Yɛnŋɛlɛ li gbɔgɔwɔ pi ma yan wa yaara nda lì da ti ni konaa wa li lasiri sɛnrɛ ti ni
19
1 Yurukɔɔlɔ to wi sɛwɛ yurugo. Davidi Yɛnŋɛlɛ gbɔgɔyurugo.
2 Naayeri wi ni fuun wi maa Yɛnŋɛlɛ li gbɔgɔwɔ pi nari,
naayeri wi fowaga ki maa Yɛnŋɛlɛ li kɛɛ tunŋgo ki nari.
3 Pilige ka ma ki yɛɛ wogo yari pilige ka yɛgɛ kan,
yembinɛ la ma li yɛɛ wogo yɛgɛ yo yembinɛ la yɛgɛ kan.
4 Ki woro na piin sɛnyoro ni, nakoma sɛnrɛ ni,
magala si ma li ma logo.
5 Konaa ki ni fuun, ŋga ti yɛn na yuun,
ki yɛn na gbɔɔn fɔ wa dunruya wi kɔsara ti na.
 
Yɛnŋɛlɛ lì paraga go ka kan wa naayeri yɔnlɔ ki kan.
6 Pinliwɛ ni, yɔnlɔ ki ma yiri na paan wa paa japɔlɔ yɛn, ŋa wì yiri wa wi wɔnlɔgo ki ni;
ki ma ki konɔ li lɛ na kee yɔgɔrimɔ ni paa maliŋgbɔɔn kotogofɔ yɛn.
7 Ki ma yiri tara ti go ŋga na,
mbe toro sa to wa ti go ŋga na;
yaraga ko ka na shɔ ki tufunwɔ pi yeri.
 
8 Yawe Yɛnŋɛlɛ li lasiri wi yɛn ma yɔn fili, wi maa yinwege kaan.
Yawe Yɛnŋɛlɛ li kondɛgɛŋgɛlɛ ke yɛn kaselege,
ke maa tijinliwɛ kaan kambajɛnŋɛ wi yeri.
9 Yawe Yɛnŋɛlɛ li katɛgɛŋgɛlɛ ke yɛn ma sin, ke maa yɔgɔrimɔ kaan sɛnwee wi yeri.
Yawe Yɛnŋɛlɛ li ŋgasegele ke yɛn ma filige,
ke ma sɛnwee wi yɛngɛlɛ ke yɛngɛ.
10 Mbaa fyɛ Yawe Yɛnŋɛlɛ li yɛgɛ ki yɛn ma yɔn, ki wogo ki yaa koro wa fɔ sanga pyew.
Yawe Yɛnŋɛlɛ li kakɔnndɛgɛŋgɛlɛ ke yɛn kaselege, ke ni fuun ke yɛn ma sin.
11 Ke yɛn ma yɔn ma wɛ tɛ na, ma wɛ yɛrɛ tɛ piiri lɛgɛrɛ na.
Ke yɛn ma tanla ma wɛ sɛnrɛgɛ na, ma wɛ yɛrɛ sɛnrɛgɛ tunwɔ mba pi ma pye wa fanvan fiile pe ni ki na.
 
12 Mi ŋa ma tunmbyee, mi maa yɛrɛwɛ taa wa ke ni fun;
lere ŋa ka ke yigi mbaa tanri ke na, wi ma tɔnli ta wa ke ni.
13 Lere wiwiin wi yɛn wa ŋa wi maa puŋgosara ti jɛn mberi kɔ?
Puŋguro nda mì pye kambajɛnmɛ na, mari kala yaga na na!
14 Mi ŋa ma tunmbyee, ki yaga mala shɔ mbele pe maa pe yɛɛ gbogo pe kɛɛ;
maga ka ti pe cɛn na go na!
Pa kona mi yaa pye sinŋɛ konaa jɛrɛgisaga fu kapegbɔgɔ pyewe kanŋgɔlɔ.
 
15 Ki yaga ma yɛnlɛ na yɔn sɛnrɛ to naa na nawa jatere wi na,
Yawe Yɛnŋɛlɛ, mboro ŋa ma yɛn paa na walaga yɛn konaa na go shɔfɔ!