Zhɔbu wìla yɔn sogomɔ kan maa wɛnnɛ pe jɛrɛgi
6
1 Kona, a Zhɔbu wì si Elifazi wi yɔn sogo ma yo fɔ:
2 E, ndɛɛ ki pye pe mbe ja ya mbanla jɔlɔgɔ ki taanla culo na mbege jɛn!
Ndɛɛ ki pye pe mbe ja ya mbanla tege kagala ke ni fuun ke taga taanlayaraga na mbe ke jɛn!
3 Kaselege ko na, na jɔlɔgɔ ki jɛn na nugu mbe wɛ kɔgɔje yɔn taambugɔ ki na,
ko kì ti mi yɛn na para nala yɛɛ tooro.
4 Katugu Yɛnŋɛlɛ na yawa pi ni fuun fɔ lìlan wɔn li jɔlɔgɔ wangala ke ni,
ke shɔnrɔ pere tì ye na wire ti lagapyew ki ni.
Sunndo kɔngɔ kagala ŋgele Yɛnŋɛlɛ li maa waa sɛnweele pe na, kè yere malinjɛ wi na na mɛgɛ ni.
 
5 Naga yɛn ma, yan sofile wi mbe ya mbaa gbele yan wogo na mboo ta wi yɛn ma yere le yan tipirige ki tanla le?
Naga yɛn ma, nɛgɛ ki mbe ya mbaa gbele mbege ta ki yɛn ma yere le ki yaakara ti tanla le?
6 Naga yɛn ma, tanwa woro yaakara nda ni, lere mbe ya mberi ka kɔ fu le?
Naga yɛn ma, ŋgojɛnɛ tipinnɛ tanwa ma pye wa li nawa lafige ki ni le?
7 Ki yaakara nda mi sila pye na jaa mbe jiri ti na,
to tì pan ma pye na yaakara re, ali mbege ta ti yɛn mala mbɛn.
 
8 E, ŋga mi yɛn na yɛnri Yɛnŋɛlɛ li yeri, ndɛɛ ki pye ki mbe ja ya pye na kan!
Na jigi wi yɛn yaraga ŋga na, ndɛɛ Yɛnŋɛlɛ li mbe jaga kan na yeri!
9 Mila jaa Yɛnŋɛlɛ li yɛnlɛ ki na lilan tɔngɔlɔ,
lili kɛɛ ŋga kila na go singi ki laga na na, lilan laba teere!
10 Pa kona, na kotogo ki jɛn na sogo na na,
mi jɛn naa yeni mbaa kanni nayinmɛ ni, ali wa ki jɔlɔgɔ gbɔgɔ ŋga ki ni,
katugu mii je Yɛnŋɛlɛ na li yɛn kpoyi li sɛnrɛ ti na.
 
11 Ɛɛn fɔ fanŋga si koro na ni naa mbaa ki kɔsaga tanga singi,
mi yaa kɔ kɔwɔ mba na po yɛn yiŋgi mbe sigi kun na yɛɛ ni?
12 Naga yɛn ma, na fanŋga ki yɛn paa sinndɛlɛgɛ fanŋga yɛn wi le?
Na witige ki yɛn paa tuguyɛnrɛ yɛn wi le?
13 Sagafɔ kpɛ woro na na naa,
ali yɛrɛ yirisaga jɛɛlɛ lo si koro na yeri naa.
 
14 Lere ŋa wi yɛn na jɔlɔ, wi daga wi wɛnnɛ pe kagbaraga ki ni,
ali na kaa pye wìgi yaga, wi woro na fyɛ naa Yafɔ Yɛnŋɛlɛ li yɛgɛ.
15 Na wɛnnɛ pànla java paa lafogo ma kaa lere java we,
pànla java paa yanwira lafogo ka yɛn, ŋga ki lapyɔ wì waga pew.
16 Were sanga wi kɔsaga, tɔnmɔ mba pì simbi po naa nɛzhi wi ni ti kaa yanni,
ti tɔnmɔ pi maga yin ma gbɔn ma piri.
17 Ɛɛn fɔ kanga na, ki ma waga,
kafugo sanga ni, tɔnmɔ na pye wa ki ni.
18 Yɔngɔmɛ fɛnnɛ mbele pe maa tooro wa gbinri wi ni, pe ma koro na tɔnmɔ lagajaa fɔ ma pe konɔ li wa,
pe ma ye ma kari wa gbinri wi ni ma saa kɔ wa.
19 Tema ca tangafɛnnɛ mbele pe maa tooro yɔngɔmɛye na wa gbinri wi ni, pe ma pe yɛrɛ ti yirige na ki tɔnmɔ pi lagajaa,
Saba tara tangafɛnnɛ pe ma pe jigi wi taga ki tɔnmɔ pi na.
20 Ɛɛn fɔ pe jigi ŋa pàa taga pi na, a wì kanŋga ma pye fɛrɛ pe yeri,
katugu naa pàa ka saa gbɔn wa, a pe jigi wì si kɔn pe na.
 
21 Koni, yoro fun pa ye wogo ki yɛn ma na yeri.
Naa yànla jɔlɔgɔ ki yan, a yè si fyɛ.
22 Naga yɛn ma, mi ye yɛnri ma yo ye yaraga ka kan na yeri le?
Mi ye pye ma yo ye yarikanra ta lagala wa ye yarijɛndɛ ti na mberi kan na kala na le?
23 Mi ye pye ma yo yanla shɔ na jugu wi kɛɛ le?
Nakoma yanla shɔ lewɛlɛwɛ wi kɛɛ le?
 
24 Yege naga na na, pa kona mi yaa pyeri,
na puŋgosaga yege naga na na!
25 Kaselege sɛnrɛ ti maa yaa,
ɛɛn fɔ ye sɛnŋgbanra yogo ki yaa yiŋgi yɔn na kan?
26 Naga yɛn ma, yaa jaa mbanla jɛrɛgi na sɛnyoro ti kala na wi le?
Mbe lere ŋa wi jigi wì kɔn wi na wi sɛnrɛ ti jate go fu sɛnrɛ wi le?
27 Ye mbe yɛnlɛ mbe pɛtɛ gbɔn pijiriwe go na mbe ta mboo tafɔ wi jɛn le?
Ye mbe yɛnlɛ mbe ye wɔnlɔnaŋa wi pɛrɛ kɛ?
28 Koni ye ye yɛngɛlɛ ke kan na na yaa na wele,
yege yan mi yɛn na finlɛlɛ ye yɛgɛ sɔgɔwɔ wi le?
29 Ye ye jatere wi kanŋga, yaga ka kambasinŋge pye;
ye ye jatere wi kanŋga, yege jɛn ye yo fɔ na kala li yɛn ma sin.
30 Naga yɛn ma, ye sɛnrɛ mbasinnde logo na yɔn le?
Naga yɛn ma, na yɔn ki se ya mbe kapege sɛnrɛ ti jɛn mberi wɔ ti yɛɛ ni wi le?