Lesinŋɛ wi yaa tasaga ŋga ta Yɛnŋɛlɛ li yeri
16
1 Davidi yurugo.
Yɛnŋɛlɛ, ki yaga maa na go singi, katugu pa mìlan yɛɛ karafa ma na.
2 Mìgi yo Yawe Yɛnŋɛlɛ li kan fɔ: «Mboro ma yɛn na Fɔ we.
Pa na fɛrɛwɛ pi yɛn na taa mboro nuŋgba yeri.»
 
3 Mbele pe yɛn Yɛnŋɛlɛ li leele kpoyi laga tara ti ni,
poro wo na, pe yɛn legbɔɔlɔ mbele pe kala li yɛn mala ndanla fɔ jɛŋgɛ.
 
4 Mbele pe yɛn na fee yarisunndo ta yɛgɛ puŋgo na nari gbogo,
poro yɛn na ka tari pe jɔlɔgɔ ki na na kee yɛgɛ.
Mi se ka saraga yaayoro wɔ mberi kasanwa pi wo ti kan,
mi se ka ti ti mɛgɛ mbe yiri wa na yɔn.
 
5 Yawe Yɛnŋɛlɛ, mboro ma yɛn na kala li ni fuun, ma pye na tasaga ye,
na goto kala li yɛn mboro kɛɛ.
6 Na tasaga ki yɛn ma yɔn jɛŋgɛ,
ŋga kì kan na yeri kɔrɔgɔ, ki yɛn ma yɔn fɔ jɛŋgɛ.
 
7 Mi yɛn na Yawe Yɛnŋɛlɛ li sɔnni, lo na li maa na yɛrɛgi;
ali yembinɛ, na nawa jatere wi mala yɛri.
8 Na yɛgɛ yɛn Yawe Yɛnŋɛlɛ li na na yɛgɛ sɔgɔwɔ sanga pyew,
kì kaa pye li yɛn na kalige kɛɛ ki na, mi se wɔ mbe to.
 
9 Ki kala na, na nawa pì yinŋgi na na, a mila yɔgɔri wa na nawa,
mi yɛn yɛyinŋge na pɔw.
10 Katugu ma sanla yinnɛ li yaga kuulo tara ti kan,
ma se yɛnlɛ ki na ma woo kpoyi wi fɔngɔ.
 
11 Ma yaa ka yinwege konɔ li naga na na;
mi yɛn ma yin nayinmɛ gbɔɔ ni wa ma yɛgɛ sɔgɔwɔ,
fɛrɛwɛ mbakɔɔ maa taa wa ma tanla!