛ.
We Fɔ, mboro ma yɛn we larasaga sanga wi ni fuun, fɔ tetete.
2 Sanni ma sa yanwira ti da,
sanni ma sa dunruya wi da,
mboro ma yɛn Yɛnŋɛlɛ sanga pyew fɔ tetete.
3 Mboro ma ma ti sɛnwee wi ma sɔngɔrɔ wa taambugɔ ki ni,
ma maa pye fɔ: «Sɛnwee pyɔ, sɔngɔrɔ wa tara ti ni
4 Katugu yɛlɛ wagakele (1 000) li yɛn ma yɛgɛ na paa yunmbaan pilige ŋga kì toro ki yɛn,
nakoma paa yembinɛ lɛri yɔn ka yɛn.
 
5 Ma ma sɛnwee piile pe yinwege ki pɛ mbege wɔ wa,
ki ma kɔ paa wɔnlɔwɔ jɛnri ma kaa kɔ pinliwɛ yɔn na we,
ki ma kɔ paa yan yɛn.
6 Pinliwɛ ni, yan ki ma fyɛnwɛ, ma pɛlɛgi,
yɔnlɔkɔgɔ ki ma fanla, mɛɛ waga.
7 Ma naŋgbanwa pì we jɔgɔ,
ma naŋgbanwa gbɔɔ pi yɛn na we sunndo wi kɔɔn we na.
8 Ma yɛgɛ yɛn we kajɔgɔrɔ ti na,
mà we kagala ŋgele ke yɛn ma lara ke yirige funwa na, ma ke tɛgɛ ma yɛgɛ sɔgɔwɔ.
9 We yinwege ki yɛn na were na kee ma naŋgbanwa pi kala na,
we yɛgɛlɛ yɔn ki ma kɔ paa yɔn tifɛlɛgɛ wɔnsaga nuŋgba yɛn.
10 We yinwege piliye yi mbe ya yɛlɛ nafa taanri ma yiri kɛ yɔn ko tin,
na leele mbele ka pye fanŋga ni, poro mbe ya mbe yɛlɛ nafa tijɛrɛ ta.
Ɛɛn fɔ wa ko yinwege ko ni, tege naa jɔlɔgɔ ki yɛn wa;
dunruya yinwege ki ma kɔ fyaw, woro fun waa toro na kee win.
11 Ambɔ wɔɔn naŋgbanwa pi kɔsaga jɛn?
Ma naŋgbanwa gbɔɔ mba pi ma ti leele pe maa ma fyɛ, ambɔ wuu kɔsaga jɛn?
12 We naga wege jɛn fɔ we yinwege piliye yi yɛn ma jiri,
jaŋgo we ya we kajɛnmɛ ta wa we kotogo na!
 
13 Yawe Yɛnŋɛlɛ, ma yaa nawa ŋgban we ni fɔ sa gbɔn wagati wiwiin?
Sɔngɔrɔ ma pan we kɔrɔgɔ,
ma we yinriwɛ ta!
14 Pinliwɛ ni, ma kagbaraga ki pye we kan ma we yɛgɛ tin,
pa we yaa la jɔrɔgi nayinmɛ ni we yinwege piliye yi ni fuun ni.
15 Mà fɛrɛ ti wa we na ma saa gbɔn piliye yɔn ŋga na, nayinmɛ kan we yeri mbe yala ki piliye yɔn ki ni;
wè jɔlɔ ma saa gbɔn yɛlɛ yɔn ŋga na, yɔgɔrimɔ kan we yeri mbe yala ki yɛlɛ yɔn ki ni!
16 Ki yaga mɔɔ kapyegele ke naga woro mbele ma tunmbyeele we na,
mɔɔ gbɔgɔwɔ yanwa pi naga we setirige piile pe na!
17 We Fɔ, we Yɛnŋɛlɛ, ki yaga ma yinmɛ pi tɔn we na!
Ma ti we kɛɛ tunndo tila yɔngɔ tila kee yɛgɛ!
Ee, ma ti we kɛɛ tunndo tila yɔngɔ tila kee yɛgɛ!