Zhɔbu wi sɛnrɛ puŋgo woro sannda: Wi yɛn na tanga kaan wi yɛɛ yeri
31
1 Mìla yɔn fɔlɔ kɔn na yɛnmbigile ke kan,
ma yo fɔ mi se sumboro wele mbe yɛgɛ yirige wi na.
2 Na ki yɛn yɛɛn, tasaga kikiin Yɛnŋɛlɛ lì tɛgɛ na kan wa yɛnŋɛlɛ na?
Kɔrɔgɔ kikiin Yawa pi ni fuun fɔ wi yaa kan na yeri wa yɛnŋɛlɛ na?
3 Naga yɛn ma, jɔgɔwɔ pi woro ma gbɛgɛlɛ ma tɛgɛ lepee wi kan wi le?
Naga yɛn ma, jɔlɔgɔ ki woro ma gbɛgɛlɛ ma tɛgɛ kapere pyefɛnnɛ poro kan wi le?
4 Naga yɛn ma, Yɛnŋɛlɛ li woro nala tangalɔmɔ pi yaan wi le?
Naga yɛn ma, li woro nala yɔngɔlɔ ke yaan wi le?
 
5 Naga yɛn ma, mì tanga yagbogolo na wi le?
Naga yɛn ma, mila jele li le nambara kapyere ni wi le?
6 Ki yɛn ma yala Yɛnŋɛlɛ lìlan taanla wa li culo ŋa wì yala wi na!
Kona li yaa ki jɛn fɔ mi yɛn jɛrɛgisaga fu.
7 Na kaa pye mì kɛ ma wɔ wa kozinnɛ li ni,
na kaa pye na yɛngɛlɛ ke yɛn na ŋga yaan pa na jatere wi yɛn ki na,
na kaa pye mi kala la pye na kɛyɛn yi ni, na lìlan tɛgɛ fyɔngɔ ni,
8 kona yariluguro nda mì lugu, lere wa yɛgɛ mbe ki yarilire ti kɔlɔgi wiri li,
na yariluguro nda tì fi, peri kɔlɔgi peri wa.
 
9 Na kaa pye jɛlɛ wa na nɛgɛ, a mì yɛgɛ yirige wi na,
na kaa pye mi saa lara na cɛnyɛnlɛ wa yeyɔngɔ na naa jɔ wi singi,
10 kona Yɛnŋɛlɛ li ti na jɔ wi saa muwɛ tire naŋa wa yɛgɛ kan,
nambala pele yɛgɛ mbe sinlɛ wi ni.
11 Katugu ki jɛn na pye kapegbɔgɔ,
kambasinŋge yi ŋga ki daga kiti kɔnfɛnnɛ pe kiti kɔn ki pyefɔ wi na.
12 Kasɔn kayi ŋga ki jɛn na jɔgɔwɔ pye mbe tigi fɔ wa kuulo tara,
ki mbe ya ti na kɛɛ yaara ti ni fuun ti jɔgɔ na yeri.
 
13 Na kaa pye kiti kɔnkala la ye mi naa na tunmbyee naŋa nakoma tunmbyee jɛlɛ wa sɔgɔwɔ, a mùu tanga ki tifaga,
14 kona na Yɛnŋɛlɛ li ka ka yiri ki sɛnrɛ ti ni, yiŋgi mi yaa pye?
Na li ka kanla yewe ki kala li ni, mi yaa li yɔn sogo mbe yo mɛlɛ?
15 Yɛnŋɛlɛ na lìlan gbegele wa na nɔ wi lara, lo ma lilan tunmbyee wi gbegele fun wi le?
Yɛnŋɛlɛ nuŋgba lo ma li we ni fuun shyɛn we fanri wa we nɛɛlɛ pe lara wi le?
16 Naga yɛn ma, fyɔnwɔ fɛnnɛ panla yɛnri yaraga ni, a mì je le?
Naga yɛn ma, naŋgunjɔ wilan wele ma te mi suu saga wi le?
17 Naga yɛn ma, mila yaakara ti ka na yɛ wi le?
Mi si pijiriwe wi tasaga kan wi yeri wi le?
18 Katugu maga lɛ wa na lefɔnrɔ sanga wi ni, mì pijiriwe wi gbegele ma pye paa wi to yɛn;
maga lɛ pànla se, mi yɛn naŋgunjɔ wi yɛgɛ sinvɔ.
19 Naga yɛn ma, lere ŋa wi yɛn tege ni, mi wa yan yaripɔrɔ fu,
konaa ma fyɔnwɔ fɔ wa yan paritɔnŋgɔ fu,
20 na mi silan simbaala pe sire nda pè ti yaripɔrɔ ta kan ki fɔ wi yeri wuu yɛɛ tɔn were ti na,
mbe ti wila duwaw piin na kan wi le?
21 Na kaa pye mi pijiriwe wa figiri kiti kɔnsaga na,
katugu kiti kɔnfɛnnɛ pe mbe ya mbanla saga,
22 kona na kɛyɛn yi kɔɔnlɔ yi laga wa na pajoro ti na,
na kɛyɛn yi kɔɔnlɔ wa na kanmishoolo pe na yi toori.
23 Katugu mìla pye na fyɛ Yɛnŋɛlɛ li jɔlɔgɔ wa na na,
mi saa ya mbe yaraga ka pye li gbɔgɔwɔ gbembe pi yɛgɛ sɔgɔwɔ.
 
