Adímurejati Crístu lueígiñe wafúleisein ligíbugiñein Búngiu
2
1 Nirájüñü,
nabǘrüjañein buri cátei le jun lun mafígounjan jumá.
Láu sun líra,
ánjawa afígounja,
ladímurejaba Wabúreme Jesucrístu lueígiñe wafúleisein ligíbugiñe Wáguchi Búngiu,
ladǘga ligía rügǘñein richágua ligíbugiñe Búngiu.
2 Lídaangiñe Jesucrístu ferúdunawa lan wafígoun,
áni mámarügü wafígoun,
ferúdunawati gíñe jafígoun sun ja afíñebaña luágu.
3 Ánjein wagúnfulira lugúmadin Búngiu,
wasúbudirubei luágu chülǘjadiwa lan asúbudirei Búngiu.
4 Ánjein aríñaga ában gürígia.
“Subúdi numúti Búngiu”,
áni magúnfulirunti táu lugúmadin,
yéeti gürígia ligía,
ibídiñegili Búngiu lun.
5 Ánjeinti gürígia le adǘgübalin le lubeíbei Búngiu,
chülǘjali Búngiu ínsiñeda lun buídu buídu,
ítara líña wasúbudiruni luágu lídaañadiwa lan ában lúma.
6 Le aríñaguti luágu lídaañein lan ában lúma Búngiu,
lúnti labágaridun queí meja labágaridun Jesucrístu ya uboúagu.
Le iséri gumádi
7 Nidújeñu,
mámatia iséri gumádi le nabǘrüjabei jun,
ligía méme binádu gumádi le júmabei lúmagiñe dan le jagáambubalin ugánu luáguti Crístu,
lun jagáburidun úaragua lúma ugánu ligía.
8 Guetó narítaguagüdüñadün luágu gumádi le lagúarubei Jesucrístu iséri gumádi,
áni gumádi ligía,
lun jínsiñegua wamá woúniwagua.
Ítara liñá meja labágaridun Jesucrístu,
jabágariduña gíñe ítara lugúndun jeíbuguña lan lídan larúgounga le linárünbei Búngiu,
mámaañadün lídan lubúriga.
9 Le aríñaguti luágu leíbuguña lan lídan larúgounga áni iyéreeguti lidúje lun,
lídaangili lubúriga,
ibídiñegili Crístu lun.
10 Le jínsiñejabuti joun lidújeñu lueígiñe Jesucrístu,
lídaañein larúgounga,
subúditi Crístu lun,
áni úati ni cáta lun láburugüdǘni lídoun figoú.
11 Ánjeinti le iyéreejabuti lun lidúje,
ítara líña queísi gürígia le eíbugubei lídan lubúriga,
ibídiñeti lun jalíñounbei lan lugúndun darú lani lubúriga laríjin.
12 Nirájüñü,
nabǘrüjaña jun lugúndun ferúduna láali Búngiu jifígoun ladǘga Crístu.
13 Agǘbürigu,
nabǘrüjaña jun lugúndun subúdi jumáali lan Jesucrístu lé meja níjeinjalíbei lúmagiñe furúmiñeti dan.
Ñǘbürigiña,
nabǘrüjaña jun lugúndun gáñei jumáali lan wuríbu luágu Máfia.
Nabǘrüjanbei jun,
nirájüñü,
lugúndun subúdi jumáali lan Búngiu Úguchili.
14 Nabǘrüjaña jun,
agǘbürigu,
lugúndun subúdi jumáali lan Jesucrístu lé meja níjeinjalíbei lúmagiñe furúmiñeti dan.
Nabǘrüjanbei jun,
ñǘbürigiña,
lugúndun jére jumá,
áni resíbi jumáali lerérun Búngiu tídan janígi,
lugúndun gíñe gáñei jumáali lan wuríbu luágu Máfia.
15 Mínsiñedalá ligáburi uboú jun,
ní buri cátei le lánina uboú.
