4
1 Guetó lubeíti níjeingua béna júnren woun lun gayára lan webélurun lídoun eméraaguni le aráanse láalibei Búngiu woun siélu,
lúnti goúnigi wamá,
siñádügü liñeín lebélurun ában wádaangiñe,
dánme lachǘlürün óra lun woúnwen.
2 Lugúndun apúrichijoúali gíñe ugánu luáguti asálbaruni woun queísigubeirügü joun binádu wagǘbürigu,
mesériwinti lun ni cáta joun jagáambuni ugánu ligía lugúndun agáamba jamúti,
mafíñerunga luágu.
3 Ánjeinti wagía le afíñeelibei,
wagíaba ebélura lídoun eméraaguni le,
le uágubei laríñaga Búngiu.
Ligía nagáñidunbei jáma,
ába náfiñurun joun luágu mebélubaña lan lídoun fulásu le aráanse náalibei yebe jabá lun jeméraagun.
Ítara líña lerérun Búngiu jawágu binádu wagǘbürigu.
Aráanserúati fulásu lánina eméraaguni joun lúmagiñe wéyu le lagúmuchuni Búngiu ladǘgüni uboú,
4 queísi labǘrüdǘniwa tídan Lerérun Búngiu luágu lisédün wéyu.
Ába leméraagun Búngiu lídaangiñe sun luwádigimari luágu lisédün wéyu.
5 Aríñawagúaya ligía tídan Lerérun tugúya ítara.
Mebélubaña lídoun fulásu le aráanse náalibei yebe jabá lun jeméraagun.
6 Láu dimúrei buri le,
subúdi wamúti luágu aráanserúañu lan fulásu lánina eméraaguni jabá gürígia,
ja binádu wagǘbürigu,
ja furúmiñebaña agáambei ugánu lánina asálbaruni,
mebélutiña ladǘga mafíñeni le jawágubei lun Búngiu.
7 Ligía laráanserunbei Búngiu ámu dan lun gayáraabei lan jebélurun iséri gürígia lídoun jeméraagun,
lugúndun adímurejati Búngiu lídaangiñe lé meja laríñagubei Davíd sarágu dan lárigiñe,
tídan Lerérun Búngiu.
Ugúñe,
láu jagáambuni le laríñagubei Búngiu,
medéreratá janígi lun.
8 Lun jamúga fulásu lan lé meja ñíjin lubeí lanǘgaña Josué Israelítagu fulásubei lánina eméraaguni le uágubei ladímureja Búngiu,
madímurejaanyati jamúga Búngiu sarágu irúmu lárigiñe jebélurun Israelítagu lídoun jageíra luágu “ugúñe lan dan” lun jagáambuni Búngiu,
gayára lámuga jebélurun lídoun jeméraagun.
9 Ítara líña lubeíti,
níjeingua ában eméraaguni le gumúti joun lánigu Búngiu,
10 lugúndun le ebéluruti eméraagua lúma Búngiu siélu,
eméraaguati lueí luwádigimari ítara quei leméraagun meja Búngiu lueí luwádigimari lárigiñe ladǘgüni uboú.
11 Lúnti lubeíti wafíñerun le tímatimaati luágu Jesucrístu lun gayára lan webélurun lídoun eméraaguni siélu,
faládügü liñálin ában wádaangiñe jáni já meja mafíñerunbaña jémpulu,
ábame leféridirun.
12 Lugúndun mítaraantu Lerérun Búngiu queísi ában cátei le jiláalibei,
lubáragiñe líra,
gabáfuti lun lasáansiraguni wagáburi.
Belútu tídoun wanígi queísi ában efeín to biángua tamána,
belú tugúya chülǘ túmoun wawáni lúma wáni espíritu.
Furáangugüda tumúti sun warítagun lúma sun wayúmajan,
arúfuda tugúya cátañañadiwa lan.
13 Úati ni ában gürígia le ladǘgübei Búngiu lun gayára lan larámudagun lueí laríjin Búngiu,
furáanguti sun cátei lun,
le únbei lúmaba lan wagúsera.
Jesúsu wafádiriñebei le tímatimaati
14 Jesúsu le Liraǘ Búngiu,
ligía wafádiriñebei le tímatimaati,
le belújalibei siélun lun laráramun ligíbugiñe Búngiu abúyeija luágu wafúleisein.
Ligía lunti lubeí derégüdagu méme wamá lídan ligáburi wafíñen.
15 Gayáraati gudémejabu lan Jesucrístu le wafádiriñebei woun luágu wadébilin,
lugúndun ligía guánarügü súfuriti sun luwúyeri oúchawaguni quei wagía,
mafígounjaanti.
16 Ligía lúnti lubeí wayárafadun lun Búngiu le jínsiñejabúbei woun,
láu afíñeni,
lun gudémejabu lan woun,
íderagua láwame láu lareíni lídan wemégeirun.