FURÚMIÑETU LIGÁRADAN PÉDRO
Labǘrüjan Pédro joun afíñetiña ja chagágubaña boúgudi lueí jageíra
1
1 Áu Pédro,
ában láni Jesucrístu apóstolu áu,
nabǘrüjañoun gárada to jun,
jugúya lánigu Búngiu ja chagágubaña boúgudi lueí jageíra loúbawagu Pónto,
Galácia,
Capadócia,
Ásia,
lúma Bitínia.
2 Nidújeñu,
anúadaja láadün Búngiu Úguchili lúmagiñe meja binárü lun lánigu jumá,
áni subúdi lumúti meja luágu lachǘlürüba lan ában wéyu lun ítara lúba lan,
ladǘga ligía lan lugúndaanbei.
Ligía larúmadagüdañajañoun lubeí Sífiri Sándu janígi láu líta Jesucrístu,
adǘgalaǘn lun gagáambadi jumá.
Ibíja jumá lubeíti sarágu abíniruni lúma darángilaü lúmagiñe Búngiu.
Loúchawagúba jafíñen, ábame liábin buíti lídaangiñe
3 Rúwama uweíriguni lun Búngiu,
le Lúguchibei Wabúreme Jesucrístu,
luágu luweírin lugúdemejabu woun.
Rújali iséri ibágari woun queísi lirájüñü láu lásaaragüdüni Crístu lídaangiñe oúweni lúnya labágaridun.
4 Queísi lirájüñü wabeí,
gayáraati weménigidun le gumúti luágu wabíjubei lan ubuíduni le aráanse láalibei wabá,
gayáraati weménigidun luágu werésibirubei lan alágan le areídañu lubeí Búngiu wabá,
siélu—ában alágan le lúnbei ladúrarun lun sun dan,
le siñábei ladáseirun,
le siñábei leféridiruni lubuídun.
5 Goúnigi lumútiwa Búngiu láu lubáfu lugúndun afíñe wamá luágu,
lun gayáraabei lan wabíjini asálbaruni lídaangiñe asúfuriruni lánina uboú le,
le aráanseñu lubeí wabá lárigiñeme lagúmuchun uboú.
6 Ligía lébubei buin jíña lan láu ugúndani,
láu sun lúnti lán funa jasúfurirun sarágu oúchawagúni luágu murúsun dan.
7 Lúnti jasúfuriruni oúchawagúni ladǘga ítara líña lan jafíñen quei gólu—lúnti louchúniwa láu wátu geméti lun larijíniwa ca lan luwúyeribei.
Afíñeni le awánduti oúchawagúni ligía,
buíti sügǘ láu gólu,
lugúndun gagúmuchaditi gólu.
Láu lubeíti jawánduni loúchawagún jafíñen,
ladímurejaba Jesucrístu buíti juágu dánme le lagíribudun uboúagun,
jibíjuba gíñe uweíriguni lúma inébesei lúmagiñe.
8 Jínsiñeti Jesucrístu jun láu sun maríjin jumágili lan,
áni láu sun maríjin jumágili lan,
rújumaali jeménigi luágu,
áni gúndaatün láu ában oúnwenbun ugúndani le siñá jumuti aríñaga láu dimúrei.
9 Ladǘga méme luweírin jafíñen luágu Crístu,
jerésibiruñein tasálbarun juwáni.
10 Lídan meja dan le sügǘjalibei,
adímurejatiña meja profétagu luágu cátei le lúnbei líchuguni Búngiu jun láu lareíni,
ába jáfaagun lun gunfaráanda jamáni luáguti asálbaruni le,
le uágubei ladímureja Sífiri Sándu jádaangiñe.
11 Subúdigüda lumútija láni Crístu Espíritu joun wügǘriña jagía le lúnbei lasúfuriruni Crístu lubáramegiwa,
lúma uweíriguni le lúnbei liábin lárigiñe.
Jagíati,
ábaja joúchun jasúbudiruni cátei lan gürígia ligía,
lúma ídaba lan lasúsereda cátei le,
le uágubei laríñaga Sífiri Sándu le jádaanbei joun.
12 Ába lasúbudiragüdüni Búngiu joun luágu mámaba lan lídan jadáani lagúnfulirúa buri cátei le,
luágu lídaanba lan wadáani.
Asálbaruni lé meja uágubei jadímureja,
ligía méme le uágubei japúrichija gürígia jun lídoun buri dan le,
láu lubáfu Sífiri Sándu le ñǘbinbei siélugiñe.
Ásta ánjeligu,
buséntiña jamúga gíñe gunfaráanda jamáni buri cátei le.
Busénti Búngiu lun wabágaridun ában ibágari le jarúmati
13 Quei jagúrabajañein lubeí jerésibiruni jalágaante siélu,
gidájumei samínaü málati jarítagunrugugiñe,
lubáragiñe líra,
derégüdagulá jarítagun,
rújumei sun jeménigi luágu asálbaruni le lúnbei líchuguni Búngiu jun láu lareíni dánme le lagíribudun Jesucrístu uboúagun.
14 Queísi isáanigu gagáambaditiña,
mabágarida jumá queí meja ligáburi jabágaridun lubáragiñe meja jasúbudiruni Búngiu.
15 Lubáragiñe líra,
abágarida jumá ában ibágari jarúmati le gumúti,
lugúndun Búngiu le agúarubei jun lun lánigu jumá,
jarúmati lídan sun cátei.
16 Taríñajare Lerérun Búngiu.
“Jarúma jumá,
lugúndun áu,
jarúmatina.”
17 Queíti janǘgüni Búngiu quei Júguchi,
Búngiu le ábanbei lábu ligáburi lagúseragüdüni jagáburi sun gürígia,
lúnti júaradun lúma láu ában goúnigi sun dan le lúnbei jabágariduni ya uboúagu.
18 Sálba láadün Búngiu lídaangiñe lagǘbüri ibágari lé meja jafúnrendeirubei jámagiñe binádu jagǘbürigu,
áni subúdi jumúti buídu luágu máma lan láu cátei gagúmuchaditi lafáyeirúa lebégi asálbaruni le,
queísi buri gólu o pláta,
19 láu líta Crístu le gebégibei sügǘ láu sun cátei lafáyeirúa.
Derégewati Crístu lun loúnwen luágu wafígoun quei ában mudún le buídubei lídan sun luwúyeri,
sálba wamámuga.
20 Lúmagiñe lubáragiñe buga ladǘgüni Búngiu uboú,
ába laráanserun lun Crístuba lan Wasálbaragüle,
luágu lubeíti wafúleisein lachǘlaagua Crístu lídoun lagúmujoún dan le,
lun lasálbaruníwa.
21 Lídaangiñe Crístu,
ába jiyábin lun jafíñerun luágu Búngiu le ásaaragüdübalin Crístu lídaangiñe oúweni,
ru ligía uweíriguni lun,
ítara líña jiyábin lun jafíñerun luágu,
rújumeíme sun jeménigin luágu.
22 Guetó,
láu gagáambadi jumá lun linárün Búngiu láu lubáfu Sífiri Sándu,
jarúmaaru janígi lun gayáraabei lan jínsiñedun jidújeñu lueígiñe Jesucrístu jun le tímatimaati.
Lúnti lubeíti jínsiñegua jumá júngua láu sun tarúman janígi,
lúma láu sun jére,
23 lugúndun iséri gürígia jugúya.
Mámaadün jasáanigu agǘbürigu ja goúwedaditiña,
lirájüñüjadün Búngiu láu jagáambuni lerérun le íchugubei ibágari,
le gíñe adúrarubei lun sun dan.
24 Taríñajare Lerérun Búngiu.
Ítara jáña sun gürígia quei jíduru,
liábin jaweírigun quei lufúlurin jíduru.
Dan le lásaürün jíduru,
ába láburujan lufúlurin,
25 ánjein Lerérun Búngiu,
duráti lun sun dan.
Áni dimúrei le,
ligía ugánu le lánina asálbaruni le uágubei laríñawagúa jun.