Yurugo ŋga Debora wìla kɔ
5
1 Ki pilige nuŋgba ki ni, a Debora wo naa Abinowamu pinambyɔ Baraki wi ni, pè sigi yurugo ŋga ki kɔ ma yo fɔ:
2 Yaa Yawe Yɛnŋɛlɛ li sɔnni.
Teele pèle keli leele pe yɛgɛ wa Izirayɛli tara.
Leele pè pe yɛɛ kan mbe malaga gbɔn.
3 Yoro wunlumbolo yaa nuru na yeri.
Yoro mbele ye yɛn teele, ye nuŋgbolo jan yaa nuru.
Mi yaa yurugo kɔ Yawe Yɛnŋɛlɛ li kan;
mi yaa yurugo kɔ mbe Yawe Yɛnŋɛlɛ, Izirayɛli woolo Yɛnŋɛlɛ li gbɔgɔ.
4 E, Yawe Yɛnŋɛlɛ, màa yiri wa Edɔmu tara ma pan sanga ŋa ni,
màa yiri wa Seyiri yanwira ti na ma tigi sanga ŋa ni,
tara tìla pye na tigile.
Tɔnmɔ la tigi ma yiri wa naayeri,
kambaara tìla tisagbɔgɔ pan.
5 Yanwira tìla tigile Yawe Yɛnŋɛlɛ li yɛgɛ sɔgɔwɔ.
Sinayi yanwiga fun kìla yɛgɛyɛgɛ Yawe Yɛnŋɛlɛ, Izirayɛli woolo Yɛnŋɛlɛ li yɛgɛ sɔgɔwɔ.
 
6 Anati pinambyɔ Shamigari wi wagati wi ni,
Yayɛli wagati wi ni, koŋgolo kàa koro waga.
Tangafɛnnɛ pàa pye na toro koŋgɛŋgɛlɛ ni.
7 Pàa yiri wa Izirayɛli tara cara ti ni mari yaga waga;
pàa yiri wa ti ni,
fɔ mi Debora mì kaa yiri sanga ŋa ni,
fɔ mì kaa yiri ma pye paa Izirayɛli woolo pe nɔ yɛn.
8 Izirayɛli woolo pàa yarisunndo fɔnndɔ wele ma wɔ.
Le ki yɔngɔlɔ nuŋgba ke ni, a malaga kì si to pe na.
Izirayɛli tara maliŋgbɔɔnlɔ pàa pye nambala waga nafa shyɛn (40 000).
Ɛɛn fɔ tugurɔn sigeyaraga nuŋgba sila yan wa pe yeri,
njanraga kpɛ sila pye pe yeri.
 
9 Na jatere wi yɛn Izirayɛli woolo teele pe na,
poro mbele pè pe yɛɛ kan wa leele pe sɔgɔwɔ, mbe malaga ki gbɔn.
Yaa Yawe Yɛnŋɛlɛ li sɔnni!
10 Yoro mbele fuun yè lugu ma cɛncɛn sofilele jɛɛlɛ fiile fiile na,
yoro mbele ye yɛn ma cɛn tara fuuro sɔnŋgbanga woro na,
yoro mbele ye yɛn tangala na wa koŋgolo ke ni,
yaa jatere piin ki na.
11 Mbele pe wa puluyo yi tanla na tɔnmɔ pi yɛɛlɛ,
yaa pe yurukɔgɔ ki nuru.
Pe yɛn na Yawe Yɛnŋɛlɛ li kajɛŋgɛ pyege ki koo yurugo,
konaa Izirayɛli woolo teele pe yawa mba ta wa malaga ki ni pi ni.
Kona, a Yawe Yɛnŋɛlɛ li gbogolomɔ woolo pè si yiri ma kari wa ca ki mbogo yeyɔnrɔ ti na.
 
12 Yɛn ma yiri, yɛn ma yiri Debora;
yɛn, yɛn ma yiri ma yurugo le, malaga gbɔnyurugo.
Mboro Abinowamu pinambyɔ Baraki,
yiri ma kari leele mbele mà yigi kasopiile pe ni.
 
13 Ye wele, leele jɛnri mbele pàa koro go na,
pàa tigi ma saa gbogolo wa teele fanŋga woolo pe tanla.
Yawe Yɛnŋɛlɛ li woolo pàa pan ma gbogolo na tanla wa cew tafɛnnɛ pe sɔgɔwɔ.
14 Mbele pàa ya Amalɛki setirige piile pe ni,
pàa yiri wa Efirayimu tara.
A Bɛnzhamɛ cɛnlɛ woolo pè si taga pe na,
ma pinlɛ pe ŋgbeleye yi ni.
Teele la yiri wa Makiri sege ki ni ma pan.
Maliŋgbɔɔnlɔ teele la yiri wa Zabulɔn cɛnlɛ li ni ma pan.
15 Isakari cɛnlɛ woolo teele pàa saa taga Debora wi na.
Isakari cɛnlɛ woolo pe ni fuun pàa taga Baraki wi puŋgo na, ma kari wa funwa laga falafala ki na.
Ɛɛn fɔ, Urubɛn cɛnlɛ li seye woolo poro la koro na kendige woo pe yɛɛ ni.
16 Yiŋgi na yè si koro wa yaayoro jasaala pe nawa na yaayoro ti gbelege ki nuru?
Ee, Urubɛn cɛnlɛ li seye woolo pàa kendige gbɔgɔ wɔ pe yɛɛ ni.
17 Galaadi tara woolo pàa koro wa Zhuridɛn gbaan wi kɛɛ ŋga na.
Dan cɛnlɛ woolo pe sila yiri wa pe tɔnmɔkɔɔrɔ ti tanla.
Asɛri cɛnlɛ woolo pàa koro wa kɔgɔje wi yɔn ki na,
ma cɛn wa kɔgɔje wi yɔn ki na,
ma cɛn wa pe tɔnmɔkɔɔrɔ yeresara nda ti yɛn yɛyinŋge na ti tanla.
18 Zabulɔn cɛnlɛ woolo pe yɛn leele mbele pe ma pe yɛɛ kan kunwɔ pi yeri, wa malaga gbɔnsaga.
Nɛfitali cɛnlɛ woolo ko nuŋgba ko pè pye fun.
 
19 Wunlumbolo mbele we mbɛnfɛnnɛ, pèle la pan ma to we na malaga ni;
ee, Kana tara fɛnnɛ wunlumbolo pàa malaga gbɔn we ni wa Taanaki ca, wa Megido ca tɔnmɔ laga ki tanla.
Ɛɛn fɔ, pe sila yaara ta mbe koli mbe kari ti ni, nakoma warifuwe.
20 Naayeri wɔnŋgɔlɔ jate kàa malaga gbɔn.
Ma ke ta wa ke torokoŋgolo ke ni, kàa malaga gbɔn Sisera wi ni.
21 Kishɔn lafogo kì pe li,
ko ŋga kìla pye wa maga lɛ wa faa, Kishɔn lafogo ye.
Ye pan waa tanri fanŋga ni.
22 Kona, a shɔnye pè si fe ma toro,
a pe yenjoro tìla tara ti suun fɔ jɛŋgɛ.
Pàa fe ma kari maliŋgbɔɔnlɔ teele pe ni.
23 A Yawe Yɛnŋɛlɛ li mɛrɛgɛ wì sho fɔ:
Ye Merozi ca ki daŋga, yege daŋga, yege daŋga.
Katugu ca woolo pe sila pan mbe Yawe Yɛnŋɛlɛ li saga.
Pe sila pan pe maliŋgbɔɔnlɔ wɛlimbɛlɛ pe ni mbeli saga.
 
24 Keni cɛnlɛ woolo naŋa Hebɛri, Yɛnŋɛlɛ sa duwaw wi jɔ Yayɛli wi na mbe wɛ jɛɛlɛ pe ni fuun pe na.
Yɛnŋɛlɛ sa duwaw wi na mbe wɛ jɛɛlɛ mbele pe maa cɛɛn paara yinrɛ nɔgɔ pe na.
 
25 Sisera wìla wi yɛnri tɔnmɔ ni,
a wì si nɔnɔ kan wi yeri, a wì wɔ.
Wìla nɔnɔ nara kan wi yeri legbɔɔlɔ wɔjɛnnɛ ni, a wì wɔ.
26 Ko puŋgo na, a wì si go kankanŋgala lɛ,
ma tunmbyeele marito lɛ wi kalige ki ni,
mɛɛ li kan wa Sisera wi go ki na maga furu.
Wìla wi nuŋgbonɔgɔ ki ya maga furu wi na.
27 A Sisera wì si to ŋgbanga ma kanŋguuro kan Yayɛli wi jegele, ma wɔ ma to fɔ ma sanga tara ti na.
Wìla to ŋgbanga ma kanŋguuro kan wi jegele ma wɔ ma to.
Wìla to ŋgbanga ma kanŋguuro kan laga ŋga na,
wìla to le ma ku.
 
28 A Sisera wi nɔ wì si pan ma wele wa fenɛtiri wi ni.
Wìla pye na jɔrɔgi wa fenɛtiri wi mɛrɛ wegele ke ni na yuun fɔ:
«Yiŋgi na wi wotoro wi nɛɛ mɔni wa wi woro mbe kɔn mbe yiri?
Yiŋgi na wi wotoroye pe si woro na tinmɛ gbɔɔ yinrigi na paan?»
29 Jɛɛlɛ tijinliwɛ fɛnnɛ mbele pàa pye wa wi ni, pàa wi yɔn sogo ma sɛnrɛ nda yo,
to wìla pye na sɔngɔrɔ ti na, na yuun fɔ:
30 Kaselege ko na, pè yaara ta ma koli.
To pe wa na yɛɛlɛ pe yɛɛ na.
Maliŋgbɔɔnlɔ pe ni fuun pe yaa ta sumbonɔ nuŋgba nuŋgba nakoma shyɛnzhyɛn.
Sisera wo yaa yaripɔrɔ nda ti yɛn yɔɔnrɔ ni to ta,
yaripɔrɔ nda ti yɛn yɔɔnrɔ ni, a pèri sɔgɔ.
Yaripɔgɔ nuŋgba, nakoma shyɛn nda ti yɛn yɔɔnrɔ ni, a pèri sɔgɔ,
to yaa pye cew tafɔ wo woro.
31 Ee, Yawe Yɛnŋɛlɛ, ma ti ma mbɛnfɛnnɛ pe ni fuun pè ku ki kulɔmɔ mba pi na.
Ɛɛn fɔ ma yɛn ma mbele ndanla, pe pye paa yɔnlɔ ki yɛn,
na ki ka yiri ki fanŋga ki ni la yɛngɛlɛ we.
Ko puŋgo na, a tara tì si koro yɛyinŋge na fɔ ma saa gbɔn yɛlɛ nafa shyɛn.