10
1 Lilúrudun Moisés liyáwa rügǘñein méja buri cátei buíti lé meja lúnbei lanǘgüni Crístu joun gürígia,
le lásiñerubei lúrudu íchiga joun.
Ja lubeíti ayárafadubaña lun Búngiu lídaangiñe játa anímaalu le adágaragüdǘwabei lun Búngiu según lilúrudun Moisés,
lé buri adágaragüdǘwabei ságü irúmu,
siñáti meja jadáriruni jabuídurun le gumúti ítara.
2 Lun jamúga gayára lan labuíduragüdüniña lúrudu le gumúti ligíbugiñe Búngiu,
ába jamúga madügǘnjali lan adágaragüdüni buri le,
lugúndun ja adǘgübalin,
láu jamúga jarúmadun ában weíyaasu lídaangiñe jafígoun lun súnwandan,
masándiragunjaña jamúga joúngua láu dúru luágu figoú.
3 Seríwiti adágaragüdüni buri le lun larítaguagüdüniña luágun jafígoun ságü irúmu,
4 quei siñá lubei lagídaruni játa bágasu lúma játa gábara figoú.
5 Ligía laríñagunbei Crístu lun Búngiu dan le lebélurunbei uboúagun.
Mabúseerúntibu adágaragüdüni ni anímaalu íchugúti bun,
aráanserügütibu ában úgubu nun lun nedéregeruni bun.
6 Magúndaantibu láu buri jagudún anímaalu luágu latárü bun,
ní buri láu adágaragüdüni lun ladáuragun figoú.
7 Ábati naríñagun.
“Ñǘbinjadina uboúagun lun nadǘgüni bugúndan,
Nubúngiute,
ítara queísi bürǘwañu líña lan nuágu tídan Berérun.”
8 Furúmiñe,
laríñaga luágu mabúseerun lan Búngiu,
magúndan ligía,
láu adágaragüdüni,
ni jáu anímaalu íchugúti lun,
ni anímaalu gudáwati luágu latárü,
ni adágaragüdüni lun ladáuruni figoú,
láu sun lán buri cátei le uágubei laríñaga Búngiu lídaangiñe Moisés joun gürígia lun jadǘgüni.
9 Laríñaga Crístu lárigiñe.
“Ñǘbinjadina lun nadǘgüni bugúndan,
Búngiu.”
Laníchigu líra,
ñǘbinjali Crístu uboúagun lun lagúmuchaguagüdüni igáburi le ladágaragüdǘniwa anímaalu,
lun líchaagun lúngua lewéñegua.
10 Ligía lugúndanbei Búngiu,
lun larúmadagüdüníwa ligíbugiñe láu loúnwen Jesucrístu ában weíyaasu lun sun dan luágu wafígoun.
11 Sun fádirigu juríu,
ságü wéyu jadǘgüni buri ában méme adágaragüdüni,
láu sun siñá lan lagídaruni adágaragüdüni ligía figoú.
12 Ánjeinti Jesucrístu,
ában rügǘñein weíyaasu líchaagun lúngua luágu figoú lun sun dan,
ábati lagíribudun siélun,
ába lañúurun lueígiñe loúnwenren Búngiu.
13 Níjein ñi guetó agúrabaja líchuguniña Búngiu láganiñu lábugiñoun lubáfu.
14 Láu loúnwen ábanrügü weíyaasu,
ába labuíduragüdüniña lánigu Búngiu,
le gumúti,
lun sun dan.
15 Choúru lumúti gíñe Sífiri Sándu cátei méme ligía woun,
lugúndun laríñaga le laríñagunbei Búngiu.
16 Darádu le lúnbei nadǘgüni jáma lárigiñeme buri wéyu ligía,
ítara lúba,
líña laríñagun Búngiu.
Níchugubei nugúmadin tídoun janígi,
ábame nabǘrüdüni jarítagunrugu.
17 Lárigiñe laríñaga.
Marítagundügǘyaadináme luágu jafígoun ni luágu wuríbati buri le jadǘgübei.
18 Dan lubeíti le ferúdunawaali figoú lun sun dan,
memégeirunwali ámu adágaragüdüni luágu figoú.
Lúnti wayárafadun lun Búngiu
19-20 Ligía lubeíti nidújeñu,
láu loúnwen Crístu luágu wafígoun,
gayáraajali wayábin ligíbugiñe Búngiu manúfudeiga.
Úaaru bélu lun teréderuníwa lueí webélurun lídoun Fulásu le Sándutimáabei,
le ñí lubei Búngiu,
gidá lumutu Crístu bélu tugúya láu loúnwen.
Junrénti ában iséri ǘma woun lúmoun Búngiu,
ában ǘma le anǘgübalíwa lídoun ibágari magúmuchaditi.
21 Jesúsu wafádiriñebei íñutimaati tídan Lúban Búngiu siélu,
22 ligía lúnti lubeí wayárafadun lun Búngiu láu tarúma wanígi,
lúma láu sun wafíñen derégüdagu luágu.
Jarúmagüda láaru wanígi lun masándiragun wamá woúngua láu dúru luágu figoú lárigiñe lachibúniwa,
badíseijadiwa láu dúna jarúmati.
23 Ítara méme wamá derégüdagu lídan wafíñen,
masáansiragúnga,
lugúndun gayára lan weménigidun luágu Búngiu lun lagúnfuliruni lerérun lun líchuguni ibágari magúmuchaditi woun.
24 Lúnti gíñe wáfaagun wíderaguniña wíbirigu lun jínsiñejabu jamá,
lúma lun jadǘgüni le buídubei.
25 Moún lumuti wafálaruni jémpulu jáni ja jéchubaña lun mídin jamá lídan wadámuridagun,
wagía afíñetiña,
le lúnbei wadǘgüni,
lun wíchugun gurásu joun wíbirigu,
guetótima láu aríja wamáni luágu yaráfaali lan luwéyuri Wabúreme Jesucrístu lun lagíribudun uboúagun.
26 Lugúndun ánjawa afígounja láu wíchuguni wanágan luágu Crístu lárigiñe wasúbudiruni luágu ligía rügǘñein lan agídarei figoú,
úaali ámu luwúyeri lun wasálbarun lídaangiñe wafígoun.
27 Ában rügáali cátei lun wagúrabajani,
lun lagúseragüdüníwa Búngiu láu ában lanárime igáñi,
ábame wagǘnrichawagún jáu sun jíbiri láganiñu Búngiu lídan wátu geméti.
28 Dan le ladǘraaguni ában gürígia lilúrudun Moisés,
áni añájein biáma o ǘrüwa geféentiña luágu,
ába laríñagun lilúrudun Moisés luágu lúnti lan loúnwen gürígia ligía,
magúdemejabuti lúrudu lun.
29 Weíritimaati súfuri le jadǘnabei ja mebéresenbaña láu Liraǘ Búngiu,
mebéresen jagía láu líta,
anába jameí Sífiri Sándu le jínsiñejabubei joun.
Líta Jesucrístu,
ligía achoúrurubalin lidáradun Búngiu wáma,
le adǘgübaliwa jarúma ligíbugiñe.
30 Subúdi wamúti ligáburi Wabúreme Búngiu le aríñagubei.
“Áu le lúnbei labeíchaguniña gürígia,
áu le lúnbei lafáyeigüdüniña luágu jafígoun.”
Aríñagati gíñe.
“Nagúseragüdübaña numútuniña.”
31 ¡Fugiábu gürígia le uágunti láburuja ligáñi Búngiu le wínwanbei lun sun dan!
32 Jarítagua jumá luágu buri wéyu le sügǘjalibei dán meja le jerésibirubalin larúgounga luágu Jesucrístu.
Weíriti meja jasúfurirun lídoun meja dan ligía,
áni awánda jumúti sun cátei láu gurásu.
33 Añájein jídaangiñe,
anabúatiña,
ouserúa jagía wuríba ligíbugiñe guríriguaü ladǘga jeíbugun lúma Crístu,
jíbiri,
súfuritiña ladǘga gamádagua jamá jáma ja wuríbabaña ouserúniwa.
34 Gudémejabutün meja joun ja furísunrugubaña,
ásta láu ugúndani ígiraguagüdatün júngua lun lagídarún le júmabei jueí,
subúdiñu jumeín luágu níjein lan cátei júma siélu le buítimaati,
le siñábei lagidarún jueí.
35 Guetóti,
meféridira jumeín lubeíti jeménigi luágu Búngiu,
lugúndun jerésibiruba lan ában oúnwenbun afáyeiragülei siélu.
36 Gagúraasun jumá,
lun lárigiñeme lan jawánduni asúfuriruni queísi labúseerun Búngiu,
gayára lámuga jerésibiruni le lúnbei líchuguni Búngiu jun,
siélu.
37 Taríñajare Lerérun Búngiu luágu lagíribudun Crístu uboúagun.
Málüjali ánjein ñǘbin le lúnbei liábin,
madárasarunbei sarágu dan.
38 Le nerésibirubei queísi richáguati nigíbugiñe,
labágariduba láu lafíñerun nuágu,
líña laríñagun Búngiu.
Ánjein leféridira lafíñen,
magúndaanbadina lúma.
39 Wagía,
mítaraanbádiwa queí gürígia ja eféridirubalin jafíñen luágu Búngiu,
ába jeféridirun,
wasígiruba láu sun wafíñen luágu daríme woúnwen,
belú támuga wawáni siélun.