24 Naga yɛn ma, mila na jigi wi taga tɛ na wi le?
Naga yɛn ma, mila ki yo tɛ piiri wi kan ma yo fɔ: «Pa na jigi wi yɛn mboro na wi le?»
25 Na kaa pye mi yɛn na yɔgɔri na penjagbɔrɔ tawa pi wogo na,
konaa na yarijɛndɛ ti lɛgɛwɛ pi kala na,
26 na kaa pye mi yɔnlɔ ki yan kila yinrigi ŋgbanga,
nakoma ma yeŋge ki yan kì pan na finri,
27 na kaa pye na jatere wìlan fanla mala puŋgo larawa,
na kaa pye mìlan kɛɛ ki taga wa na yɔn ki na ki yaara ti mɛgɛ ni mari gbɔgɔ,
28 ki pyewe pi na ma, ki jɛn na pye kapege na na, ŋga kiti daga mbe kɔn ki na,
kona mi jɛn na Yɛnŋɛlɛ na wa naayeri li java.
 
29 Naga yɛn ma, mila pye na yɔgɔri na jugu wi jɔlɔgɔ ki wogo na wi le?
Naga yɛn ma, mìla pye na yeni nayinmɛ ni kapege ŋga kùu ta ki kala na wi le?
30 Mi sila yɛnlɛ yɛrɛ na yɔn ki para ki wa ki la,
mbe daŋga sɛnrɛ yo mbe wa wi na, mbaa ki jaa wi ku.
31 Leele mbele pàa pye wa na go ki ni, pàa pye na yuun fɔ:
«Ambɔ wi fa kara ka wa wi yeri mbe tin?»
32 Nambanŋa na wɔnlɔ na yeri laga funwa na;
na go kìla pye ma yɛngɛ ma nambanmbala pe kan.
33 Naga yɛn ma, mila kapere ti lara paa sɛnwee piile sanmbala pe yɛn wi le?
Mila kambasinnde ti tɔn wa na nawa pi ni wi le?
34 Mi sila pye na fyɛ janwa wi sɛnyoro ti yɛgɛ,
leele paa na tifaga ki sila pye na sunndo kɔngɔ waa na na,
mbanla kan mbe pyeri mbe koro wa na go.
 
35 Ɛnhɛn, mi yaa ambɔ fɔ ta wi logo na yeri?
Na sɛnrɛ puŋgo woro tori yɛɛn.
Ki yɛn ma yala Yɛnŋɛlɛ na yawa pi ni fuun fɔ lilan yɔn sogo!
Sɛwɛ ŋa na winfɔ wì yɔnlɔgɔ na baga na na,
36 mi yaa wi lɛ wa na pajoro ti na,
mboo pye paa wunluwɔ njala yɛn, mbeli kan wa na go ki na.
37 Mi yaa na yɔngɔlɔ yɔn ki ni fuun ki yɛgɛ yo Yɛnŋɛlɛ li kan;
mi yaa fulo li tanla paa wunluwɔ pyɔ yɛn.
 
38 Na kaa pye na kɛɛrɛ ti yɛn na gbele na baga na na ma yo mìri yu,
na kaa pye na kɛɛrɛ palaye pe yɛn na yanli nala jɛrɛgi,
39 na kaa pye mì kɛɛrɛ ti yarilire ti li mi siri sara,
na kaa pye mì ti jɔlɔgɔ to ti tunmbyeele pe na mbaa pe kuun,
40 kona wuuro mbe fi wa kɛɛrɛ ti ni bile wi yɔnlɔ,
yanpege mbe fi wa ɔrizhi wi yɔnlɔ.
 
Zhɔbu wi sɛnrɛ pa tì kɔ namɛna.