19
1 Lárigiñe cátei le,
ába nagáambuni jamálali sarágu gürígia,
jagúarajan.
¡Alelúya!
Weíriti Wabúngiute le Súnti Gabáfu,
ligía asálbarubaliña lánigu.
2 Agúseragüdati láu úarani lúma ísuruni,
siádi láaru oúnwenbun jóru to agádeirubalin uboú láu tisálufurin,
águyugüda láali jáfarawagún lánigu tuágu.
3 Ábaya jagúarajan.
—¡Alelúya!
Magúmubei lamúdeirun tugúmulalin.
4 Játi weín-gádürü gürígia ja weírigutiña,
jáma gádürü cátaña gabágaritiña jagía,
ába jélemuchun chülǘ múarugun,
judúguatiña lun Búngiu le ñúnbei luágu lála,
ába jaríñagun.
—¡Ítaralá!
¡Alelúya!
5 Ábati lagaambún laríñagun ában umálali yaráfa lueígiñe lála Búngiu.
Rújuma uweíriguni lun Búngiu,
sun jugúya ja esériwidubalin,
áni inébelá jun,
weíyaaña,
ñǘbürigiña.
Fédu siélu
6 Agáambayatina camá jamuga jamálali sarágu gürígia,
camá lamúri sarágu dúna lúma wayújururu jéreguti,
agúaraja.
¡Alelúya!
Guméseeli Wabúreme Búngiu le Súnti Gabáfu agúmadija.
7 Gúndaagua wamá,
buínwama láu ugúndani,
ru wagíame uweíriguni lun,
ladǘga chülǘja óra lun lídan jamá ában lánigu Jesucrístu lúma,
le gumúti.
Aráanseeña quei ában adári lubá tamárieidun,
8 táu tanáangun líno to fínutu,
jarúma,
áni mirí.
Míni tan líno fínutu,
ibágari le surúti,
le jabágari lánigu Búngiu.
9 Ábati laríñagun ánjeli nun.
—Babǘrüja.
“Gúnda jamá ja amísurajoúbaña lídoun fédu le lánina lúaradun Jesucrístu jáma lánigu.”
Ába laríñagun nun.
—Dimúrei buri inárüniti le laríñagun Búngiu le.
10 Ába nájuduragun ligíbugiñe ánjeli ligía,
ába laríñagun nun.
—Madǘgabeí le,
esériwiduti áu lun Búngiu quei amǘrü jáma bibíriña ja afálarubalin láni Jesúsu ugánu derégüdaguñu,
lun Búngiu lun bájuduragun.
Ugánu le lanǘgübei Jesúsu lídoun larúgounga,
ligía lébubei sun le jaríñagubei profétagu.
Le aweínjabalin gabáyu jarúti
11 Ábati naríjini siélu junréñu,
ába lasáliragun ában gabáyu jarúti,
léti aweínjabalin,
Gúnfuliti lúma Inárüni,
ligía líribei,
ladǘga láu ísuruni lagúmadija,
láu gíñe ísuruni lageíndagua.
12 Ámirijati lágu camá ligémeri wátu,
ñíñein sarágu rídi lábulugu,
ñíñein gíñe ában íri bürǘwañu luágu,
ligía rügǘñein asúbudirei.
13 Anáanguni to luáguboun,
feíndiwatu láu jítaü.
Lerérun Búngiu líribei.
14 Jafálareiti súdaara ja siélubaña táu jadáüragun líno to fínutu,
jarútu,
jarúma,
waríñu jagía jawágu gabáyu jarútiña.
15 Ñíñoun ában efeín jamánatu liyúmulugugiñe lun láchaünguniña néchaani táu,
ábame ledéraagüdüni lagúmadijan quei láu ában gürábu.
Lagúseragüdübaña quei le aríbichagubarun beíbei láu lugúdi,
gurágüdaleíme bínu le lánina lanárime ligáñi Búngiu joun.
16 Bürǘwañu líña íri le tuágu lanáangun lúma luágu liyáda.
“Jarúeite sun urúeigu,
Jabúreme sun abúremeigu.”
17 Ába naríjin ában ánjeli rára lídan wéyu,
le agúaragubei láu érei joun sun dunúru ja ájamajabaña juánriñurugu.
—Jigoúgu,
oúndaragua jumá lun oúnwenbun ladíneragüdün Búngiu,
18 jou jumámuga jágürügü urúeigu,
gumádimatiña,
jáma wügǘriña ganígitiña,
jágürügü gabáyu jáu sun ja aweínjabaliña,
jágürügü sun jawúyeri wügǘriña dándu ja joúnguatiña quei ja idámuni,
dándu ñǘbürigiña quei weínamujaña.
19 Ábati naríjini mónsturu jáma lurúeitegu uboú jáu jánigu oúndaraguaaña lun jageíndagun lúma le waríñubei luágu gabáyu jarúti jáma lánigu.
20 Ába ladaürǘn mónsturu úara lúma proféta yéeti lé buga adǘgübei miláguru ligíbugiñe mónsturu.
Láu buri miláguru ligía,
ayéeda láaña proféta ligía ja ígiraguagüdübaña joúngua lun labǘrüdǘn líri mónsturu jawágu,
judúgua jagía tun liyáwa.
Dánduti mónsturu quei proféta yéeti ligía,
ába jagurún wínwañu lídoun lagúnu le láubei wátu geméti lúma súfuru.
21 Ja jíbiri,
ába jáfarawagún táu efeín to liyúmuluguboun le waríñubei luágu gabáyu,
ába jaquímuledun sun dunúru buídu láu jágürügü.