41
1 Wele, na maga ma jigi wi taga ki na mbe yo fɔ ma yaa ya yarifɛlɛgɛ Leviyatan ki ni, maa ma yɛɛ fanla wi;
na maga kaga yan le teere, ma mɛɛ laga ma to sunndo kɔngɔ ki kala na.
2 Lere se ya soro mbe yere mbege yɔn ja.
 
Ko mi ŋa Yɛnŋɛlɛ, ambɔ wi mbe ya yere mbanla sige?
3 Ambɔ wi fɔgɔ taga na na, jaŋgo mbege tɔn wi yeri?
Yaraga ŋga fuun ki yɛn laga dunruya wi ni, ki yɛn na wogo.
 
4 Koni mi se ya pyeri na mi si para yarifɛlɛgɛ Leviyatan ki witige ki sɛnrɛ na,
naa ki fanŋga konaa ki witige cɛnlɔmɔ pi tiyɔnwɔ pi sɛnrɛ na.
5 Ambɔ wi mbe ya mbege sɛlɛgɛ ki wɔ?
Ambɔ wi mbe ya ye wa ki ŋgangala koŋgolo shyɛn sɔgɔwɔ pi ni?
6 Ambɔ wi ya maga yɔn ki yɛngɛ ma wele?
Ki ŋgangala ke maa sunndo kɔngɔ waa lere na.
7 Ki pɔgɔlɔ sɛlɛgɛ ki yɛn kɔɔrɔ ni, ma tanli paa tugurɔn sigeyaara yɛn naga go singi.
Tì maramara ma ye ti yɛɛ ni paa tɛgɛrɛ tɛgɛyaraga yɛn.
8 Tì maramara ti yɛɛ na jɛŋgɛ,
ali yɛrɛ tifɛlɛgɛ se ya toro wa ti sɔgɔwɔ pi ni.
9 Ti ni fuun nuŋgba nuŋgba ti yɛn ma pɔ ti yɛɛ na, ma ti yɛɛ yigi,
ti yɛn mari yɛɛ yigi, ti se ya laga ti yɛɛ na.
 
10 Na ki ka jiri, yanwa pi ma janri ma yiri;
ki yɛngɛlɛ ke maa yɛngɛlɛ paa lalaaga yɔnlɔ yanwa pi yɛn.
11 Kasɔn yinŋgele maa janri na yinrigi wa ki yɔn,
kasɔn njaanra maa yinrigi wa ki yɔn.
12 Wirige maa yinrigi wa ki numawegele ke ni,
paa yɛgɛ ŋga na nɛgɛdaga nakoma cɔgɔ gbeŋge ma kaa na kanni kasɔn na, na tufunwɔ yinrigi.
13 Ki yɔn tifɛlɛgɛ ki yɛn ma wɛri fɔ ki mbe ya mbe kasɔn naŋganra fɛ mberi yigi,
kasɔn naŋganra maa janri na yinrigi wa ki yɔn.
14 Ki fanŋga ki yɛn wa surugubari wo ni,
ki maa sunndo kɔngɔ waa mbele fuun kaga yan pe na.
15 Ki witige lara pyew ti yɛn ma sogolo ma pye ti yɛɛ ni,
tì fanri ma ye ti yɛɛ ni, ma sheli paa tira pyɔ yɛn.
16 Ki sunndo wì sheli paa sinndɛlɛgɛ yɛn,
wì sheli paa tira pyɔ yɛn.
17 Na ki ka yiri mbe yere, nambala mbele kotogofɛnnɛ jɛmbɛlɛ pe maa seri fyɛrɛ ti kala na;
sunndo kɔngɔ ki kala na, pe maa fee.
18 Ma kaga gbɔn tokobi ni, kila ya yaraga ka kpɛ pye ki na,
njanraga nakoma wangala nakoma sɔgbɔ, tila ya mbe yaraga ka kpɛ pye.
19 Tugurɔn ti yɛn ki yɛgɛ na paa yan waga yɛn,
tuguyɛnrɛ ti yɛn ki yɛgɛ na paa tige fɔɔngɔ yɛn.
20 Sandiga wanla lo se ya ti ki fe,
gbafurugo sinndɛlɛgɛ ki yɛn ki yɛgɛ na paa yan waga yɛn.
21 Ŋgbogo ki yɛn ki yɛgɛ na paa yan waga yan;
njanraga ki kaa tinni la toro, ki kala na pye wa.
22 Kɔɔrɔ nda ti yɛn wa ki fuŋgbogo ki na, ti yɔnrɔ tì wɔwɔ ma tanla;
ki ka toro wa fɛnrɛgɛ ki ni, ki ma pye ndɛɛ falinɛrɛ capire kì fulo ma toro.
23 Na ki ka tigile wa tɔnmɔ pi nɔgɔ, ki ma latijugo tɔnmɔ pi yirige paa yɛgɛ ŋga cɔgɔ tɔnmɔ ma kaa na kanni kasɔn na we;
ki ma gbaan tɔnmɔ pi tɔngɔlɔ maa tɛgɛ paa sinmɛ nuwɔ taan cɔgɔ yɛn.
24 Ki torosaga tulugo tɔnmɔ pi maa ŋgbɔrɔgɔ kɔɔn na yɛngɛlɛ ki puŋgo na;
latijugo tɔnmɔ pi yɛgɛ ki ma filige paa yinzifire yɛn.
25 Yaraga ko ka woro wa ŋga ki yɛn ki to laga tara ti na;
pège da ki ka ka fyɛ yaraga ko ka kpɛ na.
26 Yaara tugbɔɔrɔ nda fuun tì da, ki maa ti tifaga;
ko ki yɛn woŋgaala mbele fuun pe yɛn yɛɛ gbɔgɔwɔ ni pe wunluwɔ.