Weírigutimaati Jesúsu lueí Moisés
3
1 Ítara líña lubeíti,
nidújeñu derégeguatiña joúngua lun Búngiu,
quei jádaangiñetün lan ja únbaña wájali lan Búngiu lun jaganoún lúma siélu,
téni jumá buídu lun Crístu le loúnajabei Búngiu,
le gíñe fádiri íñutimaati le lánina afíñeni le wawágubei.
2 Úaraguati Jesúsu lúma Búngiu lídan sun wadágimanu le únbei lanúadirei,
queísi meja gíñe úaragua lan Moisés lídan sun lesériwidun jádan lufámilian Búngiu.
3 Gadǘnatimaati Jesúsu uweíriguni sügǘ láu Moisés ítara quei resíbitima lan le adǘgübei ában múna uweíriguni sügǘ táu múna to ladǘgüboun.
4 Sun múna adǘgarügü lumútu som gürígia,
áni Búngiu adǘgübalin sun cátei le níjeinbei.
5 Ítara liñáti,
úaraguati meja Moisés lídan lesériwidun jádan lufámilian Búngiu queísi ában esériwiduti lun Búngiu,
wadágimanu lé meja ladǘgübei,
ában liyáwa inárüni le lúnbei lasúbudiragüdǘniwa lídan dan le lúnbei liábin.
6 Ánjeinti Crístu,
úaraguati queísi isáani jádan lufámilian Búngiu,
áni jádaangiñetiwa família jagía ánjawa derégüdagu méme,
ánjawa gíñe afíñe darí lúmoun woúnwen,
gúndaañu lídan eménigini le wawágubei.
Eméraaguni joun lumútuniña Búngiu
7 Ligía lubeíti,
lúnti wagáambuni le laríñagubei Sífiri Sándu tídan Lerérun Búngiu.
Ánjein jagáamba le laríñagubei Búngiu ugúñe,
8 medéreratá janígi queí meja tedérerun janígi
magáambaditiña ja oúchagubalin Búngiu lídan fulásu mageírawati.
9 Lídan bián-wein irúmu le jáubei ñi,
joúchagua jamútina binádu jagǘbürigu lídan fulásu ligía,
líña Búngiu,
láu sun aríja jamáni buri cátei le nadǘgübei.
10 Ligía nagáñidunbei jáma gürígia jagía,
ába naríñagun.
“Súnwandan charárañu jamá tídan janígi,
májatiña jafálaruni ǘma le narúfudubei joun.”
11 Ligía nagáñidunbei jáma,
ába náfiñurun luágu mebélubaña lan lídoun fulásu lé yebe aráanse náalibei jabá lun jeméraagun ñi.
12 Nidújeñu,
toúnigi jumá lueí tedérerun janígi lun jadísedun lueí Búngiu le wínwanbei láu mafíñerun jumá luágu.
13 Lubáragiñe líra,
rújuma gurásu júniwagua ságü wéyu,
sun níjangua lan dan.
Toúnigi jumá lueí leyéedagunün figoú,
edéreragüdounme janígi,
14 lugúndun ánjawa ítara méme derégüdagu darí woúnwen lídan afíñeni le wawágubei lúmagiñe furúmiñeti,
gafánraanbadiwa lúma Crístu.
15 Níjangua dimúrei le,
le gíñe woúnbei,
wagía le wínwanbei lídoun buri dan le.
Ánjein jagáamba le laríñagubei Búngiu guetó,
medéreratá janígi quei jagǘra ja magáambadibaña lun Búngiu.
16 ¿Cátañati agáambubalin lumálali Búngiu,
lárigiñe,
ába jagáñidagüdüni láu luríban jagáburi?
Sun ja laságarubaña Moisés Ejíptogiñe.
17 ¿Cáti úma lagáñida Búngiu bián-wein irúmu?
Jáma ja afígounjabaña,
ja oúwegubaña lídan fulásu mageírawati,
ába ligirúniwa jábu ñi.
18 ¿Cáti un láfiñura Búngiu luágu mebélubaña lan lídoun fulásu lé yebe aráanse láalibei joun lun jeméraagun ñi?
Joun ja adǘraagubalin le lubeíbei.
19 Ítara líña lubeíti,
goúnigi jumá lun jafíñerun meme darí lúmoun joúnwen,
lugúndun ladǘga mafíñeni le jawágubei binádu wagǘbürigu,
siñá lubeí meja jebélurun lídoun fulásu le aráanse láalibei yebe Búngiu jabá.