Lere ŋa wi yɛn jɛrɛgisaga fu wi Yɛnŋɛlɛ yɛnrɛwɛ
26
1 Davidi Yɛnŋɛlɛ gbɔgɔyurugo.
Yawe Yɛnŋɛlɛ, tanga kan na yeri,
katugu mi yɛn jɛrɛgisaga fu wa na tangalɔmɔ pi ni!
Mìlan jigi wi taga Yawe Yɛnŋɛlɛ li na,
mi se to fyew.
2 Yawe Yɛnŋɛlɛ, na sɛgɛsɛgɛ mala wa ma wele!
Na jatere naa na nawa kagala ke cancan ma wele!
3 Ma kagbaraga ki yɛn na yɛgɛ sɔgɔwɔ,
mi yɛn na tanri fun ma kaselege ki na.
4 Mila la cɛɛn nambara fɛnnɛ pe ni,
mila sila pinlɛlɛ kopiire fɛnnɛ pe ni.
5 Kapere pyefɛnnɛ gbogolomɔ pi yɛn mala mbɛn;
mila la cɛɛn lepeele pe ni ja.
 
6 Mi yaa na kɛyɛn yi jogo mbege naga fɔ mi yɛn jɛrɛgisaga fu,
Yawe Yɛnŋɛlɛ, mi yaa yere wa ma saraga wɔsaga ki yɛgɛ sɔgɔwɔ;
7 jaŋgo mbe ta mbɔɔn sɔn sharaga ni,
konaa mbaa ma kafɔnŋgɔlɔ ke ni fuun ke yɛgɛ yuun.
 
8 Yawe Yɛnŋɛlɛ, ki yɛn mala ndanla mbe sa koro wa ma go,
wa laga ŋga ma gbɔgɔwɔ pi yɛn we.
9 Maga kanla yigi paa kapere pyefɛnnɛ pe yɛn!
Maga kanla gbo mbe pinlɛ legboleele pe ni!
10 Poro mbele pe kɛyɛn yi yɛn wa katijangara ti ni;
pe kalire ti yɛn ma yin yarikanra ni mbaa leele yinrɛ jogo.
 
11 Mi wo na, na yinwege ki yɛn jɛrɛgisaga fu;
na yinriwɛ ta mala shɔ!
12 Mi yɛn na tanri wa kozinnɛ li ni.
Mi yaa Yawe Yɛnŋɛlɛ li sɔn wa janwa wi sɔgɔwɔ.