Lere ŋa pòo java wi Yɛnŋɛlɛ yɛnrɛwɛ
55
1 Yurukɔɔlɔ to wi sɛwɛ yurugo, ŋga pe maa koo na ŋgɔni gbɔɔn. Davidi nagawa yurugo.
2 E, Yɛnŋɛlɛ, nuŋgbolo jan mala yɛnrɛwɛ pi logo,
na mi kaa ma yɛnriŋgbanga yɛnri sanga ŋa ni, maga ka ma yɛɛ lara na na!
3 Logo na yeri mala yɔn sogo!
Na jatere wì piri na na, na nandangawa pi kala na.
Mi yɛn na jɛɛn,
4 na juguye pe sɛnyoro ti kala na,
konaa jɔlɔgɔ ŋga lepeele pe yɛn na tari na na ki kala na.
Pe yɛn na tipege piin na na,
pè yiri na kɔrɔgɔ naŋgbanwa ni.
5 Na sunndo wila kɔɔn na na,
kunwɔ pi fyɛrɛ tìlan yigi.
6 Fyɛrɛ gbɔrɔ na yigi, a mila seri;
sunndo kɔngɔ gbɔgɔ to na na.
 
7 Kona, a mì sho fɔ: «Ndɛɛ ki pye mi kanwira ta paa jɛndɛtuwa woro yɛn,
mi jɛn na yiri sire na mbe sa cɛn laga ka yɛgɛ ni.
8 Pa kona mbe ja fe mbe kari fɔ lege,
mbe ja kari sa cɛn wa gbinri wi ni. Wɔnmatigiwɛn laga.
9 Mi jɛn na fyɛɛlɛ mbe sa larasaga lagaja,
mbe fyɛɛlɛ mbe lara tifɛliŋgbɔgɔ konaa tisaga tifɛlɛgɛ ki na.»
 
10 E we Fɔ, na juguye pe yɔn sɛnrɛ ti gbɔn mari piri, ma ti pe yɔn ki yiri ki yɛ ki yɛ;
katugu lewɛlɛwɛ kapyere naa maara to mila yaan laga ca ki ni.
11 Sɔnlɔ naa yembinɛ ko kapyere to ti yɛn na piin wa ca ki malaga sigembogo ki go na, naga mari;
jɔlɔgɔ naa tege ko ki yɛn laga ca ki ni.
12 Legbogo ko cɛ ki yɛn na piin wa ca nawa pi ni;
wa katoro ti ni, lejɔlɔgɔ kapyere naa nambara wo paa piin pe lewee yɛɛnlɛ pe na.
13 Ndɛɛ ki pye na jugu wo wa wila na tegele, pa mbe ja ya mbege kun na yɛɛ ni;
ndɛɛ ki pye ŋa wìlan panra wo wa wì yiri na kɔrɔgɔ, pa mbe ja ya mbe lara wi na.
14 Ɛɛn fɔ mboro wi, mboro ŋa mi naa mboro we yɛn ja, ma yɛn na wɔnlɔ konaa na pinlɛyɛnlɛ.
15 Wàa tanla fɔ na ŋgundo sɛnrɛ yuun we yɛɛ kan;
kìla pye mi naa mboro we ma pinlɛ janwa wi ni mbe kari wa Yɛnŋɛlɛ li shɛrigo gbɔgɔ ki ni.
 
16 Yɛnŋɛlɛ sa ti kunwɔ pilan juguye pe fo pi to pe na,
pe tigi weele wa kuulo tara ti ni,
katugu tipewe po pi yɛn wa pe yinrɛ ti ni, po pi yɛn wa pe kotoro na!
 
17 Mi wo na, Yɛnŋɛlɛ lo mi yɛn na yinri lilan saga,
Yawe Yɛnŋɛlɛ li yaa na shɔ.
18 Pinliwɛ, naa yɔnlɔfugo konaa yɔnlɔkɔgɔ, mi maa yuŋgbɔgɔrɔ sɛnrɛ yuun na jɛɛn,
ɛɛn fɔ li nuŋgbolo yɛn na magala li na.
19 Malaga ŋga pè yiri ki ni na kɔrɔgɔ, li yaa na shɔ ki kɛɛ, mbe yɛyinŋge kan na yeri;
katugu mbele pè yiri na kɔrɔgɔ, pè lɛgɛ.
20 Yɛnŋɛlɛ li yaa na yɛnrɛwɛ pi logo mbe pe go sogo,
lo na li yɛn wunluwɔ fɔ sanga pyew. Wɔnmatigiwɛn laga.
Pe se kanŋga fyew,
pe si woro na fyɛ Yɛnŋɛlɛ li yɛgɛ.
21 Na pinlɛyɛnlɛ lɛɛ wì yiri wi wɛnnɛ pe kɔrɔgɔ,
ma yɔn finliwɛ mba wìla le pe ni pi jɔgɔ.
22 Wi yɔn sɛnrɛ tì tanla ma wɛ sɛnrɛgɛ na,
ɛɛn fɔ malaga ko ki yɛn wa wi kotogo na.
Wi sɛnrɛ tì tanla ma cɛn pɔw ma wɛ sinmɛ liwoo na,
ɛɛn fɔ ti yɛn paa tokobi yɛn, ŋa pè kɔw mbe jɔgɔwɔ pye.
 
23 Ma jatere lɛgɛrɛ ti ni fuun ti le Yawe Yɛnŋɛlɛ li kɛɛ, pa li yaa ma tɔgɔ;
li se yɛnlɛ mbe lesinŋɛ wi yaga wi to.
24 Mboro wo na, Yɛnŋɛlɛ, ma yaa ti ki leele pe ku pe tigi wa fanga ki ni.
Poro mbele pe yɛn legboleele naa nambara fɛnnɛ, pe se pe yinwege ki walaga pye.
Ɛɛn fɔ mi wo na, mìlan jigi wi taga ma na.