Rúwamei waríjin luágun Jesúsu
12
1 Ítara líña meja jagáburidun sun jíbe gürígia jagía lídan dan le sügǘjalibei,
láu jafíñen luágu Búngiu.
Ában jémpulu jagía woun lun ítara méme lan wagáburi.
Ibágari le,
queísigubeirügü ában eíbaaguni,
gidáwamei sun le erédejabaliwa wawáriua,
lúma figoú le agǘragubalíwa,
adǘga wameí eíbaaguni le wabáragiñebei láu gurásu,
láu sun wafíñen luágu Jesucrístu.
2 Rúwamei waríjin luágun Jesúsu,
le ídaangiñebei liábin wafíñen,
le gíñe abuíduragüdübalin wafíñen le gumúti.
Súfuriti Jesúsu luágu gurúwa,
mebéresenga ligía láu nibúsigarídüna lan luwúyeri oúweni ligía,
lugúndun subúdi láni luágu lásun lánme lasúfurirun,
lagúndaaruba lan,
ába lañúurun lueígiñe loúnwenren Búngiu.
3 Lídan le joúchawagúniwa,
samína jumá lubeíti luágu láni Jesúsu jémpulu,
luágu lawánduni sarágu súfuri jámagiñe gafígountiña,
ligía mabúchadalá lubeí juágu,
máburujan ligíame jarǘna.
4 Machǘlügidün lúmoun oúweni lídan jageíndagun lúma figoú queí ligía.
5 ¿Bulíei jumásan dimúrei le líchugubei Búngiu jun queísi lirájüñü?
Láriñajare tídan Lerérun.
Niraü,
míchigabá mabájüdüni luágu abeichúni le líchugubei Babúreme Búngiu buágu lídan le wuríba lan bigáburi,
máburujan ligíame barǘna dan le ladeínjan bun.
6 Lugúndun arúfudajati Búngiu joun ja jínsiñebaña lun,
beílumutiña gíñe ja lerésibirubaña queísi lirájüñü.
7 Áfaga jumeí abeichúni lúmagiñe Búngiu,
lugúndun loúseruñadün queísi lirájüñü.
¿Níjein funági isáani mabeíchun lumúti lúguchi?
8 Ánjaün mabeíchun lan Búngiu,
queísi labeíchuniña sun lisáanigu,
mámarügü jíña lisáanigu ja tímatimaatiña,
bástadi jugúya.
9 Dán meja le ñǘbürigidiwa,
beíjamutíwa meja wagǘbürigu,
áni inébetiña meja woun.
Lúntimaati wagáambuni Wáguchi le siélubei,
lun gabágaribadiwa lan.
10 Jabeíchuniwa meja wagǘbürigu ya uboúagu lúnrügü murúsun ibágari le,
lun jagǘriajaníwa buídu según jabáfu,
ánjeinti Búngiu,
lun waságarun buíti lídaangiñe labeichúniwa,
labeíchawa lun ladǘgüníwa lun buídu wamá ítara quei buídu lan.
11 Inárüni luágu úa lan abeichúni áuti wagúndaara lídan le werésibiruni,
gárirügüti woun,
ánjeinti ja afúrendeirubaña lídaangiñe abeichúni,
ibíjatiña ában ibágari lánina ísuruni lúma darángilaü lídaangiñe abeichúni ligía,
lárigiñe.
Mamájara wamá lun Búngiu
12 Rújuma lubeíti iséri érei lun jarǘna le bucháalibei uágu lárigi asúfuriruni,
lúma lún buri jigáchürügü le débilijalibei,
13 áluaja jumeí ǘma le surúbei.
Mígira jumá lébuna chugéguaü lídan ǘma lueí jeíguadun ja débiligiñabaña lídan jafíñen,
íderaguarügü jumáña lun joúdin jabáruaguoún lídan jafíñen.
14 Joúcha jumá lun lídan jumá darángilaü jáma sun gürígia,
abágarideina ában ibágari le jarúmati,
lugúndun le wíyebei igáburi,
siñábei lachǘlürün lúmoun Búngiu.
15 Toúnigi jumá lueí níjein lan ában jídaangiñe meíbugunti buídu lúma Búngiu,
ábame leféridiragüdüni jafíñen jíbiri queísi ladǘgüni jíduru gífiti le abíñaragubalin sun le agúurubei luágu.
