Zhɔbu wi yɔn sogomɔ: Wì yo lere se ya mbe Yɛnŋɛlɛ li kapyegele ke kɔrɔ jɛn
26
1 Kona, a Zhɔbu wì si Bilidadi wi yɔn sogo ma yo fɔ:
2 E, lere ŋa fanŋga woro wi ni, maa sagalɔmɔ pi jɛn fasi!
Lere ŋa wi yɛn fanŋga fu fɔ, maa shɔlɔmɔ pi jɛn dɛ!
3 Ma kambajɛnŋɛ wi yɛrilɔmɔ pi jɛn dɛ!
Ma yɛn nɔɔ jɛnmɛ pi nari gbɔgɔ dɛ!
4 Maa ki sɛnrɛ nda ti yuun ambɔ fɔ kan ma?
Ambɔ wigi sɛnrɛ nda ti le ma yɔn ma?
 
5 Kuulo pe yɛn na seri
wa kɔgɔje wo naa wi nawa yaara ti nɔgɔ.
6 Kuulo tara ti yɛn ma yɛngɛ kpeŋgbeleŋgbe Yɛnŋɛlɛ li yɛgɛ na,
wege tijugo ki woro ma lara li na.
 
7 Yɛnŋɛlɛ lo lì naayeri wi yɔnlɔparawa kamɛŋgɛ kɛɛ ki tɛgɛ wa fowaga ki go na,
lì tara ti yerege, ma sigi ta li siri yerege yaraga na.
8 Li ma tɔnmɔ pi gbogolo pi yɛɛ na wa li kambaara ti ni,
ɛɛn fɔ kambaara tila si walagi tɔnmɔ pi nuguwɔ pi kala na.
9 Li ma li wunluwɔ jɔngɔ ki yɛgɛ tɔn,
li ma kambaara ti tɛgɛ mali wunluwɔ jɔngɔ ki tɔn.
 
10 Lì perege kacɛn wogo kɔn wa kɔgɔje wi na,
ma ko pye yanwa po naa diwi wi ni ti filisaga.
11 Na li ka gbanla,
naayeri wi nɔgɔna cɛnyaara ti ma tigile fɔ ma yɛgɛyɛgɛ.
 
12 Li ma kɔgɔje tɔnmɔ pi tigile li yawa pi fanŋga na,
li ma kɔgɔje yarifɛlɛgɛ Arahavu ki tɔngɔ li kajɛnmɛ pi fanŋga na.
13 Li yɔn tifɛlɛgɛ ki ma yɛnŋɛlɛ li pɛ mali sulu coyi,
li kɛɛ ki ma wɔɔgɔ pepege ŋga kila fee ki furugu.
14 Ma si yala, ko wogo ŋga ko yɛn Yɛnŋɛlɛ li kapyegele ke ke ni fuun jɛɛlɛ le.
Tinmɛ jɛnri wè logo cɛ wa ki kagala ke ni;
na liga ka li yawa pi naga paa yɛnŋɛlɛ gbaanra yɛn, ambɔ wi mbe ya mberi jɛn mbe wali ti na?