Jesúsu fádiri líbe Melquisedéc
7
1 Melquisedéc le,
urúei lídan meja fulásu le gíribei Sálem,
lufádiriñein gíñe Búngiu le íñutimáabei.
Dan le lagíribudunbei Abrahám wuríburugugiñe lárigiñe lagáñeiruni wuríbu jawágu urúeigu,
ába láfuridun Melquisedéc lubároun,
ába labíniruni,
2 ába líchuguni Abrahám ában lídaangiñe cáda díisi lídaangiñe le lagáñeirubei lídan wuríbu lun.
Míni lan íri Melquisedéc lídan furúmiñeti cátei,
“urúei richáguati” queí mejati lurúeite lubeí Sálem,
áni “darángilaü” míni lan Sálem,
ítara líña lubeíti “lurúeite darángilaü” Melquisedécbei.
3 Ibídiñewati ca lan lagǘbürigubaña,
ibídiñeti gíñe ca lan linébaanfaangubaña,
ibídiñewati ni cáta libǘgürü lagǘriajoún ni libǘgürü loúnwen,
liyáwa Liraǘ Búngiu ligía,
ában fádiri lun sun dan.
4 Aríja jumeíti luágu weírigu lán meja Melquisedéc.
Abrahám guánarügü lé meja binádu wadúje,
rúlumuti ában lídaangiñe cáda díisi lun lídaangiñe le lagídarubei jaweí urúeigu lídan wuríbu.
5 Según lilúrudun Moisés,
fádirigu ja linébaanfaangu Leví lúnti jagúburajani ában lídaangiñe cáda díisi jámagiñe gürígia lídaangiñe sun cátei,
láu sun jadújeñu jamá,
linébaanfaangu Abrahám jáledi.
6 Ánjeinti Melquisedéc,
láu sun máma lan linébaanfan Leví,
agúburaja lumúti ában lidíisin cátei lueí Abrahám,
lé buga erésibirubalin dimúrei lúmagiñe Búngiu.
Ítara líña labíniruni Melquisedéc Abrahám,
7 áni siñáti lasígeneruni ni ában luágu weírigutima lan le abínijabei sügǘ láu le abínirúabei.
8 Ya wádan,
fádirigu ja erésibirubalin cáda lidíisin cátei,
wügǘriña goúwedaditiña,
ánjeinti luágu Melquisedéc,
tadímurejan Lerérun Búngiu luágu quei luágu ában le wínwangili.
9 Áni gayáraati laríñawagún luágu Leví jáu sun fádirigu ja linébaanfaangu ja agúburajabalin cáda lidíisin cátei guetó,
luágu fáyei jamáni gíñe lun Melquisedéc lídan óra le lafáyeirunbalin Abrahám lun,
10 lugúndun lídan ában oúbaü,
barǘ lumutiña buga Abrahám linébaanfaangu ja magǘriajoúngiñabaña lídan lúgubu dan le láfuridunbei Melquisedéc lubároun.
11 Jádaangiñe fádirigu ja linébaanfaangu Leví jerésibirei Israelítagu lilúrudun Moisés,
áni Aarón furúmiñetibei jafádirin.
Gürígia ja afálarubalin lúrudu ligía,
lun jamúga gayára lan jasálbarun le tímatimaati lueígiñe,
memégeirunwali jamúga lachǘlaagun ámuya fádiri,
máma líbe Aarón,
líbe Melquisedéc.
12 Lugúndun dan le liábin fádiri lídaangiñe ámu adǘgawaguni,
sáansiwati gíñe lúrudu lé buga lábugiñebei lafádirija.
13 Wabúreme Jesucrístu,
queísi fádiri lídaangiñe ámu adǘgawaguni queísi Melquisedéc,
sáansiguati gíñe lúrudu le lábugiñebei lafádirija.
Taríñajare Lerérun Búngiu luágu lídaangiñeti lan ámu liraǘ Israél lueí Leví liábin Crístu—ában adǘgawaguni le úagilibei ni ában jádaangiñe afádirijati.
14 Lugúndun subúdiwati buídu luágu jádaangiñe lan linébaanfaangu Judá liábin Wabúreme Jesucrístu,
áni maríñagunti Moisés ni cáta jawágu adǘgawaguni ja dan le ladímurejaanbei jawágu fádirigu.
15 Áni furáangutimáati le dan le liábin Jesucrístu lun lafádirijan queísi Melquisedéc,
16 máma láu ában lúrudu le aríñagubei cába lan ídaangiñe adǘgawaguni liábin,
liábin lun fádiribei lan lugúndun gabáfu lan lun labágaridun lun sun dan.
17 Niján le laríñagubei Búngiu luágu Jesucrístu.
Ában fádiri amǘrü lun súnwandan,
le líbe Melquisedéc.
18 Gumúguati lubeíti binádu gumádi le lilúrudunbei Moisés,
le lábugiñebei jafádirijan Levítagu,
lugúndun nírein lan mégeiti luágu,
19 mabáfuti lúrudu ligía lun lasálbaruniña gürígia lídaangiñe jafígoun.
Lewéñeguati,
níjein ában iséri aráanseruni le buítimaati,
le ídaangiñebei gayára lan wayárafadun lun Búngiu.
20 Áni láu ában fiñún ladǘgei Búngiu aráanseruni le lun Jesúsuba lan wafádiriñe.
21 Ja jíbiri fádirigu,
máfiñurunwati dan le líchugunbei jafúlasun joun,
ánjeinti luágu Jesúsu,
le láubei fiñún líchugúa lufúlasun lun,
laríñajare tídan Lerérun Búngiu.
Áu Búngiu le Abúremeinbei,
fiñújadina bun,
masáansiragun nubeí narítagun.
“Ában fádiri amǘrü lun súnwandan,
le líbe Melquisedéc.”
22 Ligía Jesúsu lubeí achoúrurubei ában darádu buítimaati lueí le furúmiñeti.
23 Já meja jíbiri fádirigu,
chülǘtiña agíbedagua lugúndun quei ába lán buri joúnwen,
siñáti jasígirun,
24 ánjeinti Jesúsu,
quei moúnwen lan,
másügürünbei lifísiute queísi fádiri lúmoun ámu.
25 Ligía gayára lubeí lasálbaruniña ja ayárafadubaña lun Búngiu lídaangiñe le tímatimaati lun súnwandan,
lugúndun gabágariti súnwandan lun layúmuragun lun Búngiu jawágu.
26 Jesúsu lubeíti fádiribei íñutimáati le wabúseerúbei.
Jarúma ligía,
úati wuríbani lídan,
ni figoú,
máma ligía ában jáma gafígountiña,
iñurúa ligía íñutima lueí sun cátei siélu lun lañúurun lúma Búngiu.
27 Mítaraanti quei jíbiri fádirigu íñutimaatiña ja gásubei jáfarun anímaalu lun jadágaragüdüniña quei sacrifísiu ságü wéyu,
furúmiñe luágu jafígoun guánarügü,
lárigiñe luágu jafígoun jíbiri gürígia.
Lubáragiñe líra,
adǘga lumúti Jesúsu sacrifísiu ábanrügü weíyaasu dan le líchaagunbei lúngua lun loúnwen luágu jafígoun gürígia.
28 Wügǘriña ja débilibaña,
jagía líchugubaña lilúrudun Moisés queísi fádirigu,
ánjeinti lárigiñe lidáani lúrudu,
ába láfiñurun Búngiu luágu Liraǘ lun ladǘgüni fádirime,
le buídubei adǘgün le gumúti lun súnwandan.