A Yoxil Carta
SAN JUAN
Vachꞌ lolonel tzꞌalji dꞌa vin̈aj Gayo
1
A in icham vinac in tic,
tzin tzꞌibꞌejbꞌat jun in carta tic dꞌayach,
ach vucꞌtac Gayo.
A ach tic,
tzach in xajanej val dꞌa smasanil in cꞌool.
2 Ach xajanabꞌil vuuj,
tzin cꞌan dꞌa co Mam Dios to ichocabꞌ svachꞌil aj dꞌa yic Dios chiꞌ,
ichocabꞌ chiꞌ svachꞌil pax yecꞌ uuj,
ayocabꞌ pax a qꞌuinal.
3 Ayic ix ul yalan ebꞌ cucꞌtac uuj,
ix in te tzalaj val dꞌa tic yujto ix yal ebꞌ to ay val och a pensar dꞌa jun cꞌaybꞌubꞌal te yel,
tza cꞌanabꞌajejn̈ej paxi.
4 Ayic svabꞌani to an̈ejaꞌ scꞌanabꞌajan jun cꞌaybꞌubꞌal te yel ebꞌ ochnac creyenteal vuuj,
malaj junocxo bꞌaj scot in tzalajcꞌolal icha jun chiꞌ.
5 Ach xajanabꞌil vuuj,
te vachꞌ tzutej a pensar svabꞌi.
Tzach colvaj dꞌa ebꞌ quetcreyenteal,
vachꞌchom ay ebꞌ man̈ ojtacoc.
6 Ay ebꞌ ix alan dꞌa yichan̈ ebꞌ creyente smolbꞌej sbꞌa dꞌa tic to tza xajanej a bꞌa yedꞌ ebꞌ taꞌ.
Tzach colvaj val dꞌa ebꞌ bꞌaj sbꞌeyeqꞌui.
Smoj ichan̈ej chiꞌ tzutej a bꞌa dꞌa ebꞌ,
yujto icha chiꞌ sgana Dios.
7 A ebꞌ chiꞌ,
yujn̈ej yacꞌan servil Jesucristo ebꞌ tzꞌecꞌ ebꞌ.
Malaj junoc tas scha ebꞌ dꞌa ebꞌ man̈ ojtannacoc Dios.
8 Yuj chiꞌ,
yovalil a on̈ tic tzon̈ colvaj dꞌa ebꞌ.
Tato icha chiꞌ,
ichato van co munlaj pax yedꞌ ebꞌ ayic tzꞌecꞌ ebꞌ yalel jun cꞌaybꞌubꞌal te yel.
A sbꞌeybꞌal vin̈aj Diótrefes
9 In tzꞌibꞌejnacbꞌat jun in carta dꞌayex a ex tze molbꞌej e bꞌa taꞌ.
Palta a vin̈aj Diótrefes,
sgana vin̈ an̈ej vin̈ tzex acꞌan mandar taꞌ.
Yuj chiꞌ syal vin̈ to malaj yelcꞌoch tas scal dꞌayex.
10 Yuj chiꞌ,
tato ol in cꞌoch dꞌayex taꞌ,
ol valaꞌ tas smul vin̈,
yujto ton̈ej syesej co muloc vin̈ dꞌayex.
Man̈ocn̈ej juntzan̈ chiꞌ scꞌulej vin̈.
Max schapax juntzan̈ ebꞌ quetcreyenteal vin̈ scꞌoch dꞌayex taꞌ.
Vachꞌchom ayex e gana tze cha ebꞌ,
axo vin̈ sqꞌue yoval.
Tzex spechpaxel vin̈ dꞌa scal ebꞌ quetcreyenteal taꞌ.
11 Ach xajanabꞌil vuuj,
man̈ a bꞌeybꞌalej sbꞌeybꞌal ebꞌ chuc scꞌulej.
An̈ej tas scꞌulej ebꞌ vachꞌ,
a tza cꞌulej.
Tato vachꞌ scutej co bꞌa,
yic on̈xo ton Dios.
Palta a ebꞌ chuc syutej sbꞌa,
man̈ yojtacoc Dios ebꞌ.
A svachꞌ bꞌeybꞌal vin̈aj Demetrio
12 Axo vin̈ cucꞌtac Demetrio,
van yalan ebꞌ smasanil yuj svachꞌil vin̈,
chequel to scꞌanabꞌajej jun abꞌix te yel vin̈.
An̈ejtonaꞌ on̈ tic,
scal pax vin̈ vachꞌil.
Eyojtac,
a tas scalaꞌ,
te yel.
Tzꞌacꞌjibꞌat stzatzil scꞌool ebꞌ
13 Tzijtumto tas in gana svalbꞌat dꞌayach taꞌ,
palta maj in tzꞌibꞌejbꞌatlaj dꞌa jun in carta tic.
14 Yujto tzin naꞌ talaj ol in bꞌat ach vilaꞌ,
yic ato taꞌ ol in vachꞌ alejcan juntzan̈xo tic dꞌayach.
15 Ayocabꞌ a juncꞌolal taꞌ.
A ebꞌ a vachꞌcꞌool dꞌa tic,
syacꞌbꞌat stzatzil a cꞌool ebꞌ.
Scacꞌbꞌat stzatzil scꞌool junjun ebꞌ co vachꞌcꞌool taꞌ.