Yɛnŋɛlɛ lo li maa yɛyinŋge kaan
4
1 Yurukɔɔlɔ to wi sɛwɛ yurugo, ŋga pe maa koo na ŋgɔni gbɔɔn. Davidi yurugo.
2 E Yɛnŋɛlɛ, mboro ŋa màla pye sinŋɛ,
na mi kɔɔn yeri mbe yo mala saga, mala yɔn sogo!
Wa na jatere pirindorogo ki ni, ma mala shɔ.
Na yinriwɛ ta, mala yɛnrɛwɛ pi logo!
 
3 Yoro sɛnwee piile wele, ye yaa lanla gbɔgɔwɔ pi tifaga fɔ sa gbɔn wagati wiwiin?
Ki yɛn ma ye ndanla mbaa na jɛrɛgi jaga konaa mbaa yagbogolo finlɛlɛ mbaa tari na na fɔ sa gbɔn wagati wiwiin? Wɔnmatigiwɛn laga.
 
4 Yege jɛn ye yo fɔ ŋa wi maa yɛɛ kan, Yawe Yɛnŋɛlɛ li maa wɔ li yɛɛ kan.
Na mi ka Yawe Yɛnŋɛlɛ li yɛnri, li ma logo na yeri.
 
5 Na yaga nawa ŋgban, yaga ka kapege pye;
ɛɛn fɔ mbe ye ta wa ye sinlɛsaga yembinɛ,
ye jatere pye, ye cɛn yɛw.
 
6 Saara nda tì yala yaa to woo,
ye ye jigi wi taga Yawe Yɛnŋɛlɛ li na.
 
7 Lelɛgɛrɛ maa yuun fɔ:
«Ambɔ wi yaa ti we fɛrɛwɛ ta?»
E, Yawe Yɛnŋɛlɛ, ki yaga ma kajɛŋgɛ pye we kan!
8 Pe yarilire to naa pe duvɛn wi ni, na tiga lɛgɛ pe yeri sanga ŋa ni,
pe ma nayinmɛ ta yɛgɛ ŋga na,
ma ma nayinmɛ kan na yeri ma wɛ ko na.
9 Kona, mi ka sinlɛ le teere, mi ma wɔnlɔ yɛyinŋge na;
katugu Yawe Yɛnŋɛlɛ, mboro nuŋgba ma ma ti mi ma pye yɛyinŋge na pɔw wa na cɛnsaga.