Siñáti lajínsiñedun cátei lánina uboú jun,
jínsiñeme Búngiu jun,
16 lugúndun úati ni cáta lídaangiñe cátei le líchugubei uboú ñǘbinti lúmagiñe Búngiu,
lúmagiñe guánarügü uboú liábin.
Luríban jayúmajan gürígia,
ayúmajani lun jabíjini cátei le jaríjibei le uágubei jarítagua luágu buídu lan,
lúma pántaü luágu cátei le jabíjibei,
ligía buri cátei le líchugubei uboú.
17 Áni uboú,
agúmucheina líña láu buri sun luríban ayúmajani le lídaanbei,
ánjeinti le adǘgüti lugúndan Búngiu,
labágariduba lun sun dan.
Inárüni lúma iyéeni
18 Nirájüñü,
chülǘjali lagúmujoún dan.
Agáambaadün luágu iníte lan Lágani Crístu,
quei chülǘguaaña lubeí sarágu láganiñu Crístu guetó,
ligía wasúbudirunbalin luágu lagúmujoúnjali lán buri dan le.
19 Wádaangiñe jáfurida,
láu sun,
lídan lan linárün cátei máma meja wánigu jagía,
lugúndun lun jamúga meja wánigu jamá,
jeréderuña jamúga meja wáma.
Jíchugunbalin janágan luágu Crístu ítara lun larijíniwa furáangu luágu máma lan wánigu le tímatimaati.
20 Ánjeinti jugúya,
rúlaali Crístu Sífiri Sándu jun,
áni subúditün sun jugúya lun.
21 Nabǘrüjanbei lubeíti jun,
lugúndun subúdi jumáni inárüni lánina wasálbarun,
máma lugúndun ibídiñe lan jun,
áni subúdi jumúti luágu siñá lan liábin ni murúsun arúfudajani múaraanti lídaangiñe inárüni.
22 Ja arúfudajabalin le múaraanbei,
ja aríñagubaña luágu máma lan Jesúsu Crístubei le loúnajabei Búngiu uboúagun lun lasálbaruniña gürígia,
jagía láganibaña Crístu,
mafíñetiña ni luágu Búngiu Úguchili,
ni luágu Búngiu Irájü.
23 Sun ja májabaña lun jasúbudiruni Jesúsu queísi Búngiu Irájü,
ibídiñegili Búngiu Úguchili joun,
ja aríñagubaña luágu Jesúsu lan Búngiu Irájü,
subúditi gíñe Búngiu Úguchili joun.
24 Ligía,
areída jumeí lubeí ugánu le jagáambubei lúmagiñe furúmiñeti,
tídan janígi.
Ánjein jadǘga ítara,
jeréderuba gíñe lídan ában lúma Búngiu Irájü lúma lúma Búngiu Úguchili,
25 jerésibiruba gíñe ibágari le magúmuchaditi,
queísi laríñaguni Jesúsu woun.
26 Ligía nerérunbei jun jawágu láganiñu Crístu jagía já yebe busénbaña jayéedagunün.
27 Níjein Sífiri Sándu júma le líchugubei Crístu jun,
memégeiruntün lubeíti ámu lun larúfudajan jun luágu linárün Búngiu,
lugúndun arúfudaja lumúti Sífiri Sándu sun cátei jun,
áni inárüni larúfudajabei,
máma iyéeni.
28 Ítara líña lubeíti,
nirájüñü,
ítara méme jumá lídan ában lúma Crístu lun dánme lan le liábin,
gayára lámuga wasúbudiruni luágu buídu wamá lúma,
úa lámuga busíganu wawágu ligíbugiñe.
29 Queísi subúdi jumáni luágu richágua lan Crístu lídan sun cátei,
lúnti gíñe jasúbudiruni luágu lirájüñü lan Búngiu sun ja richáguabaña ligíbugiñe.