Sɛnwee wi yinwege ki woro yaraga ka
39
1 Yurukɔɔlɔ to wi sɛwɛ yurugo, Yedutun yurugo. Davidi Yɛnŋɛlɛ gbɔgɔyurugo.
2 Mìla pye na yuun fɔ: «Mi yaa lanla tangalɔmɔ pi kɔrɔsi,
jaŋgo mi ka ka kapege pye wa na sɛnyoro ti ni;
na lepee wi ka pye na tanla sanga ŋa ni, mi yaa na yɔn ki tɔn.»
3 Kì pye ma, a mì si pyeri, mi sila para,
mìla pyeri, mi si sɛnpyɔ wo yo;
ɛɛn fɔ, a na jɔlɔgɔ ki nɛɛ gbogo na seregi.
4 Na kotogo kìla pye nala sorogi,
na mi ka jatere pye, ki ma pye ndɛɛ kasɔn ki yɛn wa na nawa;
a kìgi kan mìlan yɔn ki yɛngɛ na para.
 
5 E, Yawe Yɛnŋɛlɛ, na yinwege kɔsanga wi naga na na;
na yinwege piliye yi koro jori;
jaŋgo mbege jɛn fɔ na yinwege ki woro yaraga ka.
6 Wele, màla yinwege ki titɔnlɔwɔ pi were paa kɛndala gbemɛ yɛn,
na yinwege piliye yi woro yaraga ka ma yɛgɛ sɔgɔwɔ;
ee, sɛnwee ŋa fuun wì yiri laga, wi yinwege ki yɛn paa yɔn tifɛlɛgɛ yɛn. Wɔnmatigiwɛn laga.
7 Ee, sɛnwee wi maa kee na paan paa tige yinmɛ yɛn,
wi maa yɛɛ yɛgɛ ki wɛri, ɛɛn fɔ wi ma kaa toro paa tifɛlɛgɛ yɛn;
wi maa yarijɛndɛ gbogolo wi yɛɛ kan, ɛɛn fɔ wila ki jɛn ti yaa ka pye ambɔ woro wi puŋgo na.
 
8 Koni, we Fɔ, mi yaa na jigi wi taga yiŋgi na san?
Pa na jigi wi yɛn mboro na.
9 Na shɔ na kajɔgɔrɔ ti ni fuun ti kɛɛ,
maga ka ti kambajɛnŋɛ wila na tifaga.
10 Mi yaa pyeri, mi sanla yɔn ki yɛngɛ naa;
katugu mboro ma yɛn ki kagala ke pyefɔ we.
11 Na gbɔnrɔ ti yaga ma,
gbɔnrɔ nda maa na gbɔɔn tì wɛ na fanŋga ki na.
12 Ma ma sɛnwee wi koro mbe jɔlɔgɔ wa wi na wi kajɔɔgɔ ki kala na;
yaraga ŋga ki yɛn kagbɔgɔ yɔn wi yeri, ma maga jɔgɔ paa yɛgɛ ŋga na fyɛnrɛ ma kaa yaraga jɔgɔ we.
Ee, sɛnwee pyɔ wi woro yaraga ka, kaawɔ tifɛlɛgɛ. Wɔnmatigiwɛn laga.
 
13 Yawe Yɛnŋɛlɛ, na yɛnrɛgɛ ki logo,
nuŋgbolo jan, mala yerege ki logo;
maga kɔɔn yɛngɛlɛ ke tɔn na gbelege ki na,
katugu mi yɛn nambanŋa wa ma yeri, mi yɛn nambanndorowo paa na tɛlɛye pe yɛn.
 
14 Ma yɛgɛ ki laga na na, jaŋgo na yɛgɛ welewe pi ta pi tanla,
sanni mbe sa kari mbe wɔ wa pew.