Zhakɔbu wìla duwaw pye wi pinambiile pe kan
49
1 Kona, a Zhakɔbu wì suu pinambiile pe yeri ma yo fɔ: «Ye pan ye gbogolo, kagala ŋgele ke yaa ye ta wagati ŋa wila paan wa yɛgɛ wi ni, mi yaa ke yɛgɛ yo ye kan.
2 Ye gbogolo ye logo Zhakɔbu pinambiile!
Yaa nuru ye to Izirayɛli wi yeri!
 
3 «Urubɛn mboro ŋa ma yɛn na pinambyɔ koŋgbanŋa,
mìla ma se sanga ŋa ni na fanŋga ki ni fuun ki yɛn na ni.
Gbɔgɔwɔ naa fanŋga ti yɛn ma woro ma wɛ ma to seyɛɛnlɛ pe na.
4 Ma yɛn paa lɔgɔ yɛn ŋga ki maa fuun ŋgbanga.
Ɛɛn fɔ, ma se yɛkeere ti ta naa,
katugu màla fuuro ti tanga,
mà sinlɛ na jɛɛlɛ wa ni wa na sinlɛsaga maga tɛgɛ fyɔngɔ ni.
 
5 «Simeyɔn naa Levi pe yɛn nɔsepiile.
Pe tokobiye pe yɛn maliŋgbɔnyaara tipere.
6 Mi se gbogolo pe ni pe yɔn lemɛ pa na.
Mi se silan jatere wi wa nuŋgba pe ni wa pe gbogolosara ti ni.
Katugu wa pe naŋgbanwa pi ni, pàa leele gbo,
wa pe nandanwa kagala ke ni, pàa napɛnɛ pe pannda ti kɔɔnlɔ.
7 Mì pe naŋgbanwa kapyege ki daŋga, katugu pìla pye ma pe.
Mì pe naŋgbanwa ndorogo ki daŋga, katugu pe sila lere yinriwɛ ta.
Mi yaa ka pe setirige piile pe laga pe yɛɛ na wa Zhakɔbu tara,
mbe pe jaraga pe yɛ pe yɛ wa Izirayɛli tara.
 
8 «Zhuda, ma to seyɛɛnlɛ pe yaa kaa ma sɔnni.
Ma yaa ka ma juguye pe ŋgbanga pe go sogo ma kan.
Ma to seyɛɛnlɛ pe yaa kaa fɔli ma yɛgɛ sɔgɔwɔ mbaa ma gbogo.
9 Zhuda, ma yɛn paa jara yirifɔnŋɔ yɛn.
Na pinambyɔ, mà yiri wa ma kagboro ti go na na paan.
Mɔ̀ɔ kanŋguuro ti kuuro ma sinlɛ paa jara yɛn, paa jara nɔ yɛn.
Ambɔ wi mbe ya mboo pye wi yiri?
10 Wunluwɔ kanŋgala li se wɔ wa Zhuda sege ki ni.
Tegere gbɔtangala li se wɔ wi setirige piile pe kɛɛ
fɔ li lɛfɔ jɛnŋɛ wi sa pan;
wo ŋa cɛngɛlɛ ke yaa kaa nuru wi yeri we.
11 Wi ɛrɛzɛn tiire ti yaa ka lɛgɛ fɔ wi yaa kaa wi sofile wi poo ti na,
mbaa wi sofile pyɔ wi poo ɛrɛzɛn tirige ŋga kì yɔn ma wɛ ti ni fuun na ki na.
Wi yaa kaa wi yaripɔrɔ ti jori wa duvɛn wi ni,
mbaa wi derigbɔgɔ ki jori wa ɛrɛzɛn tɔnmɔ pi ni.
12 Wi yɛngɛlɛ ke yaa la yanlagi duvɛn wi kala na,
wi ŋgangala ke yaa la finligi nɔnɔ wi kala na.
 
13 «Zabulɔn wo yaa ka cɛn wa kɔgɔje yɔn ki na,
wa laga ŋga tɔnmɔkɔɔrɔ ti yaa kaa yeregi.
Wi tara ti yaa ka gbɔgɔ mbe gbɔn fɔ wa Sidɔn ca ki na.
 
14 «Isakari wo yɛn paa sofile ŋa wi yɛn fanŋga ni,
wi yɛn ma sinlɛ wa yaayoro jasa wi ni.
15 Wìgi yan fɔ wi yɛn ma sinlɛ laga ŋga na na wogo, ki yɛn ma yɔn,
fɔ tara tì tanla.
Wùu pɔgɔlɔ ke gbɛgɛlɛ tuguro lɛmɛ pi kala na.
Wùu yɛɛ kan tunŋgo ki yeri paa kulo yɛn.
 
16 «Dan wo yaa cɛn wi woolo pe go na mbaa pe kiti wi kɔɔn,
mbe pye paa Izirayɛli cɛngɛlɛ sanŋgala ke nuŋgba yɛn.
17 Dan wo yaa ka pye paa wɔɔgɔ yɛn ŋga kì sinlɛ wa konɔ,
paa mɛrɛgɛ yɛn, ŋga kì sinlɛ wa konɔ li yɔn na, na singi.
Wi yaa ka shɔn wi nɔ wi yenjogo ki na,
fɔ shɔn lugufɔ wi wɔ wi to wi jali.
18 E, Yawe Yɛnŋɛlɛ, na jigi wi yɛn ki na fɔ ma yaa kanla shɔ.
 
19 «Gadi, maliŋgbɔɔnlɔ ŋgbelege yaa ka yiri mbe to ma na;
ɛɛn fɔ, ma yaa ka yiri pe kɔrɔgɔ, mbe to pe na, mbe pe purɔ.
 
20 «Asɛri, yarilire lɛgɛrɛ yaa ka yiri wa ma yeri,
wunlumbolo yarikatanra yaa kaa taa wa ma yeri.
 
21 «Nɛfitali wo yɛn paa lufaa yɛn ŋa wi yɛn yɛyinŋge na.
Wi yaa kaa piile jɛmbɛlɛ siin.
 
22 «Zhozɛfu wo yɛn paa tige yɛn ŋga ki maa sɛni,
ŋga ki yɛn pulugo yɔn na.
Ki njere tì yiri ma yagara ma wɛ mbogo na.
23 Sandira wɔnfɛnnɛ pòo yɔn ja,
pòo wɔn pe wangala ke ni maa yɛgɛ wɛri.
24 Ɛɛn fɔ, wìla wi sandiga ki yigi ŋgbanga,
Zhakɔbu Yɛnŋɛlɛ na fanŋga gbɔgɔfɔ li fanŋga na, wi kɛyɛn yìla fanŋga ta.
Lo li yɛn Izirayɛli wi kɔnrifɔ ma pye walaga ŋga ki yɛn wi kɛɛ kansaga.
25 Ma to wi Yɛnŋɛlɛ lo li yɛn ma sagafɔ,
lo na li yɛn yawa pi ni fuun fɔ, lo li yaa duwaw ma na!
Mbe duwaw ma na mbe ti tisara mbaa paan mbaa yinrigi wa naayeri!
Mbe duwaw ma na mbe ti tɔnmɔ mbaa yinrigi wa tara ti nɔgɔ!
Mbe duwaw ma na mbe ti jɛɛlɛ pe pye sevɛnnɛ konaa yaayoro ti lɛgɛ!
26 Mi ŋa ma to, duwaw ŋa mì pye ma kan, wì wɛ ŋa na teele pàa pye na kan wi na
fɔ ma saa gbɔn wa yanwira nda ti yɛn kɔsagafu ti go na.
Yɛnŋɛlɛ sa ti ki duwaw wi tigi Zhozɛfu wi na,
wo ŋa wi yɛn wi to seyɛɛnlɛ pe go na, ki duwaw wi tigi wa wi go na!
 
27 «Bɛnzhamɛ wo yɛn paa kombokaga yɛn, ŋga ki ma yanyaraga ka yigi maga kɔɔnlɔ.
Pinliwɛ ni, ki ma ki kagboro ti ka;
yɔnlɔkɔgɔ, kì yaara nda koli, ki mari yɛɛlɛ.»
28 Poro mbele poro pe yɛn Izirayɛli cɛngɛlɛ kɛ ma yiri shyɛn ŋgele. Pe to wìla duwaw wi pye pe kan ma sɛnrɛ nda yo, tori yɛɛn. Pe ni fuun nuŋgba nuŋgba wìla duwaw pye pe kan, a wì yiri wi yɛ wi yɛ.
Zhakɔbu wi kunwɔ sɛnrɛ
29 Ko puŋgo, a Zhakɔbu wì sigi sɛnrɛ nda ti yo wi piile pe kan fɔ: «Mi yaa ku mbe taga wa na tɛlɛye mbele pè ku pe na. Na kuŋgɔlɔ, ye sanla le wa na tɛlɛye pe fanga ki ni, wa waliwege ŋga ki yɛn wa Hɛti cɛnlɛ woolo naŋa Efirɔn wi kɛrɛ ki ni, 30 wa kɛrɛ ti waliwege ki ni, wa Makipela, wa Mamire laga ki tanla, wa Kana tara. Ko kɛrɛ to Abirahamu wìla lɔ Hɛti cɛnlɛ woolo naŋa Efirɔn wi yeri mari pye gboolo lesaga. 31 Pa pàa Abirahamu naa wi jɔ Sara pe le wa, pa pàa Izaki naa wi jɔ Erebeka pe le wa, pa mìla Leya wi le wa fun. 32 Kɛrɛ to naa waliwege ŋga ki yɛn wa ti ni, pàa ti lɔ Hɛti cɛnlɛ woolo poro yeri.»
33 Naa Zhakɔbu wìla kaa kɔ wi sɛnyoro ti na wi pinambiile pe kan, a wì si nuru ma sinlɛ, mɛɛ ku ma taga wa wi tɛlɛye pe na.