16 Úa la ni ában jídaangiñe agámariduti mamárieidunga,
míchugun ligíame mebéreseni luágu cátei le lánina Búngiu.
Ligía cátei le meja ladǘgübei Esaú,
ába lalúguruni lirícha queísi íbugañaü luágu ában asíedu eígini.
17 Subúsiti jun luágu lárigiñe lán buga ladǘgüni,
buséngili yebe lerésibiruni labínirun lúguchi queísi íbugañaü,
mabíjin láali,
siñáali lasáansiraguni lúguchi le adǘga láalibei láu sun layájuajan Esaú láu igárigu.
18 Jugúya,
mayárafaduntün lun cátei le gayáraabei jasándiruni queísi lasúseredun joun Israelítagu dán meja le jerésibiruni binádu lidáradun Búngiu jáma.
Yaráfatiña meja lun wǘbü le Sión,
le durúngubei láu wátu geméti,
le ñí lubei níjein lán meja lubúriga lúma luríbouga,
19 magáambun jumúti gíñe lamúri fídu lúma lumálali Búngiu le adímurejabei joun.
Ja agáambubalin umálali ligía,
ayúmuraguatiña lun jebé lan ladímurejan joun.
20 Jadǘgünbalin líra lugúndun luweírin janúfude lueí lagúmadijan Búngiu,
ladǘga laríñajare.
“Le íchuguti lugúdi luágu wǘbü,
afarúalá jilágubei láu dǘbü o táu lan ában efeín,
íbini ában lan anímaalu”,
ladǘga fulásu ligía,
níjein Búngiu ñi.
21 Weíriti lanúfunejabu cátei le jaríjubei,
darí lun laríñagun Moisés guánarügü.
“Nadádagaruña láu anúfudei.”
22 Ánjein jugúya,
lábugiñe iséri darádu,
ñǘbinjadün lun cátei weíriti sügǘ láu le únbei jayábin já buga lábugiñebaña binádu darádu.
Yaráfaadün lun wǘbü Sión le siélubei,
lílanaadün lubúrugute Búngiu le wínwanbei,
le ában Jerusalén le siélubei,
le ñí lubei jagánawa sun ánjeligu,
ja ájuduragubaña lun jíchugun uweíriguni lun Búngiu.
23 Lídaañadün jadámurin lirájüñü Búngiu ja bürǘwañubaña íri siélu.
Lun Búngiu le agúseragüdübaliña sun gürígia jayárafada,
lídaañadün ában jáma ja oúwegubaña ja buídubaña igáburi uboúagu,
áni buíngüda lumúti Búngiu lubuídun jagáburi siélu.
24 Ñǘbinjadün lun Jesúsu,
le búyei lun iséri darádu,
bajíwaguaadün láu líta Jesúsu lun lachibúniwa jifígoun,
le ábanbei cátei weíritimaati sügǘ láu le labúseerúbei líta Abél—lun lagúseragüdǘniwa Caín luágu láfaruni Abél jilágubei.
25 Ligía mamájara jumá lubeí jagáambuni Búngiu.
Meséfujaña ligía meja Israelítagu ja mebéresenbaña láu Búngiu,
dán buri meja lerérunbei joun lídaangiñe Moisés,
le ábanbei lílana uboú,
gúbume siñá lan weséfurun ánjein wíchiga wanágan luágun Búngiu lídan le ladímurejan woun lídaangiñe Liraǘ,
le lílana siélu.
26 Jingígüda lumúti meja lumálali Búngiu uboú lídan dan ligíra,
ánjeinti guetó laríñajare.
“Nánjingichagüdübeiya mámarügü uboú,
ásta gíñe siélu.”
27 Dan le laríñagun “nánjingichagüdübeiya”,
míni lan luágu lagídarúba lán buri cátei le márügüdünbei luágu ébuu derébuguti,
ábame leréderun le siñábei lánjingichúniwa.
28 Arúeijani le líchugubei Búngiu woun siñáti lánjingichún.
Rúwama lubeíti eteíngiruni lun Búngiu luágu líra,
judúgua wamá lun láu inébesei lúma gúnfuli queísi labúseerun,
29 lugúndun lagúmuchaguagüdübei Wabúngiute sun cátei le mabuídunti queísi lagúmuchaguagüdün wátu geméti cátei.