Yawe Yɛnŋɛlɛ, tanga kan na yeri
7
1 Davidi yuŋgbɔgɔrɔ yurugo. Wìla ki kɔ Yawe Yɛnŋɛlɛ li kan Bɛnzhamɛ cɛnlɛ woolo naŋa Kushi wi wogo na.
2 Yawe Yɛnŋɛlɛ, na Yɛnŋɛlɛ, mila yɛɛ karafa ma na;
na shɔ mbele fuun paa na jɔlɔ pe kɛɛ,
mala go yirige!
3 Nakoma pe yaa na kɔɔnlɔ yuroyuroyuro, paa yɛgɛ ŋga na jara ma kaa ki pye,
lere se ta mbanla shɔ pe kɛɛ.
 
4 Yawe Yɛnŋɛlɛ, na Yɛnŋɛlɛ, na kaa pye ŋga pè yo pa mìgi pye ma,
na kaa pye mì kambasinŋge pye,
5 na kaa pye mi naa lere ŋa yɛyinŋge yɛn we sɔgɔwɔ, mì kapege pye wa na,
na kaa pye mìla winfɛnnɛ wa yaara koli go fu,
6 pa kona ma ti na jugu wa mbanla purɔ wi sanla yigi,
wilan jan wilan tangala mbanla purugu wee le tara,
wilan gbɔgɔwɔ pi jan wuu piligi wa fɛnrɛgɛ ki ni! Wɔnmatigiwɛn laga.
 
7 Yawe Yɛnŋɛlɛ, yiri naŋgbanwa ni!
Yiri na winfɛnnɛ pe kɔrɔgɔ, poro mbele pe yɛn ma yin naŋgbanwa gbɔɔ ni we!
Yɛn ma yiri ma yere na ni, mboro ŋa ma ma kasinŋge ki kɔn mbege tɛgɛ we!
8 Ki yaga cɛngɛlɛ gbogolomɔ woolo pe pan pe gbogolo pɔɔn maga,
ma cɛn pe go na, mbɔɔn ta wa ma wunluwɔ jɔngɔ ki na, wa naayeri!
9 Yawe Yɛnŋɛlɛ lo li maa kiti kɔɔn cɛngɛlɛ ke na;
Yawe Yɛnŋɛlɛ, kiti kɔn na na mbe yala mi yɛn ma sin yɛgɛ ŋga na konaa na nawa pi yɛn ma filige yɛgɛ ŋga na ki ni.
10 Ma ti lepeele pe pe tipewe kapyere ti yaga;
ma yeresaga kan lesinmbele pe yeri,
mboro ŋa ma yɛn Yɛnŋɛlɛ na li yɛn ma sin, ma maa sɛnweele pe jatere naa pe nawa kagala ke cancan!
 
11 Na tugurɔn sigeyaraga ŋga ki yɛn nala go singi, ko ki yɛn Yɛnŋɛlɛ le,
lo li maa lesinmbele pe shoo.
12 Yɛnŋɛlɛ li yɛn kiti kɔnfɔ sinŋɛ,
ɛɛn fɔ li yɛn pilige pyew Yɛnŋɛlɛ na li mbe ya nawa ŋgban.
 
13 Na lepee wii kanŋga,
wi maa tokobi wi yɔ,
wi maa sandiga wanla li taga mbe taanla.
14 Wi ma mara yaara nda ti ma lere gbo ta gbɛgɛlɛ wi yɛɛ kan;
wi ma wangala kasɔn wogolo gbɛgɛlɛ.
 
15 Ye wele, lepee wi maa tipere gbɛgɛlɛ,
wi maa kapege jate wa wi nawa mbe pye, mbe sila kafaara piin.
16 Wi ma titɛgɛ wɔ maga jugo,
ɛɛn fɔ wo jate wi ma to wa ki pɛnɛ na wì pɛri li ni.
17 Tipege ŋga wì gbɛgɛlɛ, ki yaa sɔngɔrɔ mbe to wi na,
wi lewɛlɛwɛ kapyere wi yaa ti go kala li lɛ.
 
18 Mi yaa Yawe Yɛnŋɛlɛ li sɔn, naa li yɛn ma sin ki kala na;
mi yaa Yawe Yɛnŋɛlɛ na yaara ti ni fuun ti go na li mɛgɛ ki sɔn yurugo ni.