Le mílu irúmu
20
1 Lárigiñe,
ába naríjin ában ánjeli larárirun siélugiñe láu ligélen júyu le mébejabei,
lúma ában oúnwenbun güríngüri lújaburugu.
2 Ába lárügüdüni ánjeli ligía dragón,
le binádu jéwe,
le Máfiabei áni Satanási,
ába lagǘraguni luágu mílu irúmu.
3 Ába láguruni lídoun júyu le mébejabei le ñí lubei ladáürei.
Ába lichugún ában séyu luágu béna lun mayéejandügüya láaña lan néchaanigu darí lásügürün mílu irúmu.
Lárigiñeme mílu irúmu ligía,
lígiragüdǘwaba luágu murúsun dan.
4 Ába naríjini jála buri ja ibíjubaña ubáfu lun jagúseragüdün,
ñun jáña luágu.
Aríja numútiña gíñe jawáni já meja adǘrürǘbaña ichǘgü lueígiñe japúrichijani Lerérun Búngiu lúma lueígiñe jadímurejan luágu Jesucrístu,
ja májuduragunbaña lun mónsturu ni tun liyáwa,
mígirun jagía lun lichugún líri luágu jerébe o luágu lan jarǘna.
Ába naríjin jásaarun lídaangiñe oúweni lúnya jabágaridun,
ába jagúmadijan úara lúma Crístu luágu mílu irúmu.
5 Ánjeinti ja jíbiri jiláguaaña,
másaaruntiña lídaangiñe oúweni daríme lárigiñe mílu irúmu.
Niján furúmiñetibei ásaaruni lídaangiñe oúweni.
6 ¡Gúndaatiña áni lánigu Búngiu jagía ja gafánraanbaña lídan furúmiñeti ásaaruni lídaangiñe oúweni!
Mabáfuti libíaman oúweni jawágu,
lubáragiñe líra,
fádirigubaña láni Búngiu lúma láni Crístu,
ábame jagúmadijan úara lúma Crístu luágu mílu irúmu.
7 Dánme sügǘjali mílu irúmu ligía,
ligíame lígirawagüdǘn Máfia lídaangiñe júyu le mébejabei,
8 ábame láfuridun lun layéejaniña néchaanigu lídan sun uboú.
Láfuriduba ayéedaña ubáfu buri le Gog lúma Magóg,
ábame loúndaraguniña jánigu,
ja gíbebaña quei liságounte barána,
lun wuríbu.
9 Ítara líña lubeíti,
ába jáfuridun súdaara jagía lídaangiñe sun uboú,
ába jegéyedaguni fulásu le ñí jabei lánigu Búngiu lúma ubúrugu le jínsiñebei lun Búngiu,
le Jerusalénbei.
Ába loúnajan Búngiu wátu geméti siélugiñe,
ába láguduniña gumúgubei.
10 Máfiati le ayéedubaliña,
ába lágurúniwa lídoun lagúnu le láubei wátu geméti lúma súfuru,
le ñíjin lubeí jágurúa mónsturu lúma proféta yéeti.
Jasúfuriruba ñi wéyuagu,
áriebu lun sun dan.
Wísiyu ligíbugiñe oúnwenbun jalaǘ jarúti
11 Ábati naríjin ában oúnwenbun jalaǘ jarúti,
ñíñein Búngiu ñun luágu.
Ába lagúmuchagun siélu lúma uboú ligíbugiñe,
ába marijínjali lan.
12 Ába naríjiniña jiláguaaña,
weínamujaña jáma ñǘbürigiña rára ligíbugiñe Búngiu,
ába tadárawagún líburu buri túma ábanya líburu to líburu to lánina ibágari.
Ába jagúserawagüdǘn jiláguaaña luágu buri cátei lé meja jadǘgübei,
según le bürǘwañubei tídan líburu buri tugúya.
13 Sarátiña sun ja añáradagubaña dúnarugu,
sun ja jiláguañabaña,
ába jásaarun lídaangiñe oúweni,
ába jagúserawagüdǘn luágu buri cátei lé meja jadǘgübei.
14 Ába lágurúniwa oúweni lúma jabára jiláguaaña lídoun lagúnu le láubei wátu geméti.
Lagúnu láuti wátu geméti ligía,
ligía libíamabei oúweni,
15 ñíjin jagurúa ja úabei jíri tídan líburu to lánina ibágari lun jasúfurirun ñi gumúgua